[66] Vakatakila 21

¹Au a qai raica na lomalagi vou kei na vuravura vou, ni sa yali na i matai ni lomalagi kei na i matai ni vuravura. Sa sega talega ni qai dua na wasawasa me tu kina.

²Oti o ya oi au, o Joni, au a raica na koro tabu, o Jerusalemi vou, sa lako sobu mai me vaka na goneyalewa sa uku ena i ukuuku me lako vua na watina.

³Au qai rogoca e dua na domo levu mai lomalagi ni tukuna, "Raica, na vale ni Kalou sa tu vei ira na tamata, ena tiko vata kei ira o Koya, o ira era na qai Nona tamata na Kalou vakataki Koya ena dau tiko vata kei ira me nodra Kalou.

⁴"Na Kalou ena qai tavoya tani na wai ni matadra kecega; sa na sega tale kina na mate se rarawa, se na tagi ena sega talega e kea na mosi, na veika kece edau yaco tu e liu sa oti vakadua."

⁵Sa qai vosa mai o Koya sa dabe tiko ena i tikotiko vakaturaga, "Raica, Au sa cakava vou na veika taucoko." Sa qai cavuta mai vei au, "Vola oqo, na vosa kece oqo e dina ka dodonu."

⁶A sa cavuta vei au, "Sa caka oti! Oi au na Alifa kei na Omeka, na i Vakatekivu ka kena i Vakataotioti. Na vurervure ni wai ni bula, Au na solia walega vei koya sa karamaca dina.

⁷"O koya sa gumatua sara ena taukena na bula oqo. Oi Au, Au na nona Kalou ka na luvequ talega o koya.

⁸"Ia o ira na daurere, kei ira na dau vakatitiqa, kei ira na vakasisila, kei ira na daulaba, kei ira na dauveibutakoci, kei ira na dau qaravi tevoro, kei ira na dau cuva kina matakau, kei ira na daulasulasu, o ira sa vaka oqo, era na bala taucoko kina drano sa caudre kina na bukawaqa kei na sulifure, oqo nai karua ni mate."

⁹Sa qai lako mai vei au e dua vei iratou na agilosi e lewe vitu, ka ratou taura na bilo e vitu sa sinai ena mate ca ena qai muri mai, ka mai tukuna vei au, "Lako mai, me'u vakaraitaka vei iko na goneyalewa me na watina na Lami."

¹⁰Sa qai kauta cake o koya na yaloqu kina dua na ulunivanua levu ka cecere, sa qai vakaraitaka vei au na koro levu o ya, o Jerusalemi tabu, a sa lako sobu mai lomalagi mai vua na Kalou,

¹¹Ka sa vakaserautaka tu na i ukuuku ni Kalou. Na rarama e tu kina sa vaka na veivatu talei, me tautauvata kei na vatu jasipa kei na karisitala dina.

¹²Na kena bai sa bau cecere dina, ka tinikarua na kena matamata, e tini karua na agilosi era duri yadua tu ena matamata, na yaca e volai tiko vei ira, na yacadra na yavusa e tinikarua ni Isireli:

¹³Ena yasa e qara vaka kina tokalau e tolu kina na kena matamata, kina vualiku e tolu na kena matamata, ki na ceva e tolu na kena matamata, kina ra e tolu na kena matamata.

¹⁴Na bai ni koro oqo e yavutaki ena yavu e tinikarua, na yaca e volai tu ena yavu oqo na yacadratou na nona i apositolo na Lami.

¹⁵O koya e vosa tiko vei au, e taura tiko e dua na gasau koula, me na vakarautaka kina na balavu ni koro levu oqo, na kena matamata, kei na kena bai.

¹⁶Na koro oqo na kena balavu kei na kena raraba e rau veiraurau vinaka. Sa qai vakarautaka na loma ni koro ena gasau: ka dua na udolu lima na drau na maile vakarivirivi, na kena balavu na kena raraba, kei na kena cecere.

¹⁷Sa qai vakarautaka o koya na vavaku ni bai, ka ruanadrau tini ka ono na fute vakababa, oqo nai vakarau e kacivaka mai vei au na agilosi, ni vaka na i vakarau kina tamata.

¹⁸Na bai e buli ena vatu jasipa; na koro e koula dina sara, vaka na iloilo makere sese.

¹⁹Na yavu ni bai ni koro e vakaiukuukutaki ena veivatu talei kecega: na yavu e conaki ena jasipa, e qai veitarataravi yani me ra veimuri na vatu safairi, na vatu kalisetoni, na vatu emeralita,

²⁰Na vatu satonikisa, na vatu satiusa,na vatu karisolita, na vatu perili, na vatu topasa, na vatu karisopiraso, na vatu janisi, ka kena i ubi sara i cake me kenai otioti na vatu amecisita, ka kena i katinikarua ni vatu talei.

²¹Na matamata e tinikarua e mata ni civa dina: dua na matamata, dua na mata ni civa. Na koro oqo na kena gaunisala sa koula dina vaka na iloilo makere sese.

²²Ia e sega sara ga ni dua na vale ni lotu me'u bau raica kina, ni o Koya sara ga na Turaga ka Kalou Kaukauwa kei na Lami, sa qaravi sara tu ga ni veirai ena matanavotu.

²³Na koro oqo sa sega ni yaga me cila kina na matanisiga se vula, ni sa serauna tu nai serau ni Kalou na Lami sa kena rarama.

²⁴O ira na lewe ni veimatanitu era sa vakabulai mai, era na lako voli ena kena rarama, na nodra i ukuuku kei na nodra ka dokai na veitui kei vuravura, era na mai tauca kece ena koro oqo.

²⁵Na kena matamata ena dola tu ga ena veisiga (na koro oqo e sega kina na bogi)

²⁶Ena kau mai me biu taucoko ena koro oqo, na i ukuuku kei na ka dokai ni vei matanitu.

²⁷Ia sa dredre sara me curu kina e dua sa dukadukali, se dua sa dau vakasisila se na lasulasu, ia o ira ga sa volai tu na yacadra ena i Vola ni Bula nona na Lami.