[66] Vakatakila 7

¹Ni oti na veika oqori, au raica e lewe va na agilosi ni ratou tucake tu, ena vei tutu vava ni vuravura, ka ratou taura tu na mata ni cagi e va kei vuravura, me kakua kina ni liwa yani e vuravura, ena loma ni wasawasa, se na veivunikau na cagi.

²Au raica tale dua na agilosi ni basika mai vaka kina tokalau, sa tiko mai vua na drega nei Koya na Kalou bula. Sa qai kacivaka yani ena domo levu, vei iratou na agilosi e va; oiratou sa soli tu me ratou vakacacani vuravura, kei na kena waitui.

³Ka vaka, "Dou se kua mada ni tarai vuravura, se na kena waitui, se na kena veikaukau, me yacova ni sa dregati o ira na tamata ni noda Kalou e yadredra."

⁴Na kedra i wiliwili o ira sa dregati. Sa lewe dua na drau ka vasagavulu ka va, o ira oqo sa dregati mai na veiyavusa e Isireli:

⁵Vei ira na yavusa i Vakatakila sa dregati e lewe tinikarua na udolu; Mai na yavusa i Rupeni E tinikarua na udolu sa dregati; Mai na yavusa i Kata E tinikarua na udolu sa dregati;

⁶Mai na yavusa i Aseri E tinikarua na udolu sa dregati; Mai na yavusa i Navitalai E tinikarua na udolu sa dregati; Mai na yavusa i Manasa E tinikarua na udolu sa dregati;

⁷Mai na yavusa i Simione E tinikarua na udolu sa dregati; Mai na yavusa i Livai E tinikarua na udolu sa dregati; Mai na yavusa i Isakari E tinikarua na udolu sa dregati;

⁸Mai na yavusa i Sevuloni E tinikarua na udolu sa dregati; Mai na yavusa i Joseva E tinikarua na udolu sa dregati; Mai na yavusa i Penijamini E tinikarua na udolu sa dregati.

⁹Ni sa oti yani na veika o ya, ka'u rai yani, ka raica, e dua na i wiliwili levu ka sega ni qai wili rawa, mai na veimatanitu, na veimataqali, veimatatamata, na duivosavosa era tucake tu ena mata ni tikotiko vakaturaga ki vua na Lami, era vakaisulu tu ena i ubi balavu vulavula, ka ra taura tu ena ligadra e dua na taba ni niu sawa,

¹⁰Era qai kacivaka tiko ena domo levu, ka vaka, "Sa vuni bula na noda Kalou, o Koya ka dabe tiko ena i tikotiko Tabu kei Koya talega na Lami!"

¹¹O ira na agilosi, o ira na qase, kei na ka bula e va, era tu ena mata ni tikotiko vakaturaga ka ra cuva sobu tiko ena vakarokoroko vua na Kalou,

¹²Era cavuta tiko: "Emeni! Me vakaturagataki kei na dokai kei na vuku, me vakacaucautaki ka me rokovi me Nona na kaukauwa kei na qaqa, vua na noda Kalou me Sega ni mudu Emeni!"

¹³Sa qai tarogi au mai e dua vei ira na qase, "O cei o ira nai lala tamata qo ka ra tokara tu nai ubi vulavula, era a lako mai vei?"

¹⁴Au qai tukuna vua, "Kemuni, sa kila vinaka saka," Sa qai tukuna mai vei au, "O ira oqo era a bula mai ena veivakararawataki levu, ka sa vakasavasavataka na nodra i ubi oqori me vulavula vinaka, na Nona dra na lami.

¹⁵"O koya oqo era tucake tu kina ena mata ni tikotiko ni Kalou, ka qaravi Koya ena Nona vale tabu ena siga kei na bogi. O Koya ka tiko ena i tikotiko vakaturaga ena dau tiko vata kei ira.

¹⁶Era na sega tale ni viakana se viagunu wai; era na sega ni na vakila na kaukauwa ni cila ni siga, se na katakata;

¹⁷"Ena vakani ira tiko na Lami ka tiko ena loma ni tikotiko vakaturaga, ena tuberi ira kina mata ni wai bula ka sa tovure tu ga. Na Kalou vaka i Koya, ena tavoya tani na vei drodro ni wai ni mata mai na matadra kecega."