[38] Sakaraia 4

¹Na agilosi e a vosa vei au, sa lesu tale mai ka vakayadrati au, me vaka e dua na tamata sa vakayadrati mai na nona moce.

²Sa tukuna mai vei au, "Na cava o sa raica?" "Au a vakararai tiko, sa dua nai tutu ni cina koula vinaka sara vata kei na bilo e delana, ena kena i tutu sa vitu na cina ena vitu na paipo ki na veicina.

³"Sa tu ena yasana e rua na vuni olive, dua kina dua na yasana, ena i matau kei na yasana i mawi."

⁴Au sa vosa vua na agilosi sa vosa vei au ka vaka, "Na cava oqo noqu turaga?"

⁵Sa sauma vei au na agilosi ka vaka, "O sa sega ni kila oqo?" Au sa sauma, "E sega, au sa sega ni kila."

⁶Sa tukuna vei au o koya: "Oqo na vosa i Jiova vei Serupepeli: 'Sa sega ena kaukauwa, sa sega ena qaqa, ena Yaloqu ga,' sa tukuna o Jiova ni lewevuqa.

⁷'O cei o iko na ulunivanua, ena matai Serupepeli mo lolovira mai! Ena kauta mai o koya na vatu mei vakadei kei na kena kailavaki kina, na loloma! na loloma!"'"

⁸Sa yaco tale mai vei au na vosa i Jiova ka vaka:

⁹"Na liga i Serupepeli sa vakadavora na yavu ni vale ni soro oqo; ena ligana talega ena vakaoti kina na vale oqo. Dou na qai kila kina, ni sa talai au mai vei kemudou, o Jiova ni lewe vuqa.

¹⁰O cei sa beca na veisiga ni ka lalai oqo? O iratou na matani cina e vitu oqo, e ratou sa reki ni ratou sa raica na paipo mai na liga i Serupepeli. Na cina e vitu oqo sa mata ni Kalou sa veiciciyaki e vuravura taucoko."

¹¹Au a vosa vei koya ka vaka, "Na cava na vuniolive e rua oqoOdua ena yasana i matau ni tutu ni cina ka dua ena i mawi?"

¹²Na cava talega na taba ni olive e rua oqo, "Ka rau sema tiko yani ki na paipo koula ka vakadrodroi tiko yani kina na waiwai koula?"

¹³A sa tarogi au mai o Koya, "O sa sega dina ni kila se sa cava dina oqo?" "Sa sega na noqu turaga, au a sauma yani."

¹⁴Sa qai tukuna mai o koya, "Sai rau oqo nai i lumuti ni Kalou ni vuravura taucoko, sa tu voleka sara vua."