הראשונה אל־הקורינתים 16

¹ועל דבר קבוץ התרומות לעזרת הקדושים כאשר תקנתי לקהלות אשר בגלטיא כן תעשו גם אתם׃

²בכל אחד בשבת יניח אצלו איש איש מכם ויאצר את אשר עלה בידו למען אשר בבאי לא יקבץ עוד׃

³ואני בבאי את אשר תמצאו נאמנים עם אגרות אשלח אתם להביא את נדבתכם לירושלים׃

⁴ואם שוה הטרח שגם אנכי אלך שמה אתי ילכו׃

⁵ואני אבא אליכם אחרי עברי את מקדוניא כי את מקדוניא אעברה׃

⁶ואולי אשב עמכם ימים אחדים או כל ימי הסתו למען תלוני אל אשר אלך שמה׃

⁷כי כעת אין רצוני לראתכם אך בעברי כי אקוה לשבת אצלכם זמן מה אם ירצה יהוה׃

⁸אבל אשב באפסוס עד חג השבועות׃

⁹כי נפתח לי פתח גדול ורב פעלים ורבים המתקוממים׃

¹⁰וכי יבוא אליכם טימותיוס ראו נא שיהיה עמכם בלי פחד כי מלאכת יהוה הוא עשה כמו גם אני׃

¹¹על כן איש אל יבז אתו אך שלחהו בשלום למען יבא אלי כי אחכה לו עם האחים׃

¹²ואפולוס האח הנה פצרתי בו לבוא אליכם עם האחים אך לא היה ברצונו לבוא עתה אמנם בוא יבוא במצאו עת נכונה׃

¹³שקדו ועמדו באמונה התאששו והתחזקו׃

¹⁴וכל דבריכם יעשו באהבה׃

¹⁵ואבקשה מכם אחי הלא ידעתם את בית אסטפנוס שהוא ראשית אכיא ויתנו את נפשם לשרות הקדשים׃

¹⁶לכן הכנעו גם אתם מפני אנשים כאלה ומפני כל אשר יעבד עמהם ויעמלו׃

¹⁷והנני שמח בביאת אסטפנוס ופרטונטוס ואכיקוס כי המה מלאו את אשר חסרתי אתכם׃

¹⁸ויניחו את רוחי ואת רוחכם על כן הכירו אנשים כאלה׃

¹⁹הקהלות אשר באסיא שאלות לשלומכם עקילס ופריסקלא וגם הקהלה אשר בביתם מרבים לשאל לשלומכם באדנינו׃

²⁰האחים כלם שאלים לשלומכם שאלו לשלום איש את רעהו בנשקה הקדושה׃

²¹שאלת שלומכם בידי אני פולוס׃

²²מי שלא יאהב את האדון ישוע המשיח יחרם מרן אתא׃

²³חסד ישוע המשיח אדנינו יהי עמכם׃

²⁴ואהבתי את כלכם במשיח ישוע אמן׃