שמואל א 8

¹ויהי כאשר זקן שמואל וישם את בניו שפטים לישראל׃

²ויהי שם בנו הבכור יואל ושם משנהו אביה שפטים בבאר שבע׃

³ולא הלכו בניו בדרכו ויטו אחרי הבצע ויקחו שחד ויטו משפט׃

⁴ויתקבצו כל זקני ישראל ויבאו אל שמואל הרמתה׃

⁵ויאמרו אליו הנה אתה זקנת ובניך לא הלכו בדרכיך עתה שימה לנו מלך לשפטנו ככל הגוים׃

⁶וירע הדבר בעיני שמואל כאשר אמרו תנה לנו מלך לשפטנו ויתפלל שמואל אל יהוה׃

⁷ויאמר יהוה אל שמואל שמע בקול העם לכל אשר יאמרו אליך כי לא אתך מאסו כי אתי מאסו ממלך עליהם׃

⁸ככל המעשים אשר עשו מיום העלתי אתם ממצרים ועד היום הזה ויעזבני ויעבדו אלהים אחרים כן המה עשים גם לך׃

⁹ועתה שמע בקולם אך כי העד תעיד בהם והגדת להם משפט המלך אשר ימלך עליהם׃

¹⁰ויאמר שמואל את כל דברי יהוה אל העם השאלים מאתו מלך׃

¹¹ויאמר זה יהיה משפט המלך אשר ימלך עליכם את בניכם יקח ושם לו במרכבתו ובפרשיו ורצו לפני מרכבתו׃

¹²ולשום לו שרי אלפים ושרי חמשים ולחרש חרישו ולקצר קצירו ולעשות כלי מלחמתו וכלי רכבו׃

¹³ואת בנותיכם יקח לרקחות ולטבחות ולאפות׃

¹⁴ואת שדותיכם ואת כרמיכם וזיתיכם הטובים יקח ונתן לעבדיו׃

¹⁵וזרעיכם וכרמיכם יעשר ונתן לסריסיו ולעבדיו׃

¹⁶ואת עבדיכם ואת שפחותיכם ואת בחוריכם הטובים ואת חמוריכם יקח ועשה למלאכתו׃

¹⁷צאנכם יעשר ואתם תהיו לו לעבדים׃

¹⁸וזעקתם ביום ההוא מלפני מלככם אשר בחרתם לכם ולא יענה יהוה אתכם ביום ההוא׃

¹⁹וימאנו העם לשמע בקול שמואל ויאמרו לא כי אם מלך יהיה עלינו׃

²⁰והיינו גם אנחנו ככל הגוים ושפטנו מלכנו ויצא לפנינו ונלחם את מלחמתנו׃

²¹וישמע שמואל את כל דברי העם וידברם באזני יהוה׃

²²ויאמר יהוה אל שמואל שמע בקולם והמלכת להם מלך ויאמר שמואל אל אנשי ישראל לכו איש לעירו׃