איוב 41

¹תמשך לויתן בחכה ובחבל תשקיע לשנו׃

²התשים אגמון באפו ובחוח תקוב לחיו׃

³הירבה אליך תחנונים אם ידבר אליך רכות׃

⁴היכרת ברית עמך תקחנו לעבד עולם׃

⁵התשחק בו כצפור ותקשרנו לנערותיך׃

⁶יכרו עליו חברים יחצוהו בין כנענים׃

⁷התמלא בשכות עורו ובצלצל דגים ראשו׃

⁸שים עליו כפך זכר מלחמה אל תוסף׃

⁹הן תחלתו נכזבה הגם אל מראיו יטל׃

¹⁰לא אכזר כי יעורנו ומי הוא לפני יתיצב׃

¹¹מי הקדימני ואשלם תחת כל השמים לי הוא׃

¹²לא אחריש בדיו ודבר גבורות וחין ערכו׃

¹³מי גלה פני לבושו בכפל רסנו מי יבוא׃

¹⁴דלתי פניו מי פתח סביבות שניו אימה׃

¹⁵גאוה אפיקי מגנים סגור חותם צר׃

¹⁶אחד באחד יגשו ורוח לא יבוא ביניהם׃

¹⁷איש באחיהו ידבקו יתלכדו ולא יתפרדו׃

¹⁸עטישתיו תהל אור ועיניו כעפעפי שחר׃

¹⁹מפיו לפידים יהלכו כידודי אש יתמלטו׃

²⁰מנחיריו יצא עשן כדוד נפוח ואגמן׃

²¹נפשו גחלים תלהט ולהב מפיו יצא׃

²²בצוארו ילין עז ולפניו תדוץ דאבה׃

²³מפלי בשרו דבקו יצוק עליו בל ימוט׃

²⁴לבו יצוק כמו אבן ויצוק כפלח תחתית׃

²⁵משתו יגורו אלים משברים יתחטאו׃

²⁶משיגהו חרב בלי תקום חנית מסע ושריה׃

²⁷יחשב לתבן ברזל לעץ רקבון נחושה׃

²⁸לא יבריחנו בן קשת לקש נהפכו לו אבני קלע׃

²⁹כקש נחשבו תותח וישחק לרעש כידון׃

³⁰תחתיו חדודי חרש ירפד חרוץ עלי טיט׃

³¹ירתיח כסיר מצולה ים ישים כמרקחה׃

³²אחריו יאיר נתיב יחשב תהום לשיבה׃

³³אין על עפר משלו העשו לבלי חת׃

³⁴את כל גבה יראה הוא מלך על כל בני שחץ׃