יוחנן 15

¹אנכי הגפן האמתית ואבי הוא הכרם׃

²כל שריג בי אשר איננו עשה פרי יסירנו ואשר יעשה פרי יטהרנו להרבות את פריו׃

³אתם כעת מטהרים בעבור דברי אשר דברתי אליכם׃

⁴עמדו בי ואני בכם כאשר השריג בל יעשה פרי מאליו אם לא יעמד בגפן כן גם אתם אם לא תעמדו בי׃

⁵אנכי הוא הגפן ואתם השריגים העמד בי ואני בו הוא יעשה פרי לרב כי בלעדי לא תוכלון עשות מאומה׃

⁶איש אשר לא יעמד בי השלך כשריג החוצה וייבש וילקטום וישליכום אל תוך האש והיה לבער׃

⁷והיה אם תעמדו בי ודברי יהיו בכם ככל חפצכם תשאלו ויעשה לכם׃

⁸בזאת נכבד אבי בעשותכם פרי לרב והייתם לי לתלמידים׃

⁹כאשר אהבני אבי אהבתי אתכם גם אני ואתם עמדו באהבתי׃

¹⁰אם תשמרו את מצותי תעמדו באהבתי כאשר שמרתי גם אני את מצות אבי ועמדתי באהבתו׃

¹¹את אלה דברתי אליכם בעבור תהיה שמחתי בכם ותמלא שמחתכם׃

¹²הנה זאת מצותי כי תאהבון איש את אחיו כאשר אהבתיכם׃

¹³אין לאיש אהבה יתרה מתתו את נפשו בעד ידידיו׃

¹⁴ואתם ידידי אתם אם תעשו את אשר אני מצוה אתכם׃

¹⁵לא אקרא לכם עוד עבדים כי העבד איננו ידע את אשר יעשה אדניו כי אם אמרתי ידידי אתם כי כל אשר שמעתי מאת אבי הודעתי אתכם׃

¹⁶לא אתם בחרתם בי כי אם אנכי בחרתי בכם והפקדתי אתכם ללכת ולעשות פרי ופריכם יקום והיה כל אשר תשאלו מאבי בשמי יתן לכם׃

¹⁷את אלה אני מצוה אתכם למען תאהבון איש את אחיו׃

¹⁸אם העולם שנא אתכם דעו כי אתי שנא ראשונה׃

¹⁹אלו מן העולם הייתם כי אז אהב העולם את אשר לו ויען כי אינכם מן העולם כי אם בחרתי אתכם מתוך העולם לכן העולם ישנא אתכם׃

²⁰זכרו את דברי אשר דברתי אליכם העבד איננו גדול מאדניו אם רדפו אתי גם אתכם ירדפו אם שמרו את דברי גם את דברכם ישמרו׃

²¹אבל כל זאת יעשו לכם בעבור שמי כי לא ידעו את שלחי׃

²²לולא באתי ודברתי אליהם לא היה בהם חטא ועתה לא יוכלון להתנצל על חטאתם׃

²³השנא אתי ישנא גם את אבי׃

²⁴לולא עשיתי בתוכם את המעשים אשר איש זולתי לא עשה לא היה בהם חטא ועתה ראו וישנאו גם אתי גם את אבי׃

²⁵אך למלאת דבר הכתוב בתורתם שנאת חנם שנאוני׃

²⁶ובבוא הפרקליט אשר אשלחנו לכם מאת אבי רוח האמת היוצא מאת אבי הוא יעיד עלי׃

²⁷וגם אתם תעידו כי מראש הייתם עמדי׃