ՍԱՂՄՈՍ 108

¹Իմ սիրտս պատրաստ է, ո՛վ Աստուած. սիրտս պատրաստ է։ Պիտի երգեմ ու սաղմոս ըսեմ իմ փառքովս։

²Արթնցէ՛ք, ո՛վ տաւիղ ու քնար։ Ես կանուխ պիտի արթննամ։

³Ո՛վ Տէր, ժողովուրդներուն մէջ քեզ պիտի գովեմ Ու սաղմոս պիտի երգեմ քեզի ազգերուն մէջ։

⁴Վասն զի քու ողորմո��թիւնդ մեծ է ու երկնքէն վեր Եւ քու ճշմարտութիւնդ՝ մինչեւ ամպերը։

⁵Երկնքի վրայ բարձրացիր, ո՛վ Աստուած Ու քու փառքդ բոլոր երկրի վրայ թող ըլլայ։

⁶Որպէս զի քու սիրելիներդ փրկուին։ Աջ ձեռքովդ ապրեցուր ու պատասխան տուր ինծի։

⁷Աստուած իր սրբութիւնովը՝ ՝ խօսեցաւ. «Ես ցնծութեամբ Սիւքէմը պիտի բաժնեմ Ու Սոկքովթի հովիտը պիտի չափեմ։

⁸Իմս է Գաղաադը ու իմս է Մանասէն Եւ Եփրեմը գլխուս զօրութիւնն է։ Յուդան իմ օրէնսդիրս է.

⁹Մովաբը իմ լուացուելու ամանս է։ Եդովմին վրայ պիտի ձգեմ իմ մուճակս. Փղշտացիներուն դէմ ցնծութեամբ պիտի աղաղակեմ»։

¹⁰Ո՞վ պիտի տանի զիս պարսպապատ քաղաքը. Ո՞վ պիտի առաջնորդէ ինծի մինչեւ Եդովմ։

¹¹Չէ՞ որ դո՛ւն, ո՛վ Աստուած, որ երեսէ ձգեցիր մեզ Ու մեր գործերուն հետ չելար, ո՛վ Աստուած։

¹²Նեղութեան մէջ մեզի օգնէ, Վասն զի փուճ է մարդուն օգնութիւնը։

¹³Աստուծմով քաջութիւն պիտի ունենանք։ Ան պիտի ոտնակոխէ մեր թշնամիները։