ՍԱՂՄՈՍ 25

¹Ո՛վ Տէր, իմ անձս քեզի վերցուցի։

²Ո՛վ իմ Աստուածս, քեզի յուսացի. թող չամչնամ Ու թշնամիներս իմ վրաս չցնծան։

³Բոլոր քեզի սպասողները թող չամչնան. Ունայնութեամբ անօրէնութիւն ընողները թող ամչնան։

⁴Ո՛վ Տէր, քու ճամբաներդ ցուցուր ինծի, Քու շաւիղներդ սորվեցուր ինծի։

⁵Քու ճշմարտութեանդ մէջ ինծի առաջնորդէ ու սորվեցուր ինծի, Քանզի դո՛ւն ես իմ փրկութեանս Աստուածը։ Ես քեզի կը սպասեմ ամէն օր։

⁶Ո՛վ Տէր, քու գթութիւններդ ու ողորմութիւններդ յիշէ, Վասն զի յաւիտենական են։

⁷Մանկութեան մեղքերս ու յանցանքներս մի՛ յիշեր, Հապա քու ողորմութիւնովդ զիս յիշէ՝ Քու բարութեանդ համար, ո՛վ Տէր։

⁸Տէրը բարի եւ ուղիղ է. Անոր համար մեղաւորներուն կը սորվեցնէ ճամբան։

⁹Դատաստանի մէջ պիտի առաջնորդէ հեզերուն Ու իր ճամբան հեզերուն պիտի սորվեցնէ։

¹⁰Տէրոջը բոլոր ճամբաները ողորմութիւն ու ճշմարտութիւն են՝ Իր ուխտը ու վկայութիւնները պահողներուն։

¹¹Ո՛վ Տէր, քու անուանդ համար Ներէ իմ անօրէնութիւնս, վասն զի մեծ է։

¹²Ո՞վ է այն մարդը որ Տէրոջմէն կը վախնայ։ Ահա անոր պիտի սորվեցնէ իր ընտրած ճամբան։

¹³Անոր անձը բարութեան մէջ պիտի բնակի Ու անոր սերունդը երկիրը պիտի ժառանգէ։

¹⁴Տէրոջը բարեկամութիւնը իրմէ վախցողներուն հետ է Ու իր ուխտը անոնց կը սորվեցնէ։

¹⁵Իմ աչքերս ամէն ատեն Տէրոջը կը նային, Վասն զի ան պիտի հանէ իմ ոտքերս որոգայթէն։

¹⁶Ինծի դարձիր ու ողորմէ ինծի, Վասն զի մինակ ու վշտացած եմ։

¹⁷Սրտիս նեղութիւնները շատցան. Իմ վիշտերէս զիս դուրս հանէ։

¹⁸Իմ նեղութեանս ու տառապանքիս նայէ Ու բոլոր մեղքերս ներէ։

¹⁹Տե՛ս իմ թշնամիներս, վասն զի շատցան Ու սաստիկ ատելութիւնով զիս ատեցին։

²⁰Պահէ՛ իմ անձս ու փրկէ՛ զիս. Թող չամչնամ, վասն զի քեզի յուսացի։

²¹Կատարելութիւնը եւ ուղղութիւնը զիս թող պահեն, Վասն զի քեզի սպասեցի։

²²Ո՛վ Աստուած, փրկէ Իսրայէլը Իր ամէն նեղութիւններէն։