ՍԱՂՄՈՍ 9

¹Գոհութիւն պիտի մատուցանեմ Տէրոջը իմ բոլոր սրտովս. Քու բոլոր սքանչելիքներդ պիտի պատմեմ։

²Քեզմով ուրախ պիտի ըլլամ ու ցնծամ. Քու անուանդ սաղմոս պիտի երգեմ, ո՛վ Բարձրեալ։

³Թշնամիներս ետ դառնալու ատեննին Քու երեսէդ պիտի իյնան ու կորսուին.

⁴Վասն զի դատաստանս եւ իրաւունքս դուն տեսար. Աթոռին վրայ նստար իբրեւ արդարութեան դատաւոր։

⁵Հեթանոսները յանդիմանեցիր, Ամբարիշտը կորսնցուցիր, Անոնց անունները ջնջեցիր յաւիտեանս յաւիտենից։

⁶Թշնամիին աւերմունքները բոլորովին վերջացան. Քաղաքները աւերեցիր. Անոնց յիշատակը իրենց հետ կորսուեցաւ։

⁷Բայց Տէրը յաւիտեան պիտի մնայ. Անիկա իր աթոռը պատրաստեց դատաստանի համար։

⁸Ինք պիտի դատէ աշխարհը արդարութիւնով, Ժողովուրդներուն դատաստան պիտի ընէ ուղղութիւնով։

⁹Տնանկին ալ ապաւէն պիտի ըլլայ Տէրը, Ապաւէն՝ նեղութեան ժամանակները։

¹⁰Անոնք որ քու անունդ գիտեն՝ քեզի պիտի յուսան. Վասն զի քեզ փնտռողները, ո՛վ Տէր, երեսէ չձգեցիր։

¹¹Սաղմո՛ս երգեցէք Տէրոջը, որ Սիօն կը բնակի, Ժողովուրդներուն մէջ պատմեցէ՛ք անոր ըրածները։

¹²Վասն զի արեան վրէժխնդիրը յիշեց զանոնք, Չմոռցաւ նեղեալներուն աղաղակը։

¹³Ո՛վ Տէր, ողորմէ՛ ինծի, Տե՛ս իմ թշնամիներէս կրած նեղութիւնս, Դուն որ զիս մահուան դռներէն կը վերցնես.

¹⁴Որպէս զի քու բոլոր օրհնութիւններդ պատմեմ Սիօնի աղջկան դռներուն մէջ. Պիտի ցնծամ քու փրկութիւնովդ։

¹⁵Հեթանոսները իրենց շինած փոսին մէջ ընկղմեցան. Իրենց գաղտուկ լարած որոգայթին մէջ իրենց ոտքը բռնուեցաւ։

¹⁶Տէրը ճանչցուած է, վասն զի դատաստան ըրաւ. Ամբարիշտը իր ձեռքին գործերովը որոգայթը կ’իյնայ։ (Հիկկայօն Սէլա։)

¹⁷Ամբարիշտները դժոխքը պիտի դառնան Եւ այն բոլոր ազգերը, որոնք Աստուած կը մոռնան։

¹⁸Քանզի աղքատը պիտի չմոռցուի մինչեւ վերջը. Տնանկներուն յոյսը յաւիտեան պիտի չկորսուի։

¹⁹Ելի՛ր, ո՛վ Տէր, մարդը թող չզօրանայ. Թող հեթանոսները դատուին քու առջեւդ.

²⁰Ո՛վ Տէր, զանոնք վախցուր՝ ՝. Թող հեթանոսները գիտնան թէ իրենք մարդ են։ (Սէլա։)