ՍԱՂՄՈՍ 92

¹Բարի է գոհանալ Տէրոջմէն Ու սաղմոս ըսել քու անուանդ, ո՛վ Բարձրեալ,

²Առտուները՝ քու ողորմութիւնդ Ու գիշերները քու հաւատարմութիւնդ պատմել

³Տասը լար ունեցող նուագարանով ու տաւիղով Եւ քնարի ձայնով։

⁴Վասն զի դուն, ո՛վ Տէր, քու գործովդ զիս ուրախացուցիր. Քու ձեռքերուդ գործերովը պիտի ցնծամ։

⁵Ո՛վ Տէր, որքա՜ն մեծ են քու գործերդ, Շատ խորունկ են քու խորհուրդներդ։

⁶Անմիտ մարդը ասիկա չ’իմանար Ու յիմարը չի հասկնար։

⁷Թէ՝ ամբարիշտներուն խոտի պէս բուսնիլը Ու բոլոր անօրէնութիւն գործողներուն ծաղկիլը Իրենց յաւիտենական կորուստին կը տանին։

⁸Բայց դուն, ո՛վ Տէր, յաւիտեան բարձր ես։

⁹Վասն զի ահա քու թշնամիներդ, ո՛վ Տէր, Վասն զի ահա քու թշնամիներդ պիտի կորսուին, Բոլոր անօրէնութիւն գործողները պիտի ցրուին,

¹⁰Բայց իմ եղջիւրս միեղջերուին եղջիւրին պէս պիտի բարձրացնես։ Եւ նոր իւղով օծուեցայ

¹¹Եւ իմ աչքերս թշնամիներուս կորուստը տեսան, Իմ ականջներս ինծի դէմ ելնող չարագործներուն կրած պատիժը լսեցին։

¹²Արդարը արմաւենիի պէս պիտի ծաղկի, Լիբանանի եղեւինի պէս պիտի մեծնայ։

¹³Տէրոջը տանը մէջ տնկուածները Մեր Աստուծոյն սրահներուն մէջ պիտի ծաղկին,

¹⁴Ծերութեան ատեն ալ պտուղ պիտի տան, Պարարտ ու կանանչ պիտի մնան,

¹⁵Որպէս զի պատմեն թէ Տէրը ուղիղ է։ Անիկա իմ Վէմս է ու անիրաւութիւն չկայ անոր քով։