Sálmarnir 108

¹Hjarta mitt er stöðugt, ó Guð, ég vil syngja og leika, vakna þú, sála mín!

²(108:3) Vakna þú, harpa og gígja, ég vil vekja morgunroðann.

³(108:4) Ég vil lofa þig meðal lýðanna, Drottinn, vegsama þig meðal þjóðanna,

⁴(108:5) því að miskunn þín er himnum hærri, og trúfesti þín nær til skýjanna.

⁵(108:6) Sýn þig himnum hærri, ó Guð, og dýrð þín breiðist yfir gjörvalla jörðina,

⁶(108:7) til þess að ástvinir þínir megi frelsast. Hjálpa þú með hægri hendi þinni og bænheyr mig.

⁷(108:8) Guð hefir sagt í helgidómi sínum: "Ég vil fagna, ég vil skipta Síkem, mæla út Súkkót-dal.

⁸(108:9) Ég á Gíleað, ég á Manasse, og Efraím er hlíf höfði mínu, Júda veldissproti minn.

⁹(108:10) Móab er mundlaug mín, í Edóm fleygi ég skónum mínum, yfir Filisteu fagna ég."

¹⁰(108:11) Hver vill fara með mig í örugga borg, hver vill flytja mig til Edóm?

¹¹(108:12) Þú hefir útskúfað oss, ó Guð, og þú, Guð, fer eigi út með hersveitum vorum.

¹²(108:13) Veit oss lið gegn fjandmönnunum, því að mannahjálp er ónýt.

¹³(108:14) Með Guðs hjálp munum vér hreystiverk vinna, og hann mun troða óvini vora fótum.