Sálmarnir 34

¹Ég vil vegsama Drottin alla tíma, ætíð sé lof hans mér í munni.

²(34:3) Sál mín hrósar sér af Drottni, hinir hógværu skulu heyra það og fagna.

³(34:4) Miklið Drottin ásamt mér, tignum í sameiningu nafn hans.

⁴(34:5) Ég leitaði Drottins, og hann svaraði mér, frelsaði mig frá öllu því er ég hræddist.

⁵(34:6) Lítið til hans og gleðjist, og andlit yðar skulu eigi blygðast.

⁶(34:7) Hér er volaður maður sem hrópaði, og Drottinn heyrði hann og hjálpaði honum úr öllum nauðum hans.

⁷(34:8) Engill Drottins setur vörð kringum þá er óttast hann, og frelsar þá.

⁸(34:9) Finnið og sjáið, að Drottinn er góður, sæll er sá maður er leitar hælis hjá honum.

⁹(34:10) Óttist Drottin, þér hans heilögu, því að þeir er óttast hann líða engan skort.

¹⁰(34:11) Ung ljón eiga við skort að búa og svelta, en þeir er leita Drottins fara einskis góðs á mis.

¹¹(34:12) Komið, börn, hlýðið á mig, ég vil kenna yður ótta Drottins.

¹²(34:13) Ef einhver óskar lífs, þráir lífdaga til þess að njóta hamingjunnar,

¹³(34:14) þá varðveit tungu þína frá illu og varir þínar frá svikatali,

¹⁴(34:15) forðast illt og gjörðu gott, leita friðar og legg stund á hann.

¹⁵(34:16) Augu Drottins hvíla á réttlátum, og eyru hans gefa gaum að hrópi þeirra.

¹⁶(34:17) Auglit Drottins horfir á þá er illa breyta, til þess að afmá minningu þeirra af jörðunni.

¹⁷(34:18) Ef réttlátir hrópa, þá heyrir Drottinn, úr öllum nauðum þeirra frelsar hann þá.

¹⁸(34:19) Drottinn er nálægur þeim er hafa sundurmarið hjarta, þeim er hafa sundurkraminn anda, hjálpar hann.

¹⁹(34:20) Margar eru raunir réttláts manns, en Drottinn frelsar hann úr þeim öllum.

²⁰(34:21) Hann gætir allra beina hans, ekki eitt af þeim skal brotið.

²¹(34:22) Ógæfa drepur óguðlegan mann, þeir er hata hinn réttláta, skulu sekir dæmdir.

²²(34:23) Drottinn frelsar líf þjóna sinna, enginn sá er leitar hælis hjá honum, mun sekur dæmdur.