Sálmarnir 36

¹Rödd syndarinnar talar til hins guðlausa í fylgsnum hjarta hans, enginn guðsótti býr í huga hans.

²(36:3) Hún smjaðrar fyrir honum í augum hans og misgjörð hans verður uppvís og hann verður fyrir hatri.

³(36:4) Orðin af munni hans eru tál og svik, hann er hættur að vera hygginn og breyta vel.

⁴(36:5) Í hvílu sinni hyggur hann á tál, hann fetar vonda vegu, forðast eigi hið illa.

⁵(36:6) Drottinn, til himna nær miskunn þín, til skýjanna trúfesti þín.

⁶(36:7) Réttlæti þitt er sem fjöll Guðs, dómar þínir sem reginhaf. Mönnum og skepnum hjálpar þú, Drottinn.

⁷(36:8) Hversu dýrmæt er miskunn þín, ó Guð, mannanna börn leita hælis í skugga vængja þinna.

⁸(36:9) Þau seðjast af feiti húss þíns, og þú lætur þau drekka úr lækjum unaðsemda þinna.

⁹(36:10) Hjá þér er uppspretta lífsins, í þínu ljósi sjáum vér ljós.

¹⁰(36:11) Lát miskunn þína haldast við þá er þekkja þig, og réttlæti þitt við þá sem hjartahreinir eru.

¹¹(36:12) Lát eigi fót hins hrokafulla troða á mér né hönd óguðlegra hrekja mig burt.

¹²(36:13) Þar eru illgjörðamennirnir fallnir, þeim er varpað um koll og þeir fá eigi risið upp aftur.