Ефестіктерге 5

¹Сонымен сүйікті рухани баласы ретінде Құдайдан үлгі алыңдар!

²Мәсіхтің бізді сүйіп, біз үшін Өзін құрбан еткеніндей, сендер де бір-біріңді сүйіп өмір сүріңдер! Оның өз жанын қиғаны Құдайға ұнамды, хош иісті құрбандық іспетті болды.

³Араларыңда неке адалдығын бұзу, әр қилы азғындық пен ашкөздіктің тіпті аттары да аталмасын. Құдайға бағышталған адамдарға бұлардан аулақ жүру лайық.

⁴Сендерге әдепсіздік жасау, ақымақ сөз бен тұрпайы қалжың айту емес, шүкірлік ету жарасымды.

⁵Мынаны біліп қойыңдар: неке адалдығын бұзатындар, ұятсыздар және ашкөз адамдар — жалған тәңірлерге табынушылар. Мұндайлардың ешқайсысына да Мәсіхтің және Құдайдың Патшалығында орын жоқ.

⁶Ешкім де сендерді өтірік сөздерімен алдамасын! Себебі Құдайға мойынсұнбайтындарға осы күнәлары үшін Оның қаһарлы соты төніп тұр.

⁷Сондықтан олардың іс-әрекеттеріне сыбайлас болмаңдар!

⁸Бұрын сендер түнек болдыңдар, ал енді Иемізбен байланысып, «нұрсыңдар»: ендеше «нұрдың адамдары» болып әрекет етіңдер!

⁹Ал нұрдағы өмірдің өнімі — нағыз игілік, әділдік, шындық.

¹⁰Құдай Иеге не ұнайтынын біліп алып,

¹¹түнектегі адамдардың бекер істеріне араласпаңдар, қайта, оларды әшкерелеңдер!

¹²Мұндайлардың жасырын істейтіндерін айтудың өзі ұят.

¹³Ал түнекке нұр шашылса, ондағының бәрі анық көрінеді. Бар нәрсені әшкерелейтін — нұр.

¹⁴Сондықтан да былай деп айтылады: «Оян, ей, ұйқышыл, Рухани өлімнен тіріл! Мәсіх саған төгеді нұр».

¹⁵Сонымен парасатсыз емес, ақыл-парасатты өмір сүруге ерекше ден қойыңдар:

¹⁶жақсылық жасауға әр мүмкіндікті пайдаланыңдар, себебі қазіргі күндер зұлымдыққа толы.

¹⁷Сондықтан ақымақ болмай, Құдай Иенің еркін біліп алыңдар.

¹⁸Арақ-шарап ішіп, мас болмаңдар, бұл жүгенсіздікке апарады! Қайта, Киелі Рухқа кенеле беріңдер!

¹⁹Бір-біріңді Забур жырлары, мадақтау өлеңдері және Киелі Рух дарытқан әндер арқылы жігерлендіріп, Иемізді ән-күймен шын жүректен дәріптеңдер.

²⁰Иеміз Иса Мәсіхтің атымен Құдай Әкеге қай нәрсе үшін де ұдайы шүкірлік етіңдер!

²¹Сендер Мәсіхті қастерлейтіндіктен, бір-біріңе мойынсұныңдар!

²²Әйелдер, Иемізге мойынсұнғандай, күйеулеріңе де мойынсұныңдар;

²³өйткені Мәсіхтің сенушілер қауымының Басы болғаны сияқты, еркек — әйелдің «басы». Мәсіх сенушілерді құтқарып алды, енді қауым — Оның рухани денесі.

²⁴Қауымның Мәсіхке мойынсұнғанындай, әйелдер де барлық істе күйеулеріне мойынсұнуға тиіс.

²⁵Күйеулер, Мәсіх қауымды қалай сүйсе, сендер де әйелдеріңді солай сүйіңдер: Мәсіх қауым үшін жанын қиды!

²⁶Оны Құдай сөзімен тазартып, қайта туғызып, қасиетті қылды.

²⁷Сонымен қауым күйеуіне апарылған қалыңдықтай салтанатты да сұлу, ешбір дақсыз, ақаусыз, басқа да кемшіліксіз, қасиетті де пәк таза болсын.

²⁸Дәл осылай жұбайларын өз тәніндей жақсы көру — күйеулердің міндеті. Әйелін сүйген өзін де сүйеді.

²⁹Ешкім де өз тәнін жек көрмейді, қайта, оған нәр беріп, баптап күтеді, Иеміз де қауымды солай қамқорлайды.

³⁰Біздер Оның рухани денесінің мүшелеріміз.

³¹«Сондықтан еркек әке-шешесін тастап, әйеліне қосылады, сөйтіп екеуі біртұтас болады», — деп (Тауратта) жазылған.

³²Осында терең сыр бар, мен мұны Мәсіхке және қауымға байланысты айтамын.

³³Бірақ ол сендерге де қатысты: әрқайсың әйеліңді өзіңдей сүюге тиістісің, ал әр әйел күйеуін құрметтеуге міндетті.