Әйүп 12

¹Сонда Әйүп жауап беріп былай деді:

²— Шынымен де нағыз данышпансыңдар-ау! Сендер өлгенде даналық атаулы қалмас, сірә?

³Бірақ менде де өздеріңдікіндей ақыл-сана бар, сендерден кем емеспін. Осы айтқан нәрселеріңді кім білмейді?

⁴Мен достарымның мазағына айналдым. Құдайға сиынатынмын және Ол маған жауап беретін. Әділ де кінәратсыз болып келемін, әйтсе де күлкіге қалып отырмын.

⁵Тоқмейілсігендер бақытсыздыққа ұшырағандарға немқұрайды қарап, аяқтары тайғандарын тіпті итеріп те жібереді.

⁶Халықты құртушылардың мекенінде әлі де тыныштық. Олар Құдайды қаһарландырып келеді, бірақ Ол соларды Өзінің құдіретті қолында ұстайды.

⁷Тек хайуандардан сұрап көр, олар саған үйретеді. Әуедегі құстардан сұра, олар саған айтып береді.

⁸Немесе жерден сұра, ол да саған көрсетеді. Теңіздегі балықтар да саған білдіреді.

⁹Осылардың қайсысы Жаратқан Иенің бәрін Өзінің құдіретті қолымен жаратқанын білмейді екен?

¹⁰Әрбір тірі мақұлықтың жаны да, әр адам баласының тіршілік лебі де Жаратқан Иенің қолында.

¹¹Адам тамақтың ащы-тұщылығын тілімен ажыратқандай, сөздерді құлағымен сараламай ма?

¹²«Даналық қарияларда, парасат көп жасағандарда» дейді.

¹³Ал нағыз даналық пен құдірет тек Құдайда, дана ақыл-кеңес пен парасат та Оның Өзінде.

¹⁴Құдай құлатса, ешкім қайта тұрғыза алмайды. Ол тұтқындаса, ешкім босата алмайды.

¹⁵Егер Тәңір жаңбыр жібермей қойса, жер беті құрғап, қуаңшылық жайлайды, ал егер еркіне қоя берсе, бүкіл жерді су басады.

¹⁶Күш-қуат пен жеңіс те Оның қолында, алданған да, алдаушы да Оның көз алдында.

¹⁷Құдай кеңесшілерді ақылынан айырады, билерді де ақымаққа айналдырады.

¹⁸Ол патшалардың сәнді белдігін босатады, белдеріне құл іспетті мата байлатады.

¹⁹Тәңір жауға діни қызметкерлерді жалаң аяқ айдатып әкеткізеді, билік иелерінің астан-кестенін шығарады.

²⁰Ол сенімге ие болған ақылшыларды тілден айырады, ақсақалдарды парасаттан ада қылады.

²¹Ол атақтыларды қор қылады, мықтыларды қаруынан айырады.

²²Құдай қараңғыда жасырынған ой-ниеттерді ашады, қара түнекті жарыққа шығарады.

²³Ол халықтарды ұлы қылып, кейін құртады, олардың жерін кеңейтіп, кейін адамдарын ыдыратып жібереді.

²⁴Тәңір елдің басшыларын ақылдан жұрдай қылады, жолсыз құла түзді кездіріп қояды.

²⁵Олар жарығы жоқ түнекте сипалап жүреді. Тәңір оларды мас адамдай теңселтіп қояды.