Әйүп 28

¹Адам баласы күмісті кеннен шығарады, Алтынды арнайы орында тазартады,

²Темірді топырақтан қазып алады, Мысты да кеннен балқытып айырады.

³Кеншілер түнекті жарықтандырады, Қараңғыда тіпті ең алыстағы Кенді де іздеп тауып алады.

⁴Ұсталар шалғай, адам аяғы Баспайтын жерлерде құдық қазады, Төменге түскенде арқанға асылады, Содан олай-бұлай тербеліп тұрады.

⁵Жер бетінде астық өсіп-өнеді, Жер астын лаулаған от өзгертеді,

⁶Тастарынан көк асыл тас табылады, Топырағынан алтын алынады.

⁷Жыртқыш құс білмейді осы жолдарды, Сұңқардың көзі көрмейді оларды,

⁸Маңғаз аңдар соларды басқан емес, Арыстан да үстімен өткен емес.

⁹Пенде қатты тастарды да сындырады, Тауларды тамырымен қопарады,

¹⁰Жартастарда үңгір шауып қазады, Әр түрлі құнды заттарды көзі шалады,

¹¹Өзен бастауларын іздеп табады, Тығылған заттарды жарыққа шығарады.

¹²Ал даналықты қайдан табуға болады? Шынайы парасат қай жерде тұрады?

¹³Оның құнын пенде жете ұқпайды, Бұ дүниеден оны таба алмайды.

¹⁴Терең тұңғиық: «Ол менде емес!» дейді, Теңіз де: «Менде ол жоқ!» деп мәлімдейді.

¹⁵Саф алтынға оны сатып ала алмайсың, Құнын күміспен төлей де алмайсың.

¹⁶Не Опырдан әкелінген алтынменен, Не оникс тас, не көк асыл таспенен Оның бағасын айқындай алмайсың сен.

¹⁷Даналықты алтын, гауһармен салыстырмас, Саф алтын бұйымға оны сатып ала алмас.

¹⁸Інжу-маржанды ескермей-ақ қойса болады, Даналық лағыл тастардан да тым бағалы!

¹⁹Құштық топазды даналықпен салыстырмайды, Саф алтынмен оны айырбастамайды.

²⁰Сонда даналық қайдан келеді екен? Парасаттың мекені қайда екен?

²¹Ол тірі жандының бәрінен жасырынған, Құстардың назарынан да тыс қалған.

²²О дүние мен өлім былай дер ол жайлы: «Тек сыбыс қана естідік сол туралы».

²³Тек Құдай біледі даналыққа барар жолды, Оған ғана белгілі соның тұрағы.

²⁴Өйткені Құдай жердің шеттеріне қарайды, Аспан астындағының бәрін де Ол байқайды.

²⁵Құдай желдің қуатын белгіледі, Бүкіл судың мөлшерін де өлшеді,

²⁶Құдай жаңбырға жаусын деп бұйрық берді, Найзағай мен күн күркіреу жолын белгіледі,

²⁷Сол кезде Ол даналыққа қарап, баға берді, Тиісті орнын бекітіп, оны тексерді.

²⁸Құдай адамға былай деді: «Даналық — Жаратқан Иені терең қастерлеу Және нағыз ақыл-парасаттылық — Зұлымдық атаулыдан алшақ кету».