Ешуа 19

¹Екінші жеребе әулеттері бойынша Шимон руына түсті. Бұл руға үлестірілген мұралық жер Яһуда руының жерінің ішінде жататын болды.

²Шимон руына мына қалалар тиді: Бер-Шеба, яки Шеба, Молада,

³Хасар-Шуал, Балах, Әсем,

⁴Елтолад, Бетул, Хорма,

⁵Сикеләг, Бет-Марқабот, Хасар-Суса,

⁶Бет-Лебағот, Шарухен — он үш қала әрі оларға қарасты елді мекендер,

⁷Аин, Риммон, Етер, Ашан — төрт қала әрі оларға қарасты елді мекендер.

⁸Бұларға қоса олардың айналаларындағы Бағалат-Берге, яғни Негевтегі Рамаққа, дейінгі жердегі барлық елді мекендер де берілді. Әулеттері бойынша Шимон руына берілген мұралық жер, міне, осы.

⁹Шимон руына мұралық жер Яһуда руының үлесінен берілді, себебі Яһуданың үлесі өздері үшін тым үлкен болатын. Сондықтан Шимонның ұрпақтарына мұралық жер Яһуданың үлесінің ішінен берілді.

¹⁰Үшінші жеребе әулеттері бойынша Забулон руына түсті. Оларға тиген жердің шекарасы Сарыдқа дейін созылып,

¹¹содан батысқа қарай көтеріліп, Маралаға, содан Дабешетке, одан соң Жоқнеамның қасындағы жылғаға дейін жетеді.

¹²Шекара Сарыдтан шығысқа бағыт алып, Қислот-Табордың жеріне дейін барады да, Дабератқа дейін ұласып, одан Япияға дейін көтеріледі.

¹³Сол жерден шекара шығысқа қарай Ғат-Хефер мен Ита-Қасынға кесіп өтіп, Риммонға жетіп, Неяға қарай бұрылады.

¹⁴Содан соң ол солтүстікте Ханатонға қарай айналып, Ифтах-Ел аңғарына келіп тіреледі.

¹⁵Забулонның жері бұдан басқа Қаттат, Нахалал, Шимрон, Идала және Бетлехемді де — барлығы он екі қаланы әрі оларға қарасты елді мекендерді қамтиды.

¹⁶Сонымен әулеттері бойынша Забулон руының үлесіне тиген мұралық жер, ондағы қалалар мен оларға қарасты елді мекендер, міне, осылар.

¹⁷Төртінші жеребе әулеттері бойынша Исашар руына салынды.

¹⁸Оларға тиісті жер Ізрел, Кесулот, Шунем,

¹⁹Хафараим, Шион, Анахарат,

²⁰Раббит, Қишион, Әбес,

²¹Ремет, Ен-Ғанним, Ен-Хадда және Бет-Пәсесті қамтиды.

²²Шекара Табор, Шахасима және Бет-Шәміштің шегімен жанасып, Иордан өзеніне барып тіреледі. Осы жердің аумағына барлығы он алты қала әрі оларға қарасты елді мекендер кіреді.

²³Сонымен әулеттері бойынша Исашар руының үлесіне тиген мұралық жер, ондағы қалалар әрі оларға қарасты елді мекендер, міне, осылар.

²⁴Бесінші жеребе әулеттері бойынша Ашир руына түсті.

²⁵Оның жеріне Хелқат, Хали, Бетен, Ахшап,

²⁶Аламәлік, Амад, Мишал кіреді. Батыс шекарасы Қармил тауы мен Шихор-Либнатпен жанасып,

²⁷содан шығысқа қарай бұрылып Бет-Дагонға дейін жетеді де, Забулонның жерімен солтүстікте орналасқан Ифтах-Ел аңғарында шектесіп, Бет-Емек пен Нейелмен де жанасады. Бұдан кейін шекара Қабулдың сол жағымен өтіп,

²⁸Еброн, Рехоб, Хаммон, Қанахқа және үлкен Сидон қаласына қарай жалғаса береді.

²⁹Содан соң шекара Рамаққа қарай кері бұрылып, бекіністі Тир қаласына жетіп, Хосаға қарай бұрылады да, Ахзибтың маңайында теңізге келіп тіреледі.

³⁰Аширдің жеріне тағы Умма, Әфек, Рехоб — барлығы жиырма екі қала әрі оларға қарасты елді мекендер кіреді.

³¹Сонымен әулеттері бойынша Ашир руының үлесіне тиген мұралық жер, ондағы қалалар әрі оларға қарасты елді мекендер, міне, осылар.

³²Алтыншы жеребе әулеттері бойынша Нафталим руына түсті.

³³Нафталим руының шекарасы Хелефтен басталып, Сананымдағы дәу емен ағашы мен Ябниел арқылы өтіп, Лақумға дейін жетеді де, Иордан өзеніне келіп тіреледі.

³⁴Содан соң ол батысқа, Азнот-Таборға қарай бұрылып, Хұқоққа беттейді. Сонымен Нафталимнің жері оңтүстікте Забулонмен, батыста Аширмен, шығыста Иордан өзенімен шектеседі.

³⁵Бекіністі қалалары: Сиддим, Сер, Хамат, Раққат, Кінерет,

³⁶Адама, Рамақ, Хасор,

³⁷Кедес, Едірей, Ен-Хасор,

³⁸Ирон, Мигдал-Ел, Хорем, Бет-Анат және Бет-Шәміш. Барлығы он тоғыз қала әрі оларға қарасты елді мекендер болды.

³⁹Нафталим руына әулеттері бойынша тиген мұралық жер, ондағы қалалар әрі оларға қарасты елді мекендер, міне, осылар.

⁴⁰Жетінші жеребе әулеттері бойынша Дан руына түсті.

⁴¹Оның мұралық жеріне Сора, Ештағол, Ир-Шәміш,

⁴²Шағалаббин, Аялон, Итла,

⁴³Елон, Тимна, Әкрон,

⁴⁴Елтеке, Гибетон, Бағалат,

⁴⁵Еһуд, Бене-Берақ, Ғат-Риммон,

⁴⁶Ме-Жарқон, Рақон және Яффаның алдындағы аймақ кірді.

⁴⁷Дан руы өзіне берілген мұралық жеріне ие бола алмай, одан айырылып қалды. Сонда олар Ләшемге қарсы соғысып, оны қолға түсіріп, тұрғындарын семсердің жүзімен қырып тастады. Дандықтар сол қалаға өздері қоныстанып алды да, Ләшем деген атын түп аталарының құрметіне Дан деп өзгертті.

⁴⁸Дан руының үлесіне әулеттері бойынша тиген мұралық жер, ондағы қалалар әрі оларға қарасты елді мекендер, міне, осылар.

⁴⁹Елді мұралық жер етіп шекараларына сәйкес үлестіріп болғаннан кейін, исраилдіктер өз араларынан Нұн ұлы Ешуаға да мұралық жер бөліп берді.

⁵⁰Жаратқан Иенің бұйрығы бойынша, олар Ешуаға өзі сұраған қаласын: Ефремнің таулы аймағындағы Тимнат-Серахты бегіледі. Ешуа сол қаланы қайта салып, сонда орналасты.

⁵¹Діни қызметкер Елазар, Нұн ұлы Ешуа және исраилдік рулардың әулет басыларының Шилода Жаратқан Иенің алдында, Оның кездесу шатырының кіреберісінде жеребе тастап үлестірген мұралық жерлері, міне, осылар. Сонымен олар жерді үлеске бөлуді аяқтады.