Матай 1

¹Ыбырайым атаның ұрпағы Дәуіт патшаның әулетінен шыққан Иса Мәсіхтің ата-тегінің шежіресі былай құралған:

²Ыбырайымнан Ысқақ, Ысқақтан Жақып, Жақыптан Яһуда мен оның аға-інілері,

³ал Яһудадан Парес пен Зарах туды, олардың анасы Тамар болатын. Парестен Хесрон, Хесроннан Рам,

⁴Рамнан Әминадап, Әминадаптан Нағасон, Нағасоннан Салмон,

⁵Салмоннан Боғоз тарады, оның анасы Рахаб болатын. Боғоздан Ғабит туды, оның анасы Рут еді. Ғабиттен Есей,

⁶Есейден Дәуіт патша туды. Дәуіттен Сүлеймен туды, оның анасы Ұрияның бұрынғы әйелі болатын.

⁷Сүлейменнен Рохабоғам, Рохабоғамнан Абиях, Абияхтан Аса,

⁸Асадан Жосапат, Жосапаттан Жорам, Жорамнан Ұзиях,

⁹Ұзияхтан Жотам, Жотамнан Ахаз, Ахаздан Езекия,

¹⁰Езекиядан Манаса, Манасадан Амон, Амоннан Жосия,

¹¹Жосиядан Ехониях пен оның аға-інілері тарады. Бұл, яһуди халқының көпшілігі Бабыл еліне жер аударылмас бұрын болған еді.

¹²Бабылға жер аударылғаннан кейін Ехонияхтан Салатиел, Салатиелден Зоробабел,

¹³Зоробабелден Әбиуд, Әбиудтен Елиәкім, Елиәкімнен Азор,

¹⁴Азордан Садық, Садықтан Әкім, Әкімнен Елиуд,

¹⁵Елиудтен Елазар, Елазардан Маттан, Маттаннан Жақып,

¹⁶Жақыптан Мәриямның күйеуі Жүсіп тарады. Ал Мәриямнан Иса дүниеге келді, Ол Мәсіх («Құдай тағайындаған Құтқарушы Патша») деп те аталады.

¹⁷Осылай Ыбырайымнан Дәуітке дейін он төрт ата, Дәуіттен халықтың Бабыл еліне жер аударылғанына дейін де он төрт ата, жер аударылғаннан Мәсіхке дейін де он төрт ата болды.

¹⁸Иса Мәсіхтің дүниеге келуі былай болды: Оның анасы Мәриям Жүсіпке айттырылған еді. Ал екеуі әлі де қосылмай тұрғанда-ақ, Киелі Рухтың құдіретімен Мәриямның аяғы ауыр екендігі белгілі болды.

¹⁹Болашақ күйеуі Жүсіп әділ кісі болғандықтан, қалыңдығын ел алдында ұятқа қалдырмау үшін ешкімге білдірмей келісімдерінен бас тартпақ болды.

²⁰Бірақ ол осыны ойлап жүргенде Жаратқан Иенің періштесі түсінде аян беріп: «Дәуіттің ұрпағы Жүсіп, қалыңдығың Мәриямға үйленуден шошынба! Себебі құрсағындағы Баласы Киелі Рухтан.

²¹Мәриям Ұл таппақ, Оның атын Иса деп қой! Себебі Ол халқын күнәларынан құтқаратын болады», — деді.

²²Мұның бәрі Жаратқан Иенің (Ишая) пайғамбар арқылы алдын ала айтқанының жүзеге асуы үшін солай болды.

²³Ол былай деген: «Біліп алыңдар, пәк қыз құрсақ көтеріп, Ұл туады. Оған Имануил, яғни «Құдай бізбен бірге», деген ат қояды».

²⁴Жүсіп оянып, орнынан тұрғаннан кейін Жаратқан Иенің періштесінің бұйрығын орындап Мәриямға үйленді.

²⁵Ал Мәриям босанып, Ұлын тапқанша, Жүсіп онымен жақынд��сқан жоқ. Нәресте дүниеге келгеннен кейін Оның атын Иса деп қойды.