Нақыл сөздер 15

¹Жәбір сөз ашу туғызар, Биязы жауап ашуды басар.

²Дана жанның тілі білімді мақтар, Аңқаудың аузынан надандық ағылар.

³Жаратушының көз алдында бәрі аян, Бар жақсы мен жамандар айқын Оған.

⁴Мейірімді тіл өмір сыйлайтын ағашқа ұқсар, Өтірікші тіл рухыңды жаншып-басар.

⁵Әкенің тәрбиесінен ақымақ безер, Ескертуге ден қойған парасатқа кенелер.

⁶Әділдің үйінде мол қазына болар, Арамзаның тапқаны өз берекесін алар.

⁷Дананың тілі білім себеді, Наданның санасы олай істемейді.

⁸Арамзаның құрбандығынан Жаратқан жиренер, Ал әділдің мінажаты Оны сүйсіндірер.

⁹Арамзаның жолынан Жаратқан жиренер, Әділдікті қуғанға Ол сүйсінер.

¹⁰Жолдан безген ауыр жаза тартар, Ескертуді жек көрген опат болар.

¹¹О дүние мен тозақ Жаратқанға аян, Оған адам жүрегі содан бетер аян.

¹²Мысқылшыл өзіне ескерткенді ұнатпас, Дананың маңына ол жақындамас.

¹³Жүректің қуанышы бет-жүзді жарқыратар, Жүректің қайғысы көңілді жабырқатар.

¹⁴Зерделінің санасы білім қуар, Зердесіз ақымақтыққа тойынар.

¹⁵Бақытсыздың қай күні де қайғыдан арылмас, Қуанышты жанның тойы тарқамас.

¹⁶Мол қазынасы болып, уайымдағаннан гөрі Азды қанағат етіп, Жаратқанды қастерлеген игі.

¹⁷Жек көрген жан ұсынған семіз сиыр етінен Көкөніс тағамы игі сүйген жан берген.

¹⁸Ашушаң дау туғызар, Байсалды дауды басар.

¹⁹Жалқаудың жолын тікен басар, Адалдың жолы тегіс болар.

²⁰Ақылды бала әкесін риза қылар, Ақылсыз жан шешесін қор қылар.

²¹Ақылы азды ақымақтық сүйсінтер, Ал ақылды жан тура жолмен жүрер.

²²Кеңессіз құрған іс аяқсыз қалар, Көптің ақылымен ол жүзеге асар.

²³Дәл айтылған жауап адамды қуантар, Уақтылы айтылған сөз бір ғанибет болар.

²⁴Дананың өмір жолы биікке бастар, Ажалдан оны сақтап қалар.

²⁵Жаратқан Ие менменнің үйін талқандар, Ол жесірдің жерінің шекарасын қорғар.

²⁶Зұлымның жоспарларынан Жаратқан жиренер, Пәк жанның сөздеріне Жаратқан сүйсінер.

²⁷Пайдақор отбасының берекесін кетірер, Параны жек көрген тыныш өмір сүрер.

²⁸Әділ жан жауабын ойлап берер, Арамза жаман сөзін лақ еткізер.

²⁹Арамзадан Жаратқан Ие алыс болар, Әділдің мінажатына Ол құлақ салар.

³⁰Жарқын жүз жүректі қуантар, Жақсы хабар денеге қуат дарытар.

³¹Өмірдің тәрбиесіне құлақ түргендер Даналар арасынан орын тебер.

³²Тәрбиеге ден қоймаған өз жанын жек көрер, Ескертуді тыңдағ��н ақыл-парасат иемденер.

³³Жаратқанды шын қастерлеу даналыққа үйретер Және кішіпейіл жанның абыройы өсер.