Нақыл сөздер 6

¹Балам, егер көршің үшін кепілдік беріп Не бөтеннің қарызын мойныңа алып,

²Аузыңнан шыққан сөзіңмен шырмалсаң,

³Ұлым, сол адамға кіріптар болғаның. Тез барып, жалынып аяғына жығыл, Осылай уәдеңнен азат болып құтыл!

⁴Ұйқыға бой беріп, кірпігіңді ілмей, Алдымен көз жұмып, ұйықтайын демей,

⁵Аңшыдан қашқан еліктей дереу құтыл, Құс іспетті тұзақтан босауға ұмтыл!

⁶Жалқау неме, құмырсқадан үлгі ал, Ісіне қарап оның, парасатқа ие бол!

⁷Бастық, бақылаушы, билеушісі болмайды,

⁸Бірақ жазда ол қысқы азығын дайындайды, Орақ кезінде тамағын жинап сақтайды.

⁹Жалқау неме, қашанғы ұйықтап жатасың, Ұйқыңнан оянып, қашан тұрасың?

¹⁰Біресе ұйықтап не мүлгіп отырасың, Біресе қол қусырып жатып та аласың,

¹¹Кенеттен жүйріктей жоқшылық жетер, Тонаушыдай мұқтаждық саған тап берер.

¹²Қара ниетті, арсыз жан жалған сөйлер,

¹³Аяқ, көз, саусақпен құпия белгі берер,

¹⁴Жүрегінде зұлым жоспарлар құрар, Әрдайым араздық сеуіп отырар.

¹⁵Сондықтан ажал оған кенет жетер, Сауықпастан біржола құрып кетер.

¹⁶Жаратқан Ие мына алтауды жақтырмайды, Тіпті жетеуді жаны мүлдем жаратпайды:

¹⁷Тәкаппар көз бен өтірікші тіл, Һәм жазықсыз қан төгетін қол,

¹⁸Зұлым жоспар құратын ақыл-сана, Әрі асыққан аяқ соны орындауға,

¹⁹Жалған куә өтірік айтатын, Ағайын арасында араздық тудыратын.

²⁰Балам, әке өсиетін есте сақта, Анаң берген тәлімнен де бас тартпа,

²¹Оларды мәңгі жүрегіңе түйгін, Мойныңа таққандай сақтап жүргін,

²²Жүргенде олар тура жолды нұсқар, Ұйықтасаң күзетіп, қорғап жатар, Оянғанда саған ақыл айтар.

²³Өсиет пен тәлім шам-шырақ секілді, Түзеткіш тәрбие өмір жолын сілтейді.

²⁴Олар сені жүгенсіз әйелден сақтайды, Оның жағымпаз сөздерінен қорғайды.

²⁵Көркіне оның жүрегің елікпесін, Жанары сені баурап әкетпесін!

²⁶Жезөкше ақыры нанға зәру қылар, Азғын әйел қымбат жаныңа тұзақ құрар.

²⁷Өз қойнына от салған киімін өртемей ме?

²⁸Шоқ басқан адам аяғын күйдірмей ме?

²⁹Өзгенің жарына барған жанмен де солай болады, Онымен құшақтасса, жазасын тартады.

³⁰Аштықтан ұрлық жасағанды жұрт жек көрмей ме,

³¹Ұсталса, алғанын жеті еселеп төлетпей ме, Отбасының меншігін түгелдей бергізбей ме?

³²Сөз жоқ, неке адалдығын бұзғанның ақылы кем, Ол өз жанын құртады солай істеуімен,

³³Соққы жейді әрі абыройы төгіледі, Мәңгі масқара бо��ып қала береді.

³⁴Қызғаныштан күйеуін ашу кернейді, Өшін алған кезінде аяуды білмейді,

³⁵Күнәнің төлемін ешқашан алмайды, Мол тарту берсең де, ашуы қайтпайды.