Забур жырлары 108

¹Уа, Құдай, жүрегім Саған сенімді, Өзіңе арнаймын мен ән-күйімді. Жан дүнием, ояншы, сергек болайын,

²Жетіген мен домбыра, болыңдар дайын! Атар таңды әніммен оятайын.

³Уа, Жаратқан, жұрт алдында Сені даңқтаймын, Ұлттардың арасында мадақтап жырлаймын.

⁴Себебі берік рақымың заңғар аспандай, Әрі сенімділігің асқар бұлттардай.

⁵Уа, Құдай, көктен жоғары атың шықсын, Күллі әлемде Сенің даңқың артсын!

⁶Сүйіктілерің лайым аман сақталсын Деп ден қойып, құдіретіңмен құтқарғын.

⁷Құдай былай деді киелі мекенінен: «Мен шаттанып Сихемнің жерін бөлшектеймін, Соқот аңғарын да халқыма үлестіремін.

⁸Ғилақад пен Манаса да — Менің иелігім, Ефрем руы болады басты қорғаным, Яһуда руынан шығады патшаларым.

⁹Моаб Маған шылапшындай пайдалы болады, Едом жері де меншігіме айналады, Філістір елі де бойсұнып Мені қуантады».

¹⁰Кім мені қамалды қалаға кіргізеді? Кім Едом елінің ішіне енгізеді?

¹¹Сол Сен емес пе, Құдай, бізден бас тартқан, Әскерімізбен бірге шайқасқа шықпаған?

¹²Жаулардың қыспағына қарсы қолдашы, Еш жарамсыз — пенделердің қолдағаны,

¹³Зор істер істейміз Құдай жар болғанда, Жауларымызды таптайды Ол аяғына.