Забур жырлары 34

¹Жаратқан Иені мадақтаймын әр уақытта, Оны мақтаған жыр ұдайы жүрсін ��узымда.

²Тәңір Иені шын жүректен тұтамын мақтан, Байғұс бейшаралар естіп, қуансын соған.

³Келіңдер, бірге Жаратқанды мадақтайықшы, Бірігіп Оның есімін марапаттайықшы!

⁴Жаратқанға сиындым, Ол жауап берді маған, Әрі азат етті мені бар қорқынышымнан.

⁵Жаратқанға сиынып көз тіккендер жайнайды, Олар шаттанып, еш масқара болмайды.

⁶Жарлы болған мен жалбарындым Жаратқанға, Ол естіп, бар пәлемнен құтқарды сонда.

⁷Иені қастерлейтіндерді қоршап тұрады Оның періштесі, ол соларды құтқарады.

⁸Жаратқанның ізгілігіне көз жеткізіңдер, Қандай бақытты Оған сенімін жүктегендер!

⁹Қастерлеңдер Иені, Оның қасиеттілері! Жоқшылық қинамайды Оны қастерлейтіндерді.

¹⁰Арыстандар азыққа зәру жүре алады, Ал Иеге сенгендер бар игілікке тояды.

¹¹Келіңдер, балалар, тыңдаңдар сөзімді, Үйретемін сендерге Иемізді қастерлеуді.

¹²Сендердің қайсыларың өмірді ұнатасыңдар, Жақсы күндерді көптеп көруді қалайсыңдар?

¹³Онда жаман сөз ауыздарыңнан шығармаңдар, Өтірік айтудан да әрқашан сақтаныңдар!

¹⁴Жамандықтан бас тартып, жақсылықты жасаңдар, Татулыққа ұмтылып, сол үшін күш салыңдар!

¹⁵Жаратқан Ие әділдерге назар аударады, Өзіне жалынған оларға құлақ салады.

¹⁶Ал сұмдық жасайтындарға Жаратқан қарсы шығады, Есімдерін із-түзсіз жер бетінен жоқ қылады.

¹⁷Әділдер жалынса, Иеміз құлақ салады, Күллі қиындықтан оларды құтқарып алады.

¹⁸Жүрегі жаралыға Жаратқан жақын тұрады, Жаны күйреп, күнәсіне өкінгенді құтқарады.

¹⁹Әділ жан қиындықты көп көреді, Ал Иеміз оны бәрінен азат етеді,

²⁰Оның барлық сүйектерін аман сақтайды, Тіпті бірде-біреуі сындырылмайды.

²¹Сұрқияның зұлымдығы түбіне жетер, Әділді жек көрген жан зардабын шегер.

²²Жаратқан Ие құтқарады өз құлдарын, Ол соттамайды Өзін паналағандарын.