Забур жырлары 72

¹Уа, Құдай, патшаңа әділ шешімдер сыйлай гөр, Патшаның ұлына да әділдікті үйрете гөр,

²Ол халқыңа әділетпен билік құрсын, Жарлыларыңа әділ үкім шығарсын.

³Қыраттар халқыңа молшылық берсін, Қырдан олар әділдіктің өнімін терсін.

⁴Патша халықтың жарлыларын қорғасын, Мұқтаждың ұрпақтарын да аман сақтасын, Ал қанаушыларын басып жуасытсын.

⁵Күн мен ай нұрын шашып болмайынша, Халқың Сені қастерлесін ұрпақтан ұрпаққа.

⁶Игілікті болсын патшаның билігі: Қайта қаулата өсірген шабындықты Аспаннан жауған көктемгі жаңбырдай, Иә, топырақтың шөлін қандырған нөсердей.

⁷Патша заманында әділдер өркендесін, Ай өшпейінше молшылық жайыла берсін.

⁸Ол билік құрады теңізден теңізге дейін, Евфрат өзенінен жердің шетіне дейін,

⁹Құла түздің тұрғындары оған бас ұрады, Ал жаулары топырақты жалайтын болады.

¹⁰Тарсис пен аралдардың патшалары Патшаңа алым-салық төлеп тұрады, Әрі Себа мен Сәбаның патшалары Сый-тартулар әкеліп отырады.

¹¹Күллі патшалар оған бас иеді, Күллі ұлттар оған қызмет етеді.

¹²Патша құтқарады жалынған мұқтажды Және қолдаушысы жоқ қаналғанды,

¹³Ол әлсіз бен кедейді қамқорлайды, Оларды ажалдан аман сақтайды,

¹⁴Әрі зорлық-зомбылықтан қорғайды, Олардың қанын қымбат деп санайды.

¹⁵Ғұмыры патшаның ұзақ болсын, Оған Сәбаның алтынынан сый тартылсын, Лайым жұрт патшасы үшін мінажат қылсын, Күн сайын жарылқануы үшін Тәңірге сиынсын!

¹⁶Жердің беті егінге тола берсін, Қырда дәнді сабақтары өсіп-өнсін, Олар Ливан орманындай сыңсып тұрсын, Қаланың тұрғындары да шөптей көбейсін.

¹⁷Патшаның есімі мәңгілікке ұлассын, Күннің сәулесіндей ұзаққа созылсын, Ол арқылы барлық ұлттар жарылқансын, Есімі оның үздіксіз мақталатын болсын!

¹⁸Лайым мадақталсын Исраил сиынатын Құдай, Тек Жаратқан Ие — керемет жасайтын Құдай!

¹⁹Оның даңқты есімі мәңгі дәріптелсін, Күллі жер Оның салтанатына кенелсін. Аумин, иә, аумин.

²⁰(Есей ұлы Дәуіттің мінажаттары осымен аяқталады.)