Забур жырлары 99

¹Жаратқан Иеміз патшалық құрады, Керубтер арасындағы «тағында» отырады. Халықтар Оны қастерлеп қалшылдасын, Жер де Тәңір Иеден қорқып шайқалсын!

²Жаратушы Сионда салтанатпен тұрады, Оның даңқы бар халықтардан жоғары.

³Уа, Ием, ұлы да айбарлы есіміңді Халықтар мадақтасын: ол киелі!

⁴Құдіретті патша, ұнатасың әділдікті, Сен жер бетіне орнаттың әділетті. Жақыптың үрім-бұтағына шындықты Бекіттің, уа, Ием, және адалдықты.

⁵Мақтау айтыңдар Иеміз — Құдайға: Ол киелі! «Табан тіренішінің» алдында Бас иіп ғибадат етіңдер Құдайға!

⁶Оның діни қызметкерлерінің арасында Мұса мен Һарон болды ежелгі заманда. Атын атап Оған сиынғандар арасында Самуил пайғамбар да болды баяғыда, Жаратқан құлақ салды олар сиынғанда.

⁷Бұлт бағанасынан Ол сөзін жолдады, Ережелер мен жарлығын жариялады, Ал халық соларды сақтап орындады.

⁸Уа, Құдай Иеміз, оларға құлақ салдың Әрі кешірім беретін Құдайы болдың, Ал зұлым істерін жазалайтынсың.

⁹Құдай Иемізді даңқтап дәріптеңдер, Қасиетті тауында Оған бас иіңдер, Құдай Иеміз киелі, соны біліңдер!