2 Samwiri 22

¹Awo Dawudi n'agamba Mukama ebigambo eby'oluyimba luno ku lunaku Mukama kwe yamuwonyeza mu mukono gw'abalabe be bonna ne mu mukono gwa Sawulo:

²n'ayogera nti Mukama lwe lwazi lwange era ekigo kyange era omulokozi wange, owange nze;

³Katonda ow'olwazi lwange, oyo gwe nneesiganga; Engabo yange, era ejjembe ery'obulokozi bwange, ekigo kyange ekiwanvu, era ekiddukiro kyange; Omulokozi wange, ggwe omponya mu kyejo.

⁴Naakaabira Mukama, asaanidde okutenderezebwa: Bwe ntyo bwe nnaalokokanga eri abalabe bange.

⁵Kubanga amayengo ag'okufa gazingiza, Amataba ag'obutatya Katonda ne gantiisa.

⁶Emigwa egy'emagombe gyanneetooloola: Ebyambika eby'okufa byantuukako.

⁷Bwe nnalaba ennaku ne nkaabira Mukama, Weewaawo, nakaabira Katonda wange: N'awulira eddoboozi lyange ng'ayima mu yeekalu ye, Okukaaba kwange ne kutuuka mu matu ge.

⁸Ensi n'eryoka esagaasagana n'ekankana, Emisingi gy'eggulu ne gijjulukuka Ne gikankanyizibwa, kubanga asunguwadde.

⁹Omukka ne gunyooka okuva mu nnyindo ze, N'omuliro ogwava mu kamwa ke ne gwokya: Ne gukwata amanda.

¹⁰Yakutamya n'eggulu n'aserengeta; Ekizikiza ekiziyivu ne kiba wansi w'ebigere bye.

¹¹Ne yeebagala kerubi n'abuuka: Weewaawo, yalabikira ku biwawaatiro by'empewo.

¹²N'afuula ekizikiza okuba eweema ezimwetooloola: Amazzi we gakuŋŋaanira, ebire ebiziyivu eby'omu ggulu.

¹³Okumasamasa okwali mu maaso ge Ne kwasa amanda ag'omuliro.

¹⁴Mukama n'abwatuka ng'ayima mu ggulu, Ali waggulu ennyo n'aleeta eddoboozi lye.

¹⁵N'alasa obusaale n'abasaasaanya; N'aweereza okumyansa n'abeeraliikiriza.

¹⁶Awo ensalosalo ez'ennyanja ne ziryoka zirabika, Emisingi gy'ensi ne gyeruka, Olw'okunenya kwa Mukama, Olw'okufuuwa omukka ogw'omu nnyindo ze.

¹⁷Yatuma ng'ayima waggulu n'antwala; N'ampalula n'anziya mu mazzi amangi;

¹⁸N'amponya eri omulabe wange ow'amaanyi, Eri abo abaankyawa; kubanga bannyinga amaanyi.

¹⁹Bangwako ku lunaku kwe nnalabira ennaku: Naye Mukama ye yannyweza.

²⁰Era n'anfulumya n'andeeta mu kifo ekigazi: Yamponya kubanga yansanyukira.

²¹Mukama yampa empeera ng'obutuukirivu bwange bwe bwali: Ansasudde ng'obulongoofu bw'engalo zange bwe bwali.

²²Kubanga nakuumanga amakubo ga Mukama, So siddanga ku Katonda wange lwa kyejo.

²³Kubanga emisango gye gyonna gy'abanga mu maaso gange: N'amateeka ge sigavangamu.

²⁴Era nabanga eyatuukirira eri ye, ne nneekuuma mu butali butuukirivu bwange.

²⁵Mukama kyavudde ansasula ng'obutuukirivu bwange bwe bwali: Ng'obulongoofu bwange bwe bwali mu maaso ge.

²⁶Awali ow'ekisa oneeraganga wa kisa, Awali omuntu eyatuukirira oneeraganga mutuukirivu;

²⁷Awali omulongoofu oneeraganga mulongoofu; Era awali omukakanyavu oneeraganga aziyiza.

²⁸Era olirokola abantu abaabonyabonyezebwa: Naye amaaso go gatunuulira ab'amalala obasse wansi.

²⁹Kubanga ggwe ttabaaza yange, ai Mukama: Era Mukama alyakira ekizikiza kyange.

³⁰Kubanga ku lulwo nziruka mbiro ne nnumba ekibiina: Ku lwa Katonda wange mbuuka ekigo:

³¹Katonda ekkubo lye lyatuukirira: Ekigambo kya Mukama kyakemebwa; Oyo ye ngabo eri abo bonna abamwesiga.

³²Kubanga ani Katonda wabula Mukama? Oba ani lwazi wabula Katonda waffe?

³³Katonda kye kigo kyange eky'amaanyi: Era aluŋŋamya eyatuukirira mu kkubo lye.

³⁴Afuula ebigere bye okuba (ng'ebigere) by'ennangaazi: Era anteeka ku bifo byange ebigulumivu.

³⁵Ayigiriza engalo zange okulwana; Emikono gyange ne gitega omutego ogw'ekikomo.

³⁶Era ompadde engabo ey'obulokozi bwo: N'obuwombeefu bwo bungulumizizza.

³⁷Wagaziya ebisinde byange wansi wange, Ebigere byange ne bitaseerera.

³⁸Nayigganya abalabe bange, ne mbazikiriza; So saakyuka nate nga tebannamalibwawo.

³⁹Era mbamazeewo ne mbafumitira ddala n'okuyinza ne batayinza kugolokoka: Weewaawo, bagudde wansi w'ebigere byange.

⁴⁰Kubanga onsibye amaanyi ag'okulwana: Owangudde wansi wange abo abangolokokerako.

⁴¹Era abalabe bange obankubizza amabega, nzikirize abo abankyawa.

⁴²Baatunula naye tewali wa kulokola; Baatunuulira Mukama naye n'atabaddamu.

⁴³Awo ne mbasekulirasekulira ddala ng'enfuufu ey'oku nsi, Nabasamba ng'ebitosi eby'omu nguudo ne mbasaasaanya.

⁴⁴Era omponyezza mu kuwakana kw'abantu bange; N'onkuuma okuba omutwe gw'amawanga: Eggwanga lye ssimanyanga Lirimpeereza.

⁴⁵Bannaggwanga balinjeemulukukira: Nga kyebajje bampulire baliŋŋondera.

⁴⁶Bannaggwanga baliggweerera, Era baliva mu bifo byabwe eby'ekyama nga bakankana.

⁴⁷Mukama mulamu; era lwazi lwange atenderezebwe; Agulumizibwe Katonda ow'olwazi olw'obulokozi bwange:

⁴⁸Ye Katonda ampalanira eggwanga, N'assa amawanga wansi wange,

⁴⁹Era anziya mu balabe bange: Weewaawo, ongulumiza okusinga abo abangolokokerako: Omponya eri omusajja ow'ekyejo.

⁵⁰Kyennaava nkwebaza, ai Mukama, mu mawanga, ne nnyimba okutendereza erinnya lyo.

⁵¹Awa kabaka we obulokozi obunene: Era amukola eby'ekisa ekingi oyo gwe yafukako amafuta, Dawudi n'ezzadde lye emirembe gyonna.