Makko 5

¹Ne batuuka emitala w'ennyanja mu nsi y'Abagerasene.

²Bwe yava mu lyato, amangu ago omuntu eyaliko dayimooni eyava mu ntaana n'amusisinkana,

³eyasulanga mu ntaana; nga tewakyali muntu ayinza kumusiba, newakubadde mu lujegere,

⁴kubanga emirundi mingi yateekebwako mu masamba, ne mu njegere, enjegere n'azikutula, n'amasamba n'agamenyaamenya: ne wataba muntu wa maanyi okumusobola.

⁵Naye bulijjo, ekiro n'emisana, yakaabiranga mu ntaana ne ku nsozi, ne yeesala n'amayinja.

⁶Bwe yalengera Yesu ng'akyali wala, n'addukana n'amusinza; n'akaaba n'eddoboozi ddene

⁷ng'agamba nti Onvunaana ki, Yesu Omwana wa Katonda, Ali waggulu ennyo? Nkulayiza Katonda, tombonereza.

⁸Kubanga yamugamba nti Va ku muntu ono, ggwe dayimooni.

⁹N'amubuuza nti Erinnya lyo ggwe ani? N'amugamba nti Erinnya lyange Liigyoni; kubanga tuli bangi.

¹⁰N'amwegayirira nnyo aleme okubagoba mu nsi eyo.

¹¹Awo ku lusozi waaliwo eggana ly'embizzi ddene nga zirya.

¹²N'amwegayirira, ng'amugamba nti Tusindike mu mbizzi tuziyingiremu.

¹³N'amukkiriza, Dayimooni n'avaamu, n'ayingira mu mbizzi: eggana ne lifubutuka ne liserengetera ku bbanga mu nnyanja, zaali nga nkumi bbiri, ne zifiira mu nnyanja.

¹⁴Awo abaali bazirunda ne badduka, ne babuulira ab'omu kibuga, n'ab'omu byalo, ne bajja okulaba ebibaddeyo bwe biri.

¹⁵Ne batuuka awali Yesu, ne balaba eyaliko dayimooni ng'atudde, ng'ayambadde nga alina amagezi, oyo eyaliko liigyoni; ne batya.

¹⁶Abaalaba ne babannyonnyola ebimubaddeko oyo eyaliko dayinooni, era n'eby'embizzi.

¹⁷Ne batanula okumwegayirira okuva mu nsalo zaabwe.

¹⁸Awo bwe yali ng'asaabala mu lyato, oyo eyaliko dayimooni n'amwegayirira abeere naye.

¹⁹N'atamuganya, naye yamugamba nti Genda eka mu babo, obabuulire bwe biri ebikulu Katonda by'akukoledde, ne bw'akusaasidde.

²⁰N'agenda, n'atanula okubuulira mu Dekapoli bwe biri ebikulu Yesu bye yamukolera. Abantu bonna ne beewuunya.

²¹Awo Yesu bwe yawunguka nate mu lyato n'atuuka emitala, bibiina bingi ne bikuŋŋaanira w'ali; ye ng'ali kumpi n'ennyanja.

²²Omu ow'oku bakulu b'ekkuŋŋaaniro, erinnya lye Yayiro, n'ajja; bwe yamulaba, n'avuunama ku bigere bye,

²³n'amwegayirira nnyo ng'agamba nti Omuwala wange omuto ali kumpi n'okufa: nkwegayirira ojje, omusseeko emikono gyo, adde mu mbeera ye, alamuke.

²⁴N'agenda naye; ekibiina ekinene ne kimugoberera, ne bamunyigiriza.

²⁵Awo omukazi eyali alwalidde ekikulukuto ky'omusaayi emyaka kkumi n'ebiri,

²⁶eyatengejja ennyo eri abasawo abangi, n'awangayo bye yali nabyo byonna, so n'atabaako kimugasa, naye ne yeeyongeranga bweyongezi okulwala,

²⁷bwe yawulira ebigambo bya Yesu, n'ajjira mu kibiina emabega we n’akoma ku kyambalo kye.

²⁸Kubanga yagamba nti Bwe nkomako obukomi ku byambalo bye, nnaawona.

²⁹Amangu ago ensulo ey'omusaayi n'ekalira, n'ategeera mu mubiri gwe ng'awonyezebbwa ekibonoobono kye.

³⁰Amangu ago Yesu bwe yategeera munda mu ye amaanyi agamuvuddemu, n'akyuka mu kibiina n'agamba nti Ani akomye ku byambalo byange?

³¹Abayigirizwa be ne bamugamba nti Olaba ekibiina bwe bakunyigiriza, n'ogamba nti Ani ankomyeko?

³²Ne yeetoolooza amaaso okulaba oyo akoze ekigambo ekyo.

³³Naye omukazi ng'atya ng'akankana, ng'amanyi ky'abadde, n'ajja n'afukamira mu maaso ge, n'amubuulira eby'amazima byonna.

³⁴N'amugamba nti Omuwala, okukkiriza kwo kukuwonyezza; weegendere n'emirembe, owonere ddala ekibonoobono kyo.

³⁵Awo bwe yali akyayogera, abaava ew'omukulu w'ekkuŋŋaaniro ne bajja, nga bagamba nti Omuwala wo afudde; oteganyiza ki nate Omuyigiriza?

³⁶Naye Yesu n'atassaako mwoyo ku kigambo ekyogeddwa, n'agamba omukulu w'ekkuŋŋaaniro nti Totya, kkiriza bukkiriza.

³⁷N'ataganya muntu kugenda naye wabula Peetero ne Yakobo, ne Yokaana, muganda wa Yakobo.

³⁸Ne batuuka ku nnyumba y'omukulu w'ekkuŋŋaaniro, n'alaba okwaziirana, n'abakaaba, n'abakuba ebiwoobe ebingi.

³⁹Awo bwe yayingira n'abagamba nti Kiki ekibaaziiranya n'ekibakaabya? omuwala tafudde, naye yeebase bwebasi.

⁴⁰Ne bamusekerera nnyo. Naye bwe yabafulumya bonna, n'atwala kitaawe w'omuwala ne nnyina n'abo abaali naye, n'ayingira omuwala mw'ali.

⁴¹Awo n'akwata omukono gw'omuwala, n'amugamba nti Talisa kumi okutegeezebwa kwakyo nti muwala, nkugamba nti Golokoka.

⁴²Amangu ago omuwala n'agolokoka, n'atambula; kubanga yali yaakamala emyaka kkumi n'ebiri. Amangu ago ne bawuniikirira okuwuniikirira kunene.

⁴³N'abakuutira nnyo buli muntu yenna aleme okukimanya ekyo: n'alagira okumuwa eky'okulya.