Matayo 14

¹Mu biro biri Kerode ow'essaza n'awulira ettutumu lya Yesu,

²n'agamba abaddu be nti Oyo ye Yokaana Omubatiza; azuukidde mu bafu; era eby'amaanyi bino kyebiva bikolera mu ye.

³Kubanga Kerode yali akutte Yokaana, n'amusiba, n'amuteeka mu kkomera olwa Kerodiya, mukazi wa Firipo muganda we.

⁴Kubanga Yokaana yamugamba nti Kya muzizo ggwe okubeera naye.

⁵Bwe yali ayagala okumutta, n'atya abantu, kubanga baamulowooza nga ye nnabbi.

⁶Bwe lwatuuka olw'okujjukira amazaalibwa ga Kerode, omuwala wa Kerodiya n'azina mu maaso gaabwe, n'asanyusa Kerode.

⁷Awo n'alayira n'asuubiza okumuwa kyonna kyonna ky'anaasaba.

⁸Naye, bwe yaweererwa nnyina, n'agamba nti Mpeera wano mu lutiba omutwe gwa Yokaana Omubatiza.

⁹Kabaka n'alumwa; naye olw'ebirayiro bye, n'olw'abo abaali batudde nga balya naye, n'alagira okugumuwa;

¹⁰n'atuma, n'atemako Yokaana omutwe mu kkomera.

¹¹Ne baleeta omutwe gwe mu lutiba, ne baguwa omuwala: n'agutwalira nnyina.

¹²Abayigirizwa be ne bajja, ne basitula omulambo, ne bamuziika; ne bagenda ne babuulira Yesu.

¹³Awo, Yesu bwe yawulira, n'aviirayo mu lyato, n'agenda awali eddungu kyama: ebibiina bwe byawulira, ne biva mu bibuga ne bimugoberera nga biyita ku lukalu.

¹⁴N'avaayo, n'alaba ekibiina kinene, n'abasaasira, n'awonya abalwadde baabwe.

¹⁵Bwe bwawungeera, abayigirizwa ne bajja w'ali, ne bagamba nti Wano ddungu, obudde buyise nnyo; siibula abantu, bagende mu bibuga, beegulire emmere.

¹⁶Naye Yesu n'abagamba nti Tewali kibazzisaayo; mmwe mubawe ebyokulya.

¹⁷Ne bamugamba nti Tetulina kintu wano wabula emigaati etaano, n'ebyennyanja bibiri.

¹⁸N'agamba nti Mubindeetere wano.

¹⁹N'alagira ebibiina okutuula ku muddo; n'atwala emigaati etaano n'ebyennyanja bibiri, n'atunula waggulu mu ggulu, ne yeebaza, n'amenyamu emigaati n'agiwa abayigirizwa, abayigirizwa ne bagabira ebibiina.

²⁰Ne balya bonna, ne bakkuta: ne bakuŋŋaanya obukunkumuka obwasigalawo, ebibbo kkumi na bibiri ebyajjula.

²¹N'abo abaalya baali abasajja ng'enkumi ttaano, abakazi n'abaana obutabassaako:

²²Amangu ago n'awaliriza abayigirizwa okusaabala, bamukulembere okugenda emitala w'eri, amale okusiibula ebibiina.

²³Bwe yamala okusiibula ebibiina, n'alinnya ku lusozi yekka okusaba: obudde bwe bwawungeera, yaliyo bw'omu.

²⁴Naye eryato lyali limaze okutuuka mu buziba, nga lyesunda n'amayengo, kubanga omuyaga gwabafuluma mu maaso.

²⁵Awo ekiro mu kisisimuka eky'okuna n'ajja gye bali, ng'atambula ku nnyanja.

²⁶Abayigirizwa bwe baamulaba ng'atambula ku nnyanja, ne beeraliikirira, ne bagamba nti Dayimooni; ne beekanga nga batya.

²⁷Amangu ago Yesu n'ayogera nabo, n'agamba nti Muddeemu omwoyo: nze nzuuno; temutya.

²⁸Peetero n'amuddamu n'agamba nti Mukama wange, oba nga ggwe wuuyo, ndagira njije gy'oli ku mazzi.

²⁹N'agamba nti Jjangu. Peetero n'ava mu lyato, n'atambulira ku mazzi, okugenda eri Yesu.

³⁰Naye, bwe yalaba omuyaga, n'atya: n'atanula okusaanawo, n'akaaba, n'agamba nti Mukama wange, ndokola.

³¹Amangu ago Yesu n'agolola omukono, n'amukwata, n'amugamba nti Ggwe alina okukkiriza okutono, kiki ekikubuusizzabuusizza?

³²Bwe baalinnya mu lyato, omuyaga ne guggwaawo.

³³N'abo abaali mu lyato ne bamusinza, nga bagamba nti Mazima oli Mwana wa Katonda.

³⁴Bwe baamala okuwunguka, ne batuuka ku lukalu olw'e Genesaleeti.

³⁵Abantu baayo bwe baamumanya, ne batuma mu nsi eyo yonna eriraanyeewo, ne bamuleetera bonna abalwadde;

³⁶ne bamwegayirira bakomeko bukomi ku lukugiro lw'ekyambalo kye; bonna abaakomako ne bawonyezebwa ddala.