गणना 34

¹परमेश्वर मोशेशी बोलला, तो म्हणाला,

²“इस्राएल लोकांना ही आज्ञा दे: तुम्ही कनान देशात येत आहात. तुम्ही त्या देशाचा पराभव करा. तुम्ही सर्व कनान देश घ्या.

³दक्षिणे कडे अदोमजवळच्या त्सीन वाळवंटाचा काही भाग तुम्हाला मिळेल. तुमची दक्षिणेकडची सीमा मृत समुद्राच्या दक्षिण टोकापासून सुरु होईल.

⁴तेथून अक्रब्बीम चढावाचे दक्षिण टोक पार करुन ती त्सीन वाळवंटातून कादेश-बर्ण्याला जाईल. आणि नंतर हसर-अद्दारपर्यंत जाऊन असमोनाला पोहोचेल.

⁵असमोनहून ती मिसर देशाच्या नदीपर्यंत जाईल आणि भूमध्यसमुद्रात तिची समाप्ती होईल.

⁶तुमची पश्चिमेकडची सीमा म्हणजे भूमध्यसमुद्र (महासमुद्र).

⁷तुमची उत्तरेकडची सीमा भूमध्यसमुद्रात सुरु होईल व होर पर्वताकडे जाईल (लेबानान मध्ये).

⁸होर पर्वतावरुन ती लेबो-हमासला जाईल व तेथून सदादला.

⁹नंतर ती सीमा जिप्रोनला जाईल व हसर-एनानला ती संपेल. तेव्हा ती तुमची उत्तर सीमा.

¹⁰तुमची पूर्व सीमा एनानजवळ सुरु होईल व ती शफामपर्यंत जाईल.

¹¹शफामपासून ती अईनच्या पूर्वेकडे रिब्लाला जाईल. ती सीमा गालीली तलावाजवळच्या पर्वतांच्या रांगापर्यंत जाईल.

¹²आणि नंतर ती यार्देन नदीच्या काठाने जाऊन मृतसमुद्रात तिची समाप्ती होईल. तुझ्या देशाच्या या सीमा आहेत.”

¹³तेव्हा मोशेने इस्राएल लोकांना या आज्ञा दिल्या, “तुम्हाला हा प्रदेश मिळेल. तुम्ही नऊ कुळात आणि मनश्शेच्या अर्ध्या कुळात जमिनीची विभागणी करण्यासाठी चिठ्ठ्या टाकाल.

¹⁴रऊबेन आणि गादची कुळे आणि मनश्शेच्या अर्ध्या कुळांनी आधीच त्यांची जमीन घेतली आहे.

¹⁵त्या अडीच कुळानी यरीहोजवळ यार्देन नदीच्या पूर्वेकडची जागा घेतली आहे.”

¹⁶नंतर परमेश्वर मोशेशी बोलला. तो म्हणाला,

¹⁷“जमिनीची विभागणी करण्यासाठी तुला या माणसांची मदत होईल: याजक एलाजार आणि नूनाचा मुलगा यहोशवा.

¹⁸आणि सर्व कुळांचे प्रमुख. प्रत्येक कुळाचा एक प्रमुख असेल. ते लोक जमिनीची विभागणी करतील.

¹⁹प्रमुखांची ही नावे आहेत:यहुदाच्या वंशातला यफुन्नेचा मुलगा कालेब.

²⁰शिमोनेच्या कुटुंबातील अम्मीहुदाचा मुलगा शमुवेल.

²¹बन्यामिनच्या कुटुंबातील किसलोनच्या मुलगा अलीदाद.

²²दानी कुटुंबातील यागलीचा मुलगा बुक्की.

²³योसेफच्या वंशातील मनश्शेच्या कुटुंबातील एफोदचा मुलगा हन्नीएल.

²⁴एफ्राईम कुटुंबातील शिफटानचा मुलगा कमुवेल.

²⁵जबुलून वंशातील पर्नाकचा मुलगा अलीसाफान.

²⁶इस्साखार वंशातील अज्जानचा मुलगा पलटीयेल.

²⁷आशेरी वंशातील शलोमीचा मुलगा अहीहूद.

²⁸आणि नप्ताली वंशातील अम्मीहुदाचा मुलगा पदाहेल.”

²⁹परमेश्वराने कनानच्या भूमीची इस्राएल लोकांमध्ये वाटणी करण्यासाठी या माणसांची निवड केली.