Матай 13

¹Тэр өдөр Есүс гэрээс гарч, нуурын эрэг дээр сууж байлаа.

²Түүн дээр асар олон хүн хуран цугласан тул Тэр завин дээр гарч суужээ. Хурсан олон цөмөөрөө эрэг дээр зогсож байлаа.

³Есүс тэдэнд олон зүйлийг сургаалт зүйрлэлээр айлдруун—Харагтун. Тариачин үр суулгахаар гарчээ.

⁴Түүнийг үрээ цацахад зарим үр нь замын хавиар унасанд шувууд ирээд идчихлээ.

⁵Зарим нь чулуурхаг газар унаж, хөрс нь гүн биш тул тэр дороо соёолов.

⁶Гэвч нар гарахад үндэсгүй учир тэд хорчийн хатжээ.

⁷Зарим нь хогийн ургамлын дунд унав. Хогийн ургамал ургаж тэднийг барьчихаж.

⁸Зарим нь сайн хөрсөнд унаж ургаад, ургацаа өгөхөд зарим нь зуу, зарим нь жар, зарим нь гуч дахин их болов.

⁹Сонсох чихтэй нь сонсогтун гэв.

¹⁰Шавь нар нь Түүн уруу ирж,—Та яагаад тэдэнд сургаалт зүйрлэлээр ярьдаг юм бэ? гэхэд

¹¹Тэр—Тэнгэрийн хаанчлалын нууцуудыг мэдэх нь та нарт өгөгдсөн юм. Харин тэдэнд өгөгдөөгүй.

¹²Учир нь хэнд байна, түүнд ихээр өгөгдөж, элбэг дэлбэг байх болно. Харин хэнд байхгүй байна, түүнд байгаа нь хүртэл түүнээс авагдана.

¹³Тэд харавч хардаггүй, сонсовч сонсдоггүй бөгөөд ойлгодог ч үгүй учир Би тэдэнд сургаалт зүйрлэлээр ярьдаг.

¹⁴Тийм хүмүүс дээр Исаиагийн эш үзүүллэг биелдэг юм. Юу гэвэл тэр“Та нар сонссоор, сонссоор байтал огт ухаарахгүй,харсаар, харсаар байтал огт ойлгохгүй.

¹⁵Учир нь энэ ард түмний зүрх нь хатуурч,чихээрээ дөнгөж сонсон, нүдээ аньжээ.«Эс бөгөөс тэд нүдээрээ харж,чихээрээ сонсож, зүрхээрээ ухаарч,эргэж буцах байсан бөгөөдБи тэднийг эдгээх байсан» гэсэн байдаг”гэсэн юм.

¹⁶Харин та нарын нүд хардаг тул нүд чинь, та нарын чих сонсдог тул чих чинь ерөөлтэй еэ.

¹⁷Үнэнээр Би та нарт хэлье. Та нарын харж байгааг олон эш үзүүлэгч, зөвт хүмүүс харахыг хүссэн авч хараагүй, сонсож байгааг тань сонсохыг хүссэн авч сонсоогүй юм.

¹⁸Тиймээс тариачны сургаалт зүйрлэл ямар утгатай болохыг сонсогтун.

¹⁹Хэн нэг нь хаанчлалын тухай үгийг сонссон авч үл ойлговол хорон нэгэн нь ирж, түүний зүрхэнд юу суулгагдсаныг булаан авдаг байна. Энэ нь зам хавиар унагсад юм.

²⁰Чулуурхаг газар унасан нь үгийг сонсоод тэр даруйдаа баяртайгаар хүлээн авч,

²¹харин өөрт нь бат үндэс байхгүй тул түр зуур байдаг аж. Үгнээс болж хавчлага, эсвэл зовлон тохиолдоход тэр дороо л унадаг.

²²Хогийн ургамлын дунд унасан нь үгийг сонсдог. Харин дэлхийн зовнил болоод эд баялгийн хуурамч байдал нь үгийг шахан зайлуулахад энэ нь үр жимсгүй болдог.

²³Сайн хөрсөнд унасан нь үгийг сонсдог ба ойлгодог нэгэн байх бөгөөд тэр нь үнэхээр үр жимс гаргадаг. Зарим нь зуу, зарим нь жар, зарим нь гуч дахинг авчрах болно гэж айлдав.

²⁴Есүс тэдэнд өөр сургаалт зүйрлэл айлдруун—Тэнгэрийн хаанчлалыг талбайдаа сайн үр тарьсан хүнтэй зүйрлэж болох юм.

²⁵Хүмүүсийг унтаж байхад нь түүний дайсан ирж, буудайн дунд зэрлэг өвс тарьчихаад яваад өгчээ.

²⁶Түрүү цухуйж үр тариа боловсроход, зэрлэг өвс ч бас илт болов.

²⁷Гэрийн эзэн дээр боолууд нь ирж, түүнд “Эзэнтэн, та чинь талбайдаа сайн үр тариагүй бил үү? Гэтэл зэрлэг өвс хаанаас гарчихдаг билээ?” гэхэд

²⁸эзэн нь тэдэнд “Дайсан үүнийг хийжээ” гэв. Боолууд нь “Тэгвэл бид явж тэдгээрийг зулгааж овоолохыг та хүсээ юү?” гэсэнд

²⁹тэр “Хэрэггүй, та нар зэрлэг өвс зулгаах гээд буудайг хамтад нь зулгаачихаж магад.

³⁰Ургац хураатал хамтдаа ургаг. Ургац хураах цагт би хадах хүмүүстээ «Эхлээд зэрлэг өвсийг зулгааж, боогоод шатаахад бэлэн болго. Харин буудайг цуглуулж амбаарт хийцгээ» гэж хэлнэ” гэв.

³¹Есүс өөр сургаалт зүйрлэл айлдруун—Тэнгэрийн хаанчлал бол хүн талбайдаа тарьсан гичийн үртэй төстэй.

³²Энэ нь бусад бүх үрнээс жижигхэн боловч ургахдаа ургамлаас ч илүү томорч, мод болон ургадаг тул тэнгэрийн шувууд ирж, мөчрүүд дээр нь үүрээ засдаг юм гэлээ.

³³Өөр сургаалт зүйрлэлээр—Тэнгэрийн хаанчлал бол гурван хэмжүүр гурилыг бүхэлд нь исгэхээр нэгэн эмэгтэйн хийсэн хөрөнгөтэй төстэй гэж Есүс хэлэв.

³⁴Есүс хурсан олонд сургаалт зүйрлэлээр энэ бүхнийг айлдсан бөгөөд сургаалт зүйрлэлгүйгээр юу ч ярьсангүй.

³⁵Энэ нь эш үзүүлэгчээр хэлүүлсэн нь биелэгдэхийн тулд байсан бөгөөд ингэхдээ«Би сургаалт зүйрлэлээр ам нээнэ.Би дэлхийн сууриас эхлэн нууцлагдсан зүйлсийг хэлэх болно»гэсэн байна.

³⁶Есүс хурсан олныг орхин, гэрт оров. Шавь нар нь Түүн дээр ирээд,—Тариан талбай дахь зэрлэг өвсний тухай сургаалт зүйрлэлийг бидэнд тайлбарлаж өгөөч гэхэд нь

³⁷Тэр—Сайн үрийг таригч нь Хүний Хүү,

³⁸талбай нь дэлхий, сайн үрүүд нь хаанчлалын хөвгүүд, зэрлэг өвсний үрүүд нь хорон нэгний хөвгүүд,

³⁹тэдгээрийг тарьсан дайсан нь диавол, ургац хураах цаг нь энэ үеийн төгсгөл, тариа хадагсад нь тэнгэр элч нар юм.

⁴⁰Тиймээс зэрлэг өвсийг зулгааж шатаах адил энэ үеийн төгсгөл тийм байх болно.

⁴¹Хүний Хүү тэнгэр элч нараа илгээхэд тэд хамаг бүдрүүлэх саад болоод ёс бусыг үйлдэгч хүмүүсийг Түүний хаанчлалаас гаргаж бөөгнүүлээд

⁴²галтай зууханд хаяна. Тэнд тэд уйлна, шүдээ хавирна.

⁴³Тэгэхэд зөвт хүмүүс нь Эцэгийнхээ хаанчлалд нар мэт гийх болно. Сонсох чихтэй нь сонсогтун.

⁴⁴Тэнгэрийн хаанчлал бол талбайд нуусан эрдэнэ лугаа адил юм. Түүнийг хүн олоод нууж, баярласандаа явж, өөрт байгаа бүхнээ зараад, тэрхүү талбайг худалдан авна.

⁴⁵Бас тэнгэрийн хаанчлал бол сайн сувд хайгч худалдаачинтай адил юм.

⁴⁶Их үнэтэй ширхэг сувдыг олоод, тэр явж, өөрт байсан бүхнээ зарж түүнийг авна.

⁴⁷Мөн тэнгэрийн хаанчлал бол төрөл бүрийн загас барихаар тэнгист хаясан загасны асар том тортой адил юм.

⁴⁸Тор дүүрмэгц, тэд түүнийг эрэг дээр татаж гаргаад, сайн загасыг нь саванд хийн, харин мууг нь хаяна.

⁴⁹Энэ үеийн төгсгөл ч мөн ийм байх болно. Тэнгэр элч нар ирж, зөвт хүмүүсийн дундаас муу хүмүүсийг ялгаж,

⁵⁰тэднийг галтай зууханд хаяна. Тэнд тэд уйлж, шүдээ хавирах болно.

⁵¹Та нар энэ бүхнийг ойлгов уу? гэхэд, тэд Түүнд—Тийм ээ гэв.

⁵²Тэгтэл Есүс тэдэнд—Иймээс тэнгэрийн хаанчлалын шавь болсон хуулийн багш бүхэн эрдэнэсийн сангаасаа хуучныг болон шинийг гаргах өрхийн тэргүүлэгчтэй адил юм гэв.

⁵³Есүс эдгээр сургаалт зүйрлэлүүдийг ярьсныхаа дараа тэндээс явав.

⁵⁴Тэр төрөлх хотдоо ирээд, синагогт нь тэднийг сургахад тэд гайхшран—Энэ мэргэн ухаан, эдгээр гайхамшигт хүчийг энэ хүн хаанаас авсан юм бол?

⁵⁵Энэ чинь мужааны хүү биш бил үү? Эхийг нь Мариа, дүү нарыг нь Иаков, Иосеф, Симон, Иуда гэдэг биш бил үү?

⁵⁶Охин дүү нар нь бүгд бидэнтэй хамт байгаа биз дээ? Тэгвэл энэ хүн тэр бүхнийг хаанаас авав? гэцгээв.

⁵⁷Тэд Түүнд гомдов. Харин Есүс тэдэнд—Эш үзүүлэгч нь төрөлх нутаг, гэрийнхнээсээ өөр газар л хүндлэгддэг юм гэж айлдав.

⁵⁸Тэдний итгэлгүй байдлаас болж Тэр тэнд олон гайхамшиг үйлдсэнгүй.