Дуулал 108

¹Өө, Бурхан, зүрх минь бат байна.Би дуулна, би сэтгэлээрээ ч хүртэл магтан дуулна.

²Босоо ятга болон ятга аа, сэрээч.Би үүрийн гэгээг сэрээнэ!

³Өө, ЭЗЭН, би хүмүүсийн дунд Танд талархал өргөж,Үндэстнүүдийн дунд Таныг магтан дуулна.

⁴Учир нь Таны хайр энэрэл тэнгэрт тулам агуу бөгөөдТаны үнэн огторгуйд тулам агуу билээ.

⁵Өө, Бурхан, тэнгэрүүдээс дээгүүр өргөгдөж,Таны сүр жавхлан бүх дэлхийн дээгүүр өргөмжлөгдөх болтугай.

⁶Таны хайрт чөлөөлөгдөхийн тулдБаруун мутраараа аварч, надад хариулаач.

⁷Бурхан Өөрийн ариун газарт айлдсан нь“Би ихэд баярлана, би Шекемийг хуваан,Суккотын хөндийг хэмжинэ.

⁸Гилеад бол Минийх, Манассе ч Минийх.Ефраим ч гэсэн Миний толгойн дуулга.Иуда бол Миний очирт таяг.

⁹Моаб бол Миний угаалгын сав.Едомын дээр Би гутлаа шиднэ.Филистийн дээр Би чангаар хашхирна”.

¹⁰Хэн намайг бүслэгдсэн хот уруу авчрах вэ?Хэн намайг Едом уруу хөтлөн дагуулах вэ?

¹¹Өө, Бурхан, Та Өөрөө биднээс татгалзсан биш үү?Өө, Бурхан, Та манай цэргүүдтэй хамт давшихгүй гэж үү?

¹²Өстний эсрэг бидэнд туслаач,Учир нь хүнээр авруулах нь хоосон юм.

¹³Бурханаар дамжуулан бид зоригтой байх бөгөөдБидний өстнүүдийг гишгэчлэх нэгэн бол Тэр билээ.