Дуулал 37

¹Бузар мууг үйлдэгчээс болж бүү санаа зов,Бурууг үйлдэгчдэд бүү атаарх.

²Учир нь тэд өвс шиг удахгүй хатан хорчийж,Ногоон ургамал шиг хагдрах болно.

³ЭЗЭНд итгэж, сайныг үйлд.Газар нутагт оршин сууж, итгэлтэй байдлыг хоол хүнсээ болго.

⁴ЭЗЭНд баярлагтун.Тэр чамд зүрхний чинь хүслийг өгнө.

⁵Өөрийн замыг ЭЗЭНд даатга,Мөн Түүнд итгэж найд.Тэгвэл Тэр биелүүлж өгнө.

⁶Тэр чиний зөв шударгыг гэрэл мэт,Чиний шударга хэргийг үд дундын гэрэл мэт илэрхий болгоно.

⁷ЭЗЭН дотор дуугүй байж,Түүнийг тэвчээртэйгээр хүлээ.Өөрийнхөө замаар амжилт ологчоос болонХорон муу төлөвлөгөө биелүүлдэг хүнээс болж бүү санаа зов.

⁸Уурлахаа больж, хилэнгээ март.Бүү санаа зов. Энэ нь зөвхөн бузар мууг үйлдэхэд л хүргэнэ.

⁹Бузар мууг үйлдэгчид таслагдана,Харин ЭЗЭНийг хүсэн хүлээгчид газар нутгийг өвлөх болно.

¹⁰Тун удахгүй хорон санаатан үгүй болно.Чи түүний байх газрыг анхааралтай хайх боловчТэр байхгүй байх болно.

¹¹Харин даруу хүн газар нутгийг өвлөж,Элбэг амар амгалангаар баярлана.

¹²Хорон муу хүн зөв шударга хүний эсрэг хуйвалдаж,Түүн уруу шүдээ хавирдаг.

¹³Түүний өдөр ирж буйг хардаг учраасЭзэн түүнд инээдэг.

¹⁴Зүдрэгсэд ба гачигдагсдыг хөсөр унагаж,Үйлсээрээ шулуун шударга хүмүүсийг алахаарХорон муу хүн илд сугалж, нумаа хөвчилжээ.

¹⁵Тэдний илд өөрсдийнх нь зүрхэнд зоогдож,Нумууд нь хугарах болно.

¹⁶Зөв шударга хүний жаахан юм ньХорон санаат олны элбэг байдлаас хавьгүй дээр юм.

¹⁷Учир нь хорон санаатны гар нь хугалагдана,Харин зөв шударга хүнийг ЭЗЭН дэмждэг.

¹⁸ЭЗЭН гэм зэмгүй хүний өдрүүдийг мэддэг.Тэдний өв мөнхөд байна.

¹⁹Тэд гамшгийн үед ичгүүрт орохгүй бөгөөдӨлсгөлөнгийн өдрүүдэд ч хангалуун байна.

²⁰Харин хорон муу хүн мөхнө.ЭЗЭНий дайснууд бэлчээрийн цэцгүүд мэт болж,Утаа мэт замхардаг.

²¹Хорон муу хүн зээлж, буцаан өгдөггүй.Харин зөв шударга хүн нигүүлсэн өгдөг.

²²Түүгээр ерөөгдөгсөд газар нутгийг өвлөнө,Харин Түүгээр хараагдагсад таслагдана.

²³Хүний алхмууд ЭЗЭНээр тогтоогддог бөгөөдТүүний замд Тэр баярладаг.

²⁴Тэрээр бүдрэвч, газар хөсөр унахгүй. Учир ньЭЗЭН Өөрийн гараар түүнийг түшдэг.

²⁵Би залуугаасаа хөгширтлөөЗөв шударга хүн хаягдахыг,Үр удам нь талх гуйж байхыг үзээгүй.

²⁶Тэр үргэлж нигүүлсэн хайрлаж, зээлүүлдэг.Түүний үр удам нь ерөөлтэй юм.

²⁷Бузраас хагацаж, сайныг үйлд,Тэгвэл чи мөнхөд орших болно.

²⁸Учир нь ЭЗЭН шударга ёсыг хайрладаг бөгөөдӨөрийн бурханлаг хүмүүсийг орхидоггүй.Тэд мөнхөд хамгаалуулсан,Харин хорон муу хүний үр удам таслагдах болно.

²⁹Зөв шударга хүн газар нутгийг өвлөж,Түүнд мөнхөд оршин суух болно.

³⁰Зөв шударга хүний ам нь мэргэн үгийг хэлдэг бөгөөдТүүний хэл нь шударга үгийг өгүүлдэг.

³¹Түүний зүрхэнд Бурханых нь хууль оршдог.Түүний алхамд алдаа байхгүй.

³²Хорон муу хүн зөв шударга хүнийг анаж,Түүнийг хорлох боломжийг хайдаг.

³³ЭЗЭН түүнийг хорон санаатны гарт орхихгүй,Эсвэл шүүгдэх үед нь түүнийг буруушаахгүй.

³⁴ЭЗЭНийг хүлээж, Түүний замаас бүү гар,Тэгвэл газар нутгийг өвлүүлэхээр Тэр чамайг өргөмжилнө.Хорон муу хүн таслагдахад чи үүнийг үзэх болно.

³⁵Төрөлх хөрсөндөө ургаж буй саглагар мод шиг өөрийгөө сагсайлган ургуулдагХорон муу, харгис хүнийг би харсан билээ.

³⁶Тэгээд тэр өнгөрсөн бөгөөд харагтун тэр алга болсон.Би түүнийг хайсан боловч тэр олдоогүй.

³⁷Гэм зэмгүй хүнийг тэмдэглэж,Шулуун шударга хүнийг харагтун.Учир нь амар амгалан хүн сайн сайхныг авна.

³⁸Харин нүгэлтнүүд цөмөөрөө устгагдана.Хорон муу хүний хойч үеийнхэн ч таслагдана.

³⁹Харин зөв шударга хүний аврал ЭЗЭНээс ирдэг.Тэрээр бэрх цагт тэдний хүч чадал юм.

⁴⁰ЭЗЭН тэдэнд тусалж, тэднийг чөлөөлдөг.Тэд Түүний дотор хоргоддог учраасТэр тэднийг хорон муу хүнээс чөлөөлж, авардаг юм.