Hosea 11

¹“A lokacin da Isra'ila yake yaro, na ƙaunace shi,Daga cikin Masar na kirawo ɗana.

²Yawan kiransu, yawan tayarwar da suke yi mini,Sai ƙara miƙa wa Ba'al sadaka suke yi,Suna ƙona turare ga gumaka.

³Ko da yake ni ne na koya wa Ifraimu tafiya.Na ɗauke su a hannuna,Amma ba su sani ni ne na lura da su ba.

⁴Na bishe su da linzamin alheri da ragamar ƙauna,Na zama musu kamar wanda yake ɗauke musu karkiya daga muƙamuƙansu.Na sunkuya, na ciyar da su.

⁵“Ba su koma ƙasar Masar ba,Amma Assuriya za ta zama sarkinsuGama sun ƙi yarda su koma wurina.

⁶Takobi zai ragargaje biranensu,Zai lalatar da sandunan ƙarafan ƙofofinsu,Zai cinye su domin muguwar shawararsu.

⁷Mutanena sun himmantu su rabu da ni,Ko da yake an kira su ga Ubangiji,Ba wanda ya girmama shi.

⁸“Ƙaƙa zan iya rabuwa da ke, ya Ifraimu?Ƙaƙa zan miƙa ki, ya Isra'ila?Ƙaƙa zan maishe ki kamar Adma?Ƙaƙa zan yi da ke kamar Zeboyim?Zuciyata tana motsawa a cikina,Juyayina ya huru.

⁹Ba zan aikata fushina mai zafi ba,Ba zan ƙara hallaka Ifraimu ba,Gama ni Allah ne, ba mutum ba,Maitsarki wanda yake tsakiyarku,Ba zan zo wurinku da hasala ba.

¹⁰“Za su bi Ubangiji,Zai yi ruri kamar zaki, hakika zai yi ruri'Ya'yansa za su zo da rawar jiki da yamma.

¹¹Da sauri za su zo kamar tsuntsaye daga Masar,Kamar kurciyoyi daga ƙasar Assuriya,Zan komar da su gidajensu, ni Ubangiji na faɗa.”

¹²Ubangiji ya ce, “Ifraimu ta kewaye ni da ƙarairayi,Jama'ar Isra'ila kuwa ta kewaye ni da munafuncinta,Yahuza kuma ta tayar wa Allah,Wato tana gāba da Mai Tsarki, mai aminci.