Proverbs 6

¹Ɗana, ka taɓa yin alkawari ka ɗaukar wa wani lamuni?

²Maganganunka sun taɓa kama ka, ko alkawaranka sun taɓa zamar maka tarko?

³To, ɗana, kana cikin ikon wannan mutum, amma ga yadda za ka yi ka fita, sheƙa zuwa wurinsa, ka roƙe shi ya sake ka.

⁴Kada ka yarda ka yi barci ko ka huta.

⁵Ka fita daga cikin tarkon kamar tsuntsu ko barewar da ta tsere wa maharbi.

⁶Bari ragwaye su yi koyi da tururuwa.

⁷Ba su da shugaba, ba su da sarki, ko mai mulki,

⁸amma da kaka sukan tanada wa kansu abinci, domin kwanakin bazara.

⁹Har yaushe rago zai yi ta ɓalɓalcewa? Yaushe zai farka?

¹⁰Yakan ce, “Bari in ɗan ruruma, in naɗa hannuwana in shaƙata.”

¹¹Amma lokacin da yake sharar barci, tsiya za ta auka masa kamar ɗan fashi da makamai.

¹²Sakarkari, wato mugaye sukan yi ta baza jita-jita.

¹³Sukan yi ƙyifce, ko su yi nuni don su yaudare ka.

¹⁴A kowane lokaci suna shirya mugunta a kangararren hankalinsu, suna kuta tashin hankali ko'ina.

¹⁵Saboda wannan masifa za ta fāɗa musu farat ɗaya ba makawa, za a yi musu mummunan raini.

¹⁶16-19 Akwai abu shida, i, har bakwai ma, waɗanda Ubangiji yake ƙi, waɗanda ba zai haƙura da su ba,duban raini,harshe mai faɗar ƙarya,hannuwan da suke kashe marasa laifi,kwanyar da take tunane-tunanen mugayen dabaru,mutum mai gaggawar aikata mugunta,mai yawan shaidar zur,mutum mai ta da fitina a tsakanin abokai.

¹⁷[...]

¹⁸[...]

¹⁹[...]

²⁰Ɗana, ka yi abin da mahaifinka ya faɗa maka, kada ka manta da koyarwar mahaifiyarka.

²¹Kullum ka kiyaye abin da suke faɗa maka, ka kulle su kuma a zuciyarka.

²²Koyarwarsu za ta bi da kai sa'ad da kake tafiya, ta kiyaye ka da dare, ta kuma ba ka shawara da rana.

²³Doka da abubuwan da take koyarwa haske ne mai haskakawa. Tsautawa tana iya koya maka zaman duniya.

²⁴Za ta tsare ka daga mugayen mata, daga kalmomin alfasha da suke fitowa daga bakin matan waɗansu.

²⁵Kada kyansu ya jarabce ka, kada ka faɗa cikin tarkon feleƙensu.

²⁶Mutum ta dalilin karuwa zai sha hasarar abin da ya mallaka duka ta wurin zina.

²⁷Ka iya rungumar wuta a ƙirjinka sa'an nan ka ce ba za ta ƙone tufafinka ba?

²⁸Ka iya tafiya a kan garwashi sa'an nan ka ce ƙafafunka ba za su ƙone ba?

²⁹Haka yake da mutumin da ya kwana da matar wani. Duk wanda ya aikata wannan, zai sha wahala.

³⁰Mutane ba sukan raina wanda ya saci abinci don yana jin yunwa ba,

³¹duk da haka in an kama shi, sai ya biya diyya sau bakwai, tilas kuwa ya ba da dukan abin da yake da shi.

³²Amma mazinaci marar hankali ne, gama hallaka kansa yake yi.

³³Zai sha dūka, a wulakanta shi, zai dawwama cikin kunya.

³⁴Hasalar miji mai kishi babu irinta, ramawarsa ba dama.

³⁵Ba zai karɓi biya ba, ba kyautar da za a yi masa wadda za ta kwantar da fushinsa.