Psalms 116

¹Ina ƙaunar Ubangiji, saboda yana jina,Yana kasa kunne ga addu'o'ina.

²Yakan kasa kunne gare ni,A duk lokacin da na yi kira gare shi.

³Mutuwa ta ɗaure ni da igiyarta tam,Razanar kabari ta auka mini,Na cika da tsoro da alhini.

⁴Sa'an nan sai na yi kira ga Ubangiji, na ce,“Ina roƙonka, ya Ubangiji, ka cece ni!”

⁵Ubangiji mai jinƙai ne, mai alheri,Allahnmu mai rahama ne.

⁶Ubangiji yakan kiyaye kāsassu,Sa'ad da na shiga hatsari ya cece ni.

⁷Kada ki yi shakka, ya zuciyata,Gama Ubangiji yana yi mini alheri.

⁸Ubangiji ya cece ni daga mutuwa,Ya share hawayena,Bai bari a kāshe ni ba.

⁹Don haka nake tafiya a gaban UbangijiA duniyar masu rai.

¹⁰Na dai yi ta gaskatawa, ko da yakeNa ce, “An ragargaza ni sarai.”

¹¹Sa'ad da na ji tsoro na ce,“Ba wanda za a iya dogara gare shi.”

¹²Me zan bayar ga UbangijiSaboda dukan alheransa gare ni?

¹³Zan miƙa hadaya ta sha ga Ubangiji,Ina gode masa domin dā ya cece ni.

¹⁴Zan ba shi abin da na alkawartaA taron dukan jama'arsa.

¹⁵Mutuwar ɗaya daga cikin tsarkakansa,Abu mai daraja ne!

¹⁶Ni bawanka ne, ya Ubangiji,Ina bauta maka yadda mahaifiyata ta yi,Ka 'yantar da ni.

¹⁷Zan miƙa maka hadaya ta godiya,Zan yi addu'ata a gare ka.

¹⁸A taron dukan jama'arka,A shirayun Haikalinka,A Urushalima, zan ba ka abin da na alkawarta.Yabo ya tabbata ga Ubangiji!

¹⁹[...]