Psalms 41

¹Mai farin ciki ne wanda yake kula da matalauta,Ubangiji zai taimake shi sa'ad da yake shan wahala.

²Ubangiji zai kiyaye shi, yă keɓe ransa.Ubangiji zai sa yă ji daɗi a ƙasar,Ba zai bar shi a hannun magabtansa ba.

³Ubangiji zai taimake shi sa'ad da yake ciwoYa mayar masa da lafiyarsa.

⁴Na ce, “Na yi maka zunubi, ya Ubangiji,Ka yi mini jinƙai ka warkar da ni!”

⁵Magabtana suna mugayen maganganu a kaina,Suna cewa, “Yaushe ne zai mutu a manta da shi?”

⁶Masu zuwa su gaishe ni ba da zuciya ɗaya suke zuwa ba,Sukan tattara duk mugun labari a kainaSa'an nan su je su yi ta bazawa ko'ina.

⁷Maƙiyana duk suna raɗa da junansu a kaina,Sukan ɗauka na fi kowa mugunta.

⁸Suna cewa, “Yana ciwon ajali,Ba zai taɓa tashi daga gadonsa ba.”

⁹Har da shaƙiƙin abokina,Wanda na fi amincewa da shi.Wanda muke ci tare, ya juya yana gāba da ni.

¹⁰Ka ji ƙaina ya Ubangiji, ka maido mini da lafiyata,Zan kuwa sāka wa magabtana!

¹¹Zan sani kana jin daɗina,Domin ba za su rinjaye ni ba,

¹²Za ka taimake ni domin ina yin abin da yake daidai,Za ka sa ni a gabanka har abada.

¹³Bari mu yabi Ubangiji, Allah na Isra'ila.Ku yabe shi yanzu da har abada!Amin! Amin!