Psalms 73

¹Hakika, Allah yana yi wa Isra'ila alheri,Da waɗanda suke da tsarkin zuciya!

²Amma ina gab da fāɗuwa,Ƙafafuna sun kusa zamewa,

³Saboda na ji kishin masu girmankai,Sa'ad da na ga mugaye suna arziki.

⁴Ba su jin zafin ciwo,Su ƙarfafa ne, lafiyayyu.

⁵Ba su shan wahala yadda sauran mutane suke sha,Ba su da wahala kamar sauran mutane,

⁶Don haka suka ɗaura girmankai kamar dutsen wuya,Suka sa hargitsi kuma kamar riga.

⁷Zuciyarsu, cike take da mugunta,Tunaninsu kuma cike suke da mugayen ƙulle-ƙulle.

⁸Sukan yi wa waɗansu ba'a,Suna faɗar mugayen abubuwa,Masu girmankai ne su, suna shawaraA kan yadda za su zalunci waɗansu.

⁹Sukan faɗi baƙar magana a kan Allah na Sama,Su ba da umarnai na girmankai ga mutane a duniya,

¹⁰Har jama'ar Allah ma sukan koma wurinsu,Suna ɗokin gaskata dukan abin da suke faɗa musu.

¹¹Sukan ce, “Ai, Allah ba zai sani ba,Maɗaukaki ba zai bincika ba!”

¹²Haka mugaye suke.Suna da dukiya da yawa, amma sai ƙaruwa suke ta yi.

¹³Ashe, a banza nake kiyaye kaina da tsarki,Hannuwana kuma a tsabtace daga zunubi?

¹⁴Ya Allah, ka sa ina shan wahala dukan yini,Kana horona kowace safiya!

¹⁵Da na faɗi waɗannan abubuwa,Da na zama marar gaskiya ga jama'arka.

¹⁶Don haka na yi iyakar ƙoƙari in fahimci wannan,Ko da yake ya cika wuya,

¹⁷Sai sa'ad da na shiga Haikalinka,Sa'an nan na fahimci abin da zai sami mugaye.

¹⁸Hakika ka sa su a wurare masu santsi,Ka sa su su fāɗi su hallaka sarai!

¹⁹Cikin ƙyaftawar ido aka hallaka su,Suka yi mummunan ƙarshe!

²⁰Ya Ubangiji, kamar mafarki sukeWanda akan manta da shi da safe,Sa'ad da mutum ya farka yakan manta da kamanninsa.

²¹Sa'ad da zuciyata ta ɓaci,Hankalina ya tashi,

²²Sai na zama wawa, ban fahimta ba,Na nuna halin dabba a gabanka.

²³Duk da haka ina tare da kai kullayaumin,Kana riƙe da hannuna.

²⁴Shawararka, tana bi da ni,Daga ƙarshe kuma za ka karɓe ni da daraja.

²⁵In banda kai, wa nake da shi a Sama?Tun da yake ina da kai, me kuwa nake bukata a duniya?

²⁶Kwanyata da jikina za su raunana,Amma Allah ne ƙarfina,Shi nake so har abada!

²⁷Hakika waɗanda za su rabu da kai za su mutu,Za ka hallakar da marasa aminci gare ka.

²⁸Amma a gare ni, ya fi mini kyau, in kasance kusa da Allah!Na sami mafaka a wurin Ubangiji Allah,Da zan yi shelar dukan abin da ya aikata.