Hebrews 1

¹Anepo kala Nnungu átangwele na anyakala vetu kwa myanda yohe na kwa namuna dyohe kupitila manabii vake.

²Henga mmaduva alano la ntululilo àtangwele na hwetu kupitila Yesu Mwanawe, wantandwele ààve mwene mapala la vitukutuku vyammalele, na kwa kupitila nang'e, Nnungu ániviumba vitukutuku vya kumahunde na pachilambo chammalele.

³Nang'e njo ing'anyimi ya ukulu wanga Nnungu, na njo nfano uhiu wanga Nnungu mwene. Kwa kuva, Mwana wanga Nnungu àvihululiha vitukutuku vyammalele vihwenehe kupwawa kwa dimongo dya lilove lyake. Ánivahahula vanu masambi lavo, na pamalidile nkuikala aneko kulihunde, m'bali wa kunkono wa Nnungu, mumamulaka lake Nnungu Avêle na Ukulu.

⁴Anelo làlanguja kuva Mwana wanga Nnungu nni nkulu kupunda malaika malinga lina lyake lyapewije na Nnungu chilivele likulu kupunda malina lavo.

⁵Kwa kuva, Nnungu nanga panawahite kananga mwanda umo kunnyaulila yumo wa malaika vake kuva, “Wako ni Mwanangu, nangu nelo ngùjukile kuva Atatako.” Na wala nanga panatangwele malove alano kumwamba malaika woheyo kuva, “Nangu nìmbekuva Atatake, na nang'e àmbekuva Mwanangu.”

⁶Tena, Nnungu pantumile pachilambo Mwanawe chihungumikova, ávahaulidile malaika vake vammalele vamwabudu Mwanawe.

⁷Henga kuyamba malaika, Nnungu ànitangola kupitila ntumishi wake kuva, “Nnungu àvatuma malaika vake kuva muchi mpapa, na àvatuma kuva muchi dindimi dya moto.”

⁸Henga Nnungu ánitangola kumwamba Mwanawe kuva, “Ufalume wako Nnungu ukámbekuva na ntululilo. Na wako ùvatawala vanu vako kwa haki.

⁹Wako ùkatapaliwa na haki na kulachima lahakalenge. Njo mana Nnungu, Nnungu wako ànikutandola kuva nkulu wa avako vammalele, na kukukung'unila ihangaladi.”

¹⁰Uchocho, Nnungu átangwele kuva, “Wako Nang'olo, anepo patandi waumbile chilambo chammalele, na kwa makono lako waniumba kumahunde.

¹¹Anevyo vyammalele vìmbepita, henga wako ùmbekuva chihi nkupwawa. Na vyammalele vìmbekwondongeka muchi inguwo.

¹²Anevyo vyammalele ùmbevidinga muchi likoti, na kuvibadili muchi dinguwo. Henga wako ùùva chihi uchocho chuvele, na umi wako ukambekuva na ntululilo.”

¹³Nnungu nanga panannyaulidile kananga yumo wa malaika vake kuva, “Ikala mumamulaka langu, m'bali wangu wa kunkono, mpaka panimbevatenda amongo vako kuva muchi viteng'u vya kuvika makumbatu lako.”

¹⁴Dachi, malaika nni vanani? Anevo vammalele nni viumbe vya chinnungu vintumikîla Nnungu na kutumwa unavayangata vanu avala vambeupwechêla upohi.