1 Chronicles 27

¹Na rĩrĩ, ciana cia Isiraeli, o ta ũrĩa ũhoro wacio wa gũtarũo watariĩ, naguo ũguo nĩ ta kuuga andũ arĩa anene thĩinĩ wa nyũmba cia maithe mao, o na anene arĩa maathaga andũ ngiri o ngiri, o na igana o igana, me na anene ao a gwathana, o acio maatungatagĩra mũthamaki maũndũ-inĩ o na marĩkũ marĩa maarĩ ma ituanĩra rĩa mweri o mweri, mĩeri-inĩ yothe ya mwaka mũgima-rĩ, maarĩ andũ ngiri mĩrongo ĩĩrĩ na inya, o ituanĩra.

²Na rĩrĩ, mũrori wa ituanĩra rĩa mbere rĩa mweri wa mbere nĩ Jashobeamu, mũrũ wa Zabidieli; narĩo ituanĩra-inĩ rĩake kwarĩ andũ ngiri mĩrongo ĩĩrĩ na inya.

³Ũcio aarĩ wa ciana cia Perezu, na nĩwe warĩ mũnene wa anene othe a mbũtũ cia ita mweri wa mbere.

⁴Nake mũrori wa ituanĩra rĩa mweri wa kerĩ nĩ Dodai, Mũahohi; narĩo ituanĩra-inĩ rĩake-rĩ, Mikilothu nĩwe warĩ mũtongoria; o narĩo ituanĩra-inĩ rĩu rĩake kwarĩ andũ ngiri mĩrongo ĩĩrĩ na inya.

⁵Nake mũnene wa gatatũ wa mbũtũ ya ita mweri wa ĩtatũ, nĩ Benaia, mũrũ wa Jehoiada, mũthĩnjĩri-Ngai ũrĩa mũnene; narĩo ituanĩra-inĩ rĩake kwarĩ andũ ngiri mĩrongo ĩĩrĩ na inya.

⁶Nake Benaia ũcio nĩwe warĩ njamba mũno wa andũ arĩa mĩrongo ĩtatũ, na nĩwe warĩ mũnene wa acio mĩrongo ĩtatũ; o nake Amizabadi, mũrũwe, aarĩ wa ituanĩra-inĩ rĩake.

⁷Nake mũnene wa gwathana wa kana wa mweri wa ĩna, nĩ Asaheli, mũrũ wa nyina na Joabu; o nake Zebadia, mũrũwe, nĩwe wamũrũmĩrĩire, narĩo ituanĩra-inĩ rĩake kwarĩ andũ ngiri mĩrongo ĩĩrĩ na inya.

⁸Nake mũnene wa gwathana wa gatano, wa mweri wa ĩtano, nĩ Shamuhuthu, Mũizirahi; narĩo ituanĩra-inĩ rĩake kwarĩ andũ ngiri mĩrongo ĩĩrĩ na inya.

⁹Na rĩrĩ, mũnene wa gwathana wa gatandatũ, wa mweri wa ĩtandatũ, nĩ Ira, mũrũ wa Ikeshu, Mũtekoa; narĩo ituanĩra-inĩ rĩake kwarĩ andũ ngiri mĩrongo ĩĩrĩ na inya.

¹⁰Nake mũnene wa gwathana wa mũgwanja, wa mweri wa mũgwanja, nĩ Helezu, Mũpeloni, wa ciana cia Efiraimu; narĩo ituanĩra-inĩ rĩake kwarĩ andũ ngiri mĩrongo ĩĩrĩ na inya.

¹¹Nake mũnene wa gwathana wa kanana, wa mweri wa ĩnana, nĩ Sibekai, Mũhushathi, wa Azera; narĩo ituanĩra-inĩ rĩake kwarĩ andũ ngiri mĩrongo ĩĩrĩ na inya.

¹²Nake mũnene wa gwathana wa kenda, wa mweri wa kenda, nĩ Abiezeri, Mũanathothu, wa Abenjamini; narĩo ituanĩra-inĩ rĩake kwarĩ andũ ngiri mĩrongo ĩĩrĩ na inya.

¹³Nake mũnene wa gwathana wa ikũmi, wa mweri wa ikũmi, nĩ Maharai, Mũnetofathi, wa Azerahi; narĩo ituanĩra-inĩ rĩake kwarĩ andũ ngiri mĩrongo ĩĩrĩ na inya.

¹⁴Nake mũnene wa gwathana wa ikũmi na ũmwe, nĩ ũndũ wa mweri wa ikũmi na ũmwe, nĩ Benaia, Mũpirathoni, wa ciana cia Efiraimu; narĩo ituanĩra-inĩ rĩake kwarĩ andũ ngiri mĩrongo ĩĩrĩ na inya.

¹⁵Nake mũnene wa gwathana wa ikũmi na erĩ, wa mweri wa ikũmi na ĩĩrĩ, nĩ Helidai, Mũnetofathi wa mbarĩ ya Othinieli; narĩo ituanĩra-inĩ rĩake kwarĩ andũ ngiri mĩrongo ĩĩrĩ na inya.

¹⁶O na ningĩ-rĩ, andũ arĩa maaroraga mĩhĩrĩga ya Isiraeli nĩ aya: wa Areubeni, nĩ Eliezeri wa Zikiri warĩ mwathani; nake wa Asimeoni, nĩ Shefatia, mũrũ wa Maaka;

¹⁷o nake wa Alawii, nĩ Hashabia mũrũ wa Kemueli; na wa Haruni, nĩ Zadoku;

¹⁸na wa Juda, nĩ Elihu, ũrĩa warĩ wa ariũ a ithe na Daudi; na wa Isakaru, nĩ Omuri, mũrũ wa Mikaeli;

¹⁹na wa Zebuluni, nĩ Ishimaia, mũrũ wa Obadia; na wa Nafitali, nĩ Jeremothu, mũrũ wa Azirieli;

²⁰na wa ciana cia Efiraimu, nĩ Hoshea, mũrũ wa Azazia; na wa nuthu ĩmwe ya mũhĩrĩga wa Manase, nĩ Joeli, mũrũ wa Pedaia;

²¹nake wa nuthu ĩrĩa ĩngĩ ya mũhĩrĩga o ro ũcio wa Manase, kũu Gileadi, nĩ Ido, mũrũ wa Zekaria; na wa Benjamini nĩ Jaasieli mũrũ wa Abineri;

²²na wa Dani, nĩ Azareli, mũrũ wa Jerihamu. Acio nĩo maarĩ anene a mĩhĩrĩga ya Isiraeli.

²³No rĩrĩ, Daudi ndaigana gũtara arĩa maarĩ a mĩaka mĩrongo ĩĩrĩ, o na arĩa maarĩ thutha wao, nĩ gũkorũo Jehova nĩoigĩte atĩ nĩakaingĩhia Isiraeli matuĩke o ta njata cia igũrũ.

²⁴Nake Joabu, mũrũ wa Zeruia, nĩaambĩrĩirie kũmatara, no ndaigana kũrĩkia; naguo ũndũ ũcio wa gũtara andũ ũgĩtũma Isiraeli makinyĩrio marakara ma Jehova; naguo ũhoro wa ũrĩa andũ acio maaiganire maatarũo-rĩ, ndũigana kwandĩkwo ibuku-inĩ rĩa maũndũ ma ihinda rĩa mũthamaki Daudi.

²⁵Na rĩrĩ, mũrori kũndũ kũrĩa kwaigagwo mũthithũ wa indo cia bata kwa mũthamaki nĩ Azimavethu, mũrũ wa Adieli; o nake mũrori kũndũ kũrĩa kwaigagwo indo cia bata kũu mĩgũnda, o na matũũra-inĩ, na tũtũũra-inĩ, o na nyũmba-inĩ cia hinya iria ciakĩtwo ndaya na igũrũ-rĩ, nĩ Jonathani mũrũ wa Uzia;

²⁶o nake mũrori andũ arĩa maarutaga wĩra wa kũrĩma mĩgũnda, nĩ Eziri, mũrũ wa Kelubu;

²⁷o nake mũrori mĩgũnda ya mĩthabibu nĩ Shimei, Mũramathi; o nake mũrori wa maciaro ma mĩgũnda ya mĩthabibu kũndũ kũrĩa ndibei yaigagwo nĩ Zabadi, Mũshifimi;

²⁸nake mũrori mĩtamaiyũ na mĩborothandi ĩrĩa yarĩ bũrũri ũrĩa mũgũu nĩ Baali-hanani, Mũgederi; o nake mũrori kũndũ kũrĩa kwaigagwo maguta nĩ Joashu;

²⁹o nake mũrori ndũru cia ng’ombe iria ciarĩithagio Sharoni, nĩ Shitirai, Mũsharoni; o nake mũrori wa ndũru cia ng’ombe iria ciarĩ cianda-inĩ nĩ Shafati, mũrũ wa Adilai;

³⁰o nake mũrori ngamĩra, nĩ Obili, Mũishumaeli; o nake mũrori ndigiri nĩ Jedeia, Mũmeronothi;

³¹o nake mũrori ndũru cia mbũri nĩ Jazizi, Mũhagari. Andũ acio othe-rĩ, nĩo maarĩ arori indo iria cia mũthamaki Daudi.

³²O nake Jonathani, ithe mũnyinyi wa Daudi, aarĩ mũheani kĩrĩra, nake aarĩ mũndũ mũmenyi maũndũ, o na mwandĩki-marũa; nake Jehieli, mũrũ wa Hakimoni, nĩwe waikaranagia na ariũ a mũthamaki;

³³nake Ahithofeli, nĩwe waheaga mũthamaki kĩrĩra; nake Hushai, Mũariki, nĩwe warĩ wathiomowe wa mũthamaki;

³⁴nao arĩa maarũmĩrĩire Ahithofeli nĩ Jehoiada, mũrũ wa Benaia, na Abiatharu; nake mũnene wa ita cia mũthamaki nĩ Joabu.