1 Corinthians 12

¹NA rĩu, ariũ a Ithe witũ-rĩ, ha ũhoro wa maũndũ marĩa magĩagwo namo ma kĩĩroho-rĩ, ndikwenda mũrigwo nĩ ũrĩa ũtariĩ.

²Mũtiũĩ atĩ rĩrĩa mwatũire mũrĩ o andũ a Ndũrĩrĩ nĩmwatwaragĩrĩrio ũhoro-inĩ wa mĩhianano ĩrĩa ĩtaaragia, o na harĩa hothe mũngĩrorio naho?

³Tondũ ũcio nĩngwenda kũmũmenyithia atĩrĩ, atĩ mũndũ ũkwaria arĩ na Roho wa Ngai-rĩ, gũtirĩ ũngiuga, Jesu arogwatwo nĩ kĩrumi! O na gũtirĩ mũndũ ũngĩhota kuuga atĩ Jesu nĩwe Mwathani atarĩ na Roho Mũtheru.

⁴Na rĩrĩ, iheo iria iheanagwo ciumanĩte na Wega wa Ngai nĩ mĩthemba mĩthemba, no rĩrĩ, Roho mwene cio no ũmwe.

⁵Mĩtungatĩre o nayo nĩ mĩthemba mĩthemba, na Mwathani mwene yo no ũmwe.

⁶O nayo mĩĩkĩre ya maũndũ nĩĩtiganĩte mĩthemba, ĩndĩ Ngai no ũmwe, ũcio wĩkithagia maũndũ macio mothe thĩinĩ wa andũ othe.

⁷No rĩrĩ, mũndũ o mũndũ aheagwo ũndũ wake ũrĩa wonanagia atĩ arĩ na Roho nĩ getha ũndũ ũcio ũgune andũ othe.

⁸Tondũ wa kũheo nĩ Roho-rĩ, mũndũ ũmwe agĩaga na ũhoro wa kwaria ũrĩ ũũgĩ; ũngĩ akagĩa na ũhoro ũrĩ ũmenyi mũkinyanĩru werekanĩrĩire na wa Roho o ro ũcio;

⁹nake ũngĩ akaheo wĩtĩkio, nĩ ũndũ wa Roho o ro ũcio; ũngĩ akaheo ũhoti wa kũhonania mĩrimũ, no ũndũ wa Roho o ũcio ũmwe;

¹⁰ũngĩ nake akaheo ũhoti wa kũringa ciama, ũngĩ ũrathi, ũngĩ ũhoti wa gũkũũrana maroho; ũngĩ gũthioma thiomi, na ũngĩ ũtaũri ahote gũtaũra thiomi icio.

¹¹No rĩrĩ, maũndũ macio mothe no wĩra wa Roho o ro ũcio ũmwe, akigayagĩra andũ o ta ũrĩa ekwenda, o mũndũ mwanya, o mũndũ mwanya.

¹²Amu-rĩ, o ta ũrĩa mwĩrĩ wa mũndũ ũrĩ na ciĩga nyingĩ, na mwĩrĩ ũcio no ũmwe, nacio ciĩga ciothe ciaguo, o na ciatuĩka nĩ nyingĩ, no mwĩrĩ o ũmwe-rĩ, ũguo no taguo ũhoro wa Kristo ũtariĩ.

¹³Nĩ gũkorũo ithuĩ twabatithirio ithuothe nĩ ũndũ wa Roho o ũmwe tũtuĩke mwĩrĩ o ũmwe, tũrĩ Ayahudi, kana tũrĩ Ayunani, o na kana twĩ ngombo kana tũtarĩ ngombo; na ithuothe tũgĩkĩnyuithio Roho o ũmwe.

¹⁴Amu mwĩrĩ-rĩ, ti wa kĩĩga kĩmwe, nĩ wa ciĩga nyingĩ.

¹⁵Kũgũrũ kũngiuga, Tondũ ti niĩ guoko-rĩ, niĩ ndikĩrĩ wa mwĩrĩ ũyũ-rĩ, ũguo ndũngĩtũma kwage gũtuĩka kwaguo.

¹⁶Nakuo gũtũ kũngiuga, Na niĩ, tondũ ti niĩ riitho-rĩ, niĩ ndikĩrĩ wa mwĩrĩ ũyũ-rĩ, ũguo ndũngĩtũma kwage gũtuĩka kwaguo.

¹⁷Mwĩrĩ wothe ũngĩtuĩka no riitho itheri-rĩ, kũigua twakĩiguaga na kĩ? Ningĩ mwĩrĩ wothe ũngĩtuĩka no gũtũ gũtheri gwa kũigua nakuo-rĩ, ĩ kũnungĩra twakĩnungagĩra na kĩ?

¹⁸No rĩrĩ, ũrĩa kũrĩ nĩ atĩ Ngai nĩekĩrire o kĩĩga thĩinĩ wa mwĩrĩ o harĩa endete gĩikare.

¹⁹Na rĩrĩ, ciothe ingĩtuĩka no kĩĩga kĩmwe-rĩ, mwĩrĩ naguo wakĩgĩa ha?

²⁰No ũrĩa kũrĩ, nĩ atĩ ciĩga nĩ nyingĩ, no mwĩrĩ nĩ ũmwe.

²¹Narĩo riitho rĩtingĩhota kwĩra guoko atĩrĩ, Niĩ ndirĩ na bata nawe; kana mũtwe naguo wĩre magũrũ, Niĩ ndirĩ na bata na inyuĩ.

²²No makĩria mũno, ciĩga cia mwĩrĩ iria cionagwo ii njacu kũrĩ iria ingĩ-rĩ, nĩcio itangĩtigĩka;

²³na mĩĩrĩ iitũ kũrĩa tuonaga ta gũtarĩ gwa gũtĩwo mũno, kũu nĩkuo tũheaga gĩtĩo kĩnene makĩria, harĩa honagwo ta harĩ thoni hagagĩtuwo haagĩrĩru gũkĩra kũrĩa kũngĩ;

²⁴ĩndĩ harĩa hathaka hatirĩ ũndũ habataire gwĩkwo. Mwĩrĩ-rĩ, Ngai nĩ kũũiguithania aũiguithanĩtie, harĩa hatingiarĩtie agakĩhahe gĩtĩo makĩria ma harĩa hangĩ,

²⁵nĩ getha mwĩrĩ: ndũkagĩe na ũndũ ũngĩwamũkania, no atĩ ciĩga ciaguo imenyanagĩrĩre, o kĩĩga na kĩrĩa kĩngĩ.

²⁶Na kĩĩga kĩmwe kĩngĩkorũo gĩkĩnyarirĩka, ciĩga iria ingĩ ciothe nĩinyarirĩkaga hamwe nakĩo. Na kĩĩga kĩmwe kĩngĩkorũo kĩheetwo gĩtĩo-rĩ, ciĩga iria ingĩ ciothe igagĩkenanĩra hamwe nakĩo.

²⁷Rĩu-rĩ, inyuĩ nĩ inyuĩ mwĩrĩ wa Kristo, nake mũndũ o mũndũ wanyu: nĩ kĩĩga kĩaguo.

²⁸O na thĩinĩ wa kanitha, Ngai nĩekĩrĩte andũ amwe matuĩke o mbere atũmwo, a kerĩ anabii, a gatatũ arutani; na thutha wa ũguo kũgĩe na ũringi wa ciama, ningĩ iheo cia ũhonania wa mĩrimũ, na maũndũ ma ũteithania, na ma ũtabarĩri, o na ũhoro wa gũthioma thiomi.

²⁹No anga andũ othe marĩ atũmwo? No anga othe marĩ anabii? No anga othe marĩ arutani? Othe nĩ aringi a ciama?

³⁰Othe nĩ ahe iheo cia ũhonania? Othe nĩmagĩthiomaga thiomi? Othe nĩmakĩhotaga gũtaũranĩra thiomi icio?

³¹No rĩrĩ, wĩriragĩriei kũheo iheo ciumanĩte na wega wa Ngai iria ikĩrĩte iria ingĩ. Na hamwe na ũguo-rĩ, nĩngũcoka kũmuonia njĩra ĩngĩ, ĩrĩa njega makĩria.