1 Kings 20

¹Na rĩrĩ, Beni-hadadi, mũthamaki wa Suriata, agĩcokanĩrĩria mbũtũ ciake ciothe cia ita; na hagĩkĩgĩa athamaki mĩrongo ĩtatũ na erĩ me hamwe nake, o na mbarathi na ngari cia ita; nake akĩambata, akĩrigicĩria Samaria arĩtunyane, akĩhũrana narĩo.

²Nake agĩkĩrekia andũ mathiĩ kũu itũũra rĩu thĩinĩ kwĩ Ahabu, mũthamaki wa Isiraeli, makamwĩre atĩrĩ, Beni-hadadi oiga ũũ:

³Betha ciaku na thahabu ciaku nĩ ciakwa; o na atumia aku no akwa, o nacio ciana ciaku iria njega mũno wĩ nacio nĩ ciakwa.

⁴Nake mũthamaki wa Isiraeli agĩgĩcokia akiuga atĩrĩ, Ĩĩ, ũguo uugĩte noguo, mũthamaki ũyũ mwathi wakwa; niĩ ndĩ waku, o na indo ciothe iria ndĩ nacio no ciaku.

⁵Nao andũ acio maareketio magĩthiĩ kuo rĩngĩ, makiuga atĩrĩ, Ũhoro ũyũ nĩguo Beni-hadadi aarĩtie, akoiga atĩrĩ, Ti-itherũ nĩndakũrekeirie andũ ngiuga atĩrĩ, Nĩũkũ’nengera betha ciaku, na thahabu ciaku, o na atumia aku, o na ciana ciaku;

⁶no rĩrĩ, rũciũ nĩngakũrekeria ndungata ciakwa, ihinda o ta rĩrĩ, ciũke ciururie nyũmba yaku, o na nyũmba cia ndungata ciaku; na nĩgũgakinya atĩrĩ, atĩ kĩndũ kĩrĩa gĩothe gĩkwendeka nĩ maitho maku, nĩmagakĩoya mathiĩ nakĩo.

⁷Nake mũthamaki wa Isiraeli agĩgĩĩta athuri othe a bũrũri wake, akĩmera atĩrĩ, Rĩu ndamũthaitha ta barai muone ũrĩa mũndũ ũyũ acarĩtie rũũgiti; nĩ ũndũ andekeirie andũ akanjĩtia atumia akwa, na ciana ciakwa, na betha ciakwa, o na thahabu ciakwa; na icio ciothe ndimũregeire.

⁸Nao athuri acio othe, na andũ ake othe, makĩmwĩra atĩrĩ, Menya ũigue ũguo oigĩte, kana wĩtĩkĩre.

⁹Tondũ ũcio agĩkĩĩra andũ acio maareketio nĩ Beni-hadadi atĩrĩ, Ĩrai mũthamaki ũcio mwathi wakwa ũũ: Maũndũ mothe marĩa wandekanĩirie niĩ, ndungata yaku, hĩndĩ ya mbere-rĩ, nĩngũmeka; no rĩrĩ, ũndũ ũyũ wa rĩu ndingĩwĩka. Nao areio acio magĩgĩthiĩ, makĩmũcokeria ũhoro.

¹⁰Ningĩ Beni-hadadi akĩmũrekeria mũndũ, akiuga atĩrĩ, ngai ciakwa iro’thũũra, o na ikĩrĩrĩrie gũ’thũũra, rũkũngũ rũa Samaria rũngĩigania andũ othe arĩa manũmĩrĩire, atĩ nĩguo o mũndũ wao arũrũme ngundi ĩmwe.

¹¹Nake mũthamaki wa Isiraeli agĩgĩcokia akiuga atĩrĩ, Mwĩrei atĩrĩ, Nĩ kaba mũndũ ũrĩa ũkwĩoha indo ciake cia mbaara atige kwĩgatha ta mũndũ ũrĩa ũgũciohora.

¹²Na gũgĩkinya atĩrĩ, atĩ hĩndĩ ĩrĩa Beni-hadadi aaiguire ũhoro ũcio aatwarĩirũo, tondũ nĩ kũnyua aanyuaga njohi me na athamaki acio maarĩ nake hema-inĩ-rĩ, akĩĩra ndungata ciake atĩrĩ, Wĩthabei. Nao magĩĩthaba nĩguo makahũre itũũra rĩu.

¹³Na atĩrĩrĩ, mũnabii ũmwe agĩkuhĩhĩria Ahabu, mũthamaki wa Isiraeli, akĩmwĩra atĩrĩ, Jehova oigĩte ũũ: Nĩũrona kĩrĩndĩ gĩkĩ gĩothe kĩingĩ ũũ? Atĩrĩrĩ, nĩngũkĩrekereria ndĩkĩneane moko-inĩ maku ũmũthĩ; nawe nĩũkũmenya atĩ nĩ niĩ Jehova.

¹⁴Nake Ahabu agĩkĩũria atĩrĩ, Na ũndũ wa ũ? Nake akiuga atĩrĩ, Jehova oigĩte ũũ: Na ũndũ wa muumo wa anene a ng’ongo cia bũrũri waku. Ningĩ akĩũria atĩrĩ, Nũ ũgũtata ita? Agĩgĩcokia atĩrĩ, Nĩwe.

¹⁵Agĩgĩcokanĩrĩria muumo wa anene a ng’ongo, naguo warĩ andũ magana merĩ ma mĩrongo ĩtatũ na erĩ; na thutha wa acio, agĩcokereria andũ arĩa angĩ othe, naguo ũguo nĩ ta kuuga ciana cia Isiraeli ciothe, marĩ andũ ngiri m��gwanja.

¹⁶Nao magĩkiumagara mĩaraho. No rĩrĩ, Beni-hadadi nĩ kũnyua aanyuaga njohi, na aarĩ mũrĩu, arĩ hema-inĩ hamwe na athamaki, o acio mĩrongo ĩtatũ na erĩ arĩa maarĩ a kũmũteithia.

¹⁷Naguo muumo ũcio wa anene a ng’ongo cia bũrũri wa Ahabu ũkĩamba kuumagara; nake Beni-hadadi akĩrekania, nao andũ magĩcoka makĩmũhe ũhoro, makĩmwĩra atĩrĩ, Nĩ harĩ andũ maroka moimĩte Samaria.

¹⁸Nake agĩkiuga atĩrĩ, Mangĩkorũo mokĩte macirĩire kũgĩe thayũ-rĩ, magwatei mĩgwate; kana hihi mangĩkorũo mokĩte macirĩire kũgĩe mbaara-rĩ, nĩmagwatwo mĩgwate.

¹⁹Nao andũ acio magĩkiumagara moimĩte itũũra-inĩ, o muumo ũcio wa anene a ng’ongo cia bũrũri ũcio, o na athigari a ita arĩa maamoimĩte thutha.

²⁰Nao o mũndũ agĩkĩũraga mũndũ wake; nao Asuriata magĩkĩũra, Aisiraeli magĩkĩmateng’eria; no Beni-hadadi, mũthamaki wa Suriata, akĩhaica mbarathi akĩĩhonokia, me hamwe na andũ ake arĩa maathiaga mahaicĩte mbarathi.

²¹Nake mũthamaki wa Isiraeli akiumagara, akĩhũranĩria mbarathi na ngari cia ita, agĩkĩũraga Asuriata rĩũragana inene mũno.

²²Nake mũnabii ũcio agĩcoka agĩthengerera mũthamaki wa Isiraeli, akĩmwĩra atĩrĩ, Thiĩ ũgethagathage, na wĩbarĩrĩre wega ũmenye ũrĩa ũgeka; nĩ ũndũ mwaka ũyũ ũngĩ ũgĩũka kwambĩrĩrio, mũthamaki ũcio wa Suriata nĩagoka kũhũrana nawe.

²³Na rĩrĩ, ndungata cia mũthamaki wa Suriata ikĩmwĩra atĩrĩ, Ngai yao nĩ ngai ya irĩma-inĩ, na ũndũ ũcio nĩguo watũmire magĩe na hinya kũrĩ ithuĩ; no rĩrĩ, reka tũkarũĩre nao kũndũ kwaraganu, na ti-itherũ nĩtũkũmakĩria hinya.

²⁴Na wĩke atĩrĩ, weherie athamaki acio, o mũndũ ũmũthengie handũ hake, ũcokie anene a mbũtũ cia ita mathenya mao;

²⁵ũcoke wĩtarĩre athigari a ita maigana o ta arĩa aku moragirũo, ũcokie mbarathi ithenya rĩa mbarathi ĩrĩa yothe yũrĩte, o nayo ngari ũmĩcokie ithenya rĩa ĩrĩa yothe yũrĩte o ro ũguo; na tũkahũranĩra nao kũndũ kwaraganu, na tũtirĩ hingo tũtakamakĩria hinya. Nake akĩigua uuge wao, agĩĩka o ta ũguo.

²⁶Na gũgĩkinya atĩrĩ, atĩ mwaka ũyũ ũngĩ ũgĩũka kwambĩrĩrio-rĩ, Beni-hadadi agĩcokereria Asuriata, akĩambata agĩkinya Afeki, akahũrane na Isiraeli.

²⁷Nacio ciana cia Isiraeli igĩcokanĩrĩrio, igĩtumwo rĩĩgu, igĩgĩthiĩ kũhũrana nao; nacio ciana icio cia Isiraeli ikĩamba hema ciacio ing’ethanĩire nao, ihaana o ta tũrũũru twĩrĩ tũnini twa tũũri tũtheri; no rĩrĩ, Asuriata maaiyũrĩte bũrũri ũcio wothe.

²⁸Na rĩrĩ, mũndũ ũmwe wa Ngai agĩkuhĩhĩria mũthamaki wa Isiraeli, akĩaria nake akĩmwĩra atĩrĩ, Jehova oigĩte ũũ: Tondũ Asuriata moigĩte ciugo ici: Jehova nĩ Ngai wa irĩma-inĩ, no ti Ngai wa kũndũ kwaraganu-rĩ, tondũ wa ciugo icio nĩngũrekereria kĩrĩndĩ gĩkĩ gĩothe ndĩkĩneane moko-inĩ maku, na inyuĩ nĩmũkũmenya atĩ nĩ niĩ Jehova.

²⁹Nao magĩgĩikara hema-inĩ ciao matukũ mũgwanja mang’ethanĩire. Na gũgĩkinya atĩrĩ, atĩ mũthenya wa mũgwanja mbaara ĩgĩthenganĩrĩrũo nĩguo ĩhũranwo; nacio ciana cia Isiraeli ikĩũraga Asuriata arĩa maathiaga na magũrũ ngiri igana rĩmwe mũthenya o ro ũmwe.

³⁰No arĩa angĩ makĩũra magĩkinya Afeki, magĩtonya itũũra; naruo rũthingo rũarĩo rũkĩgũĩra andũ ngiri mĩrongo ĩĩrĩ na mũgwanja thĩinĩ wa andũ arĩa maatigarĩte. Nake Beni-hadadi akĩũra, agĩthiĩ itũũra thĩinĩ, agĩtonya nyũmba yarĩ na kanyũmba ga thĩinĩ o thĩinĩ mũno ma.

³¹Nacio ndungata ciake ikĩmwĩra ũũ: Atĩrĩrĩ, tũiguĩte atĩ athamaki a nyũmba ya Isiraeli nĩmaiguanagĩra tha mũno; twagũthaitha ũreke twĩohe nguo cia makũnia njohero, o na twĩĩkĩre mĩhĩndo mĩtwe, tuumagare, tũthiĩ kwĩ mũthamaki wa Isiraeli; hihi no gũkorũo nĩegũkũhonokia ũtũũre muoyo.

³²Tondũ ũcio magĩkĩĩoha nguo cia makũnia njohero, na magĩĩkĩra mĩhĩndo mĩtwe, magĩthiĩ magĩkinya kwĩ mũthamaki wa Isiraeli, makĩmwĩra atĩrĩ, Ndungata yaku Beni-hadadi yoiga atĩrĩ, Ndagũthaitha ũreke ndũũre muoyo. Nake Ahabu akiuga atĩrĩ, Githĩ o na rĩu arĩ muoyo? Ũcio nĩ mũrũ wa awa.

³³Nao andũ acio makĩbarĩrĩra ũhoro ũcio na kĩyo, magĩkĩhiũha kũnyita mĩario ĩo yake, nĩguo mamenye kana nĩĩringanĩte na meciria make, magĩkiuga atĩrĩ, Ĩĩ, ũcio mũrũ wa thoguo, Beni-hadadi. Agĩgĩcoka akiuga atĩrĩ, Thiĩi mũmũndehere. Beni-hadadi agĩkiuma, agĩthiĩ harĩ we; nake Ahabu akĩmũhaicithia ngari-inĩ yake thĩinĩ.

³⁴Nake Beni-hadadi akĩmwĩra atĩrĩ, Matũũra marĩa baba aatunyire thoguo nĩngũgũcokeria; nawe ũcoke wĩthondekithĩrie handũ ha wonjoria kũu Dameski, o ta ũrĩa baba ethondekithĩirie Samaria. Nake Ahabu agĩkiuga atĩrĩ, Niĩ o na niĩ nĩngũreka ũthiĩ, tũrĩkanĩrĩte kĩrĩkanĩro kĩu nawe. Ũguo nĩguo aakĩrĩkanĩire nake, agĩcoka akĩmũreka ethiĩre.

³⁵Na rĩrĩ, mũndũ ũmwe wa thiritũ ya ariũ a anabii akĩĩra mũndũ ũngĩ wa thiritũ yake, na ũndũ wa uuge wa Jehova atĩrĩ, Ndagũthaitha ũngũthe. Nake mũndũ ũcio akĩrega kũmũgũtha

³⁶Agĩkĩmwĩra atĩrĩ, Tondũ ndũnaigua uuge wa Jehova-rĩ, ngũkwĩra atĩrĩ, atĩ o ro rĩu woima haha harĩ niĩ ũthiĩ, nĩũkũũragwo nĩ mũrũthi. Nake oima harĩ we, mũrũthi ũkĩmũkora, ũkĩmũũraga.

³⁷Ningĩ akĩona mũndũ ũngĩ, akĩmwĩra atĩrĩ, Ndagũthaitha ngũtha. Nake mũndũ ũcio akĩmũgũtha, akĩmũtihia.

³⁸Thutha wa ũguo mũnabii ũcio agĩgĩĩthiĩra, agĩikara mũkĩra-inĩ wa njĩra, etereire mũthamaki, nake nĩegarũrĩte ndakamenyeke akeyoha maitho na tama wake wa mũtwe.

³⁹Na rĩrĩa mũthamaki aahĩtũkaga, akĩanĩrĩra mũthamaki, akĩmwĩra atĩrĩ, Niĩ, ndungata yaku, nĩndoimagarire ngĩthiĩ ngĩtonya ita-inĩ thĩinĩ, na atĩrĩrĩ, mũndũ ũmwe akĩgarũrũka agĩũka na kũrĩa ndĩ, akĩndehere mũndũ, akĩnjĩra atĩrĩ, Menyerera mũndũ ũyũ; na rĩrĩ, angĩũra nĩ ũndũ wa ũndũ o na ũrĩkũ-rĩ, muoyo waku ũkoima muoyo wake, kana ũrute taranda ĩmwe ya betha.

⁴⁰Na tondũ niĩ ndungata yaku ndarĩ na mĩhang’o ya ũũ na ũũ-rĩ, mũndũ ũcio agĩgĩĩthiĩra, akĩagwo. Nake mũthamaki wa Isiraeli akĩmwĩra atĩrĩ, Ũguo noguo ituĩro rĩaku rĩgũtuĩka; wee mwene nĩwe wetuĩra ũguo.

⁴¹Nake akĩhiũha kũruta tama ũcio wa mũtwe maitho, nake mũthamaki wa Isiraeli akĩmũmenya atĩ nĩ wa thiritũ ya anabii.

⁴²Nake mũndũ ũcio agĩkĩmwĩra atĩrĩ, Jehova oigĩte ũũ: Tondũ nĩwareka mũndũ ũrĩa ndaamũrire wa kũninwo ore oime moko-inĩ maku-rĩ, muoyo waku ũkoima muoyo wake, nao andũ aku moime andũ ake.

⁴³Nake mũthamaki wa Isiraeli agĩkĩinũka gwake mũciĩ e na kĩeha mũno, na akaigua ũũru; agĩkinya Samaria.