1 Kings 22

¹Na rĩrĩ, andũ a mabũrũri ma Suriata na Isiraeli makĩnina mĩaka ĩtatũ kĩrũmanĩrio matarĩ na mbaara.

²Na gũgĩkinya atĩrĩ, atĩ mwaka wa ĩtatũ wakinya, Jehoshafatu, mũthamaki wa Juda, agĩikũrũka agaceerere mũthamaki wa Isiraeli.

³Nake mũthamaki wa Isiraeli akĩĩra ndungata ciake atĩrĩ, Githĩ mũtiũĩ atĩ Ramothu-gileadi nĩ itũũra riitũ, na tũikarĩte o ro ũguo tũkaaga kũrĩruta moko-inĩ ma mũthamaki wa Suriata?

⁴Nake agĩkĩũria Jehoshafatu atĩrĩ, Nĩũgwĩtĩkĩra gũtwarana na niĩ tũkahũranĩre mbaara o kũu Ramothu-gileadi? Nake Jehoshafatu agĩcokeria mũthamaki wa Isiraeli atĩrĩ, Niĩ tũrĩ o ũndũ ũmwe nawe, o nao andũ akwa no ta andũ aku, o nacio mbarathi ciakwa no ta mbarathi ciaku.

⁵Ningĩ Jehoshafatu akĩĩra mũthamaki wa Isiraeli atĩrĩ, Ndagũthaitha ũtuĩrie ũhoro he Jehova ũmũthĩ.

⁶Nake mũthamaki wa Isiraeli agĩkĩũnganithia anabii, marĩ ta andũ magana mana, akĩmoria atĩrĩ, ’Thiĩ ngahũrane mbaara na Ramothu-gileadi, kana ndige? Nao magĩkiuga atĩrĩ, Thiĩ, nĩ ũndũ Jehova nĩekũrĩrekereria arĩneane moko-inĩ maku, wee mũthamaki witũ.

⁷No rĩrĩ, Jehoshafatu akĩũria atĩrĩ, Thengia andũ aya-rĩ, kaĩ gũkũ gũtakĩrĩ mũnabii wa Jehova, tũgatuĩrie ũhoro harĩ we?

⁸Nake mũthamaki wa Isiraeli akĩĩra Jehoshafatu atĩrĩ, Nĩhatigarĩte mũndũ ũmwe ũrĩa ũngĩhota gũtũtuĩrĩria ũhoro he Jehova, na etagwo Mikaya wa Imula; no nĩndĩmũhohete; nĩ ũndũ ndandathagĩra maũndũ mega, tiga o moru. Nake Jehoshafatu agĩkiuga atĩrĩ, Hĩ! Tiga kuuga ũguo, mũthamaki ũyũ.

⁹Hĩndĩ ĩo mũthamaki wa Isiraeli agĩgĩĩta mũndũ ũmwe wa arĩa mehokeirũo wĩra wa mũciĩ wake, akĩmwĩra atĩrĩ, Ndehere Mikaya wa Imula narua.

¹⁰Na rĩrĩ, mũthamaki wa Isiraeli, o na Jehoshafatu, mũthamaki wa Juda, mũndũ o mũndũ aaikarĩire gĩtĩ gĩake gĩa ũthamaki, mehumbĩte nguo ciao cia ũthamaki, magagĩikara handũ kawerũ-inĩ itonyero-inĩ rĩa kĩhingo gĩa Samaria; nao anabii acio othe makĩratha mohoro me mbere yao.

¹¹Nake Zedekia wa Kenaana nĩethondekeire hĩa cia igera, akiuga atĩrĩ, Jehova oigĩte ũũ: Ici nĩcio ũgatindĩka Asuriata nacio, o nginya maninwo biũ.

¹²Nao anabii othe magĩkĩratha mohoro o ta macio, makiuga atĩrĩ, Thiĩ Ramothu-gileadi, na nĩũkũgĩa na mũnyaka; nĩ ũndũ Jehova nĩekũrĩrekereria arĩneane moko-inĩ maku, wee mũthamaki ũyũ.

¹³Nake mũrekio ũrĩa wathiĩte gwĩta Mikaya akĩaria nake, akĩmwĩra ũũ: Atĩrĩrĩ, ũhoro wa anabii arĩa angĩ othe ũheanĩtwo atĩ mũthamaki nĩekuona wega, ũkaario o ũndũ ũmwe; nawe ndagũthaitha reka ũhoro waku ũtuĩke o ta wao, mũndũ o mũndũ, warie o ũhoro wa atĩ nĩgũkuoneka maũndũ mega.

¹⁴Nake Mikaya akiuga atĩrĩ, O ta ũrĩa Jehova atũũraga muoyo-rĩ, ũndũ ũrĩa Jehova arĩnjĩra, noguo ndĩrĩaria.

¹⁵Na rĩrĩ, aakinya he mũthamaki, mũthamaki agĩkĩmũũria ũũ: Atĩrĩrĩ, Mikaya, tũthiĩ Ramothu-gileadi tũkahũrane mbaara, kana tũtige? Nake akĩmũcokeria atĩrĩ, Thiĩi, na mũkagĩe na mũnyaka; nake Jehova nĩekũrĩrekereria arĩneane moko-inĩ maku, mũthamaki ũyũ;

¹⁶Nake mũthamaki akĩmwĩra atĩrĩ, Ngũkwĩhĩtithia maita maigana ngwĩre ndũkanjĩre ũndũ o na ũrĩkũ tiga o ũrĩa wa ma, ũkĩgwetaga rĩĩtwa rĩa Jehova?

¹⁷Nake agĩgĩcokia atĩrĩ, Nĩ kuona nyonete Aisiraeli othe maharaganĩirie irĩma-inĩ, o ta mbũri itarĩ na mũrĩithi; nake Jehova akiuga atĩrĩ, Aya nĩ kwaga maagĩte mũndũ wa kũmaatha; nĩmarekwo macoke o mũndũ gwake mũciĩ na thayũ.

¹⁸Nake mũthamaki wa Isiraeli agĩkĩĩra Jehoshafatu atĩrĩ, Ndikwĩrire atĩ ndangĩndathĩra maũndũ mega, tiga o moru?

¹⁹Nake Mikaya agĩkĩmwĩra atĩrĩ, Akorũo nĩ ũguo-rĩ, ta gĩthikĩrĩrie ngũhe ũhoro wa Jehova; nĩ kuona nyonete Jehova aikarĩire gĩtĩ gĩake kĩa ũnene, o nayo mbũtũ yothe ya Igũrũ ĩkarũgama guoko-inĩ gwake kwa ũrĩo, o na kwa ũmotho.

²⁰Nake Jehova aakiuga atĩrĩ, Nũ ũkũhenereria Ahabu, nĩguo aambate akagũe Ramothu-gileadi? Nao ũmwe akĩaria akoiga ũũ, na ũrĩa ũngĩ ũũ

²¹Naho haakiumĩra roho ũmwe, warũgama mbere ya Jehova, woiga atĩrĩ, Nĩ niĩ ngũmũhenereria.

²²Nake Jehova aakĩmũũria atĩrĩ, Ũkũmũhenereria atĩa hihi? Naguo woiga atĩrĩ, Nĩ gũthiĩ ngũthiĩ ngatuĩke roho wa maheni ngĩaria na tũnua twa anabii ake othe. Nake aakiuga atĩrĩ, Ĩĩ, wee nĩũkũmũhenereria, na nĩũkũhootana; ta gĩthiĩ wĩke o ta ũguo woiga.

²³Tondũ ũcio ũhoro ũtariĩ ũũ, atĩ Jehova nĩ gwĩkĩra ekĩrĩte roho wa kũhenania ũkaaria na tũnua twa anabii aya aku othe; nake Jehova nĩagwathĩrĩirie ũũru ũgũkore.

²⁴Hĩndĩ ĩo Zedekia wa Kenaana agĩthengerera Mikaya, akĩmũgũtha ikai, akĩmũũria atĩrĩ, Hĩ! Kaĩ Roho wa Jehova agereire njĩra ĩrĩkũ aandiga, atĩ nĩguo oke aarie nawe?

²⁵Nake Mikaya akĩmwĩra ũũ: Atĩrĩrĩ, nĩũkamenya ũhoro ũcio mũthenya ũrĩa ũgatonya nyũmba ĩrĩ na kanyũmba ga thĩinĩ o thĩinĩ mũno ma ũkehithe.

²⁶Nake mũthamaki wa Isiraeli agĩkiuga atĩrĩ, Ta nyitai Mikaya, mũmũcokie he Amoni, mũnene wa itũũra, o na he Joashu, mũrũ wa mũthamaki;

²⁷mũmere atĩrĩ, Mũthamaki witũ oiga ũũ: Ikiai mũndũ ũyũ korokoro-inĩ, na ahinyĩrĩrio mũno, aheagwo irio itarĩ njega o na maĩ matheri mũira wa ngacoka na thayũ.

²⁸Nake Mikaya agĩkiuga atĩrĩ, Ũngĩgacoka na thayũ o na atĩa-rĩ, ti Jehova warĩtie na niĩ. Ningĩ akiuga atĩrĩ, Ta wĩiguĩrei ũhoro ũcio, andũ aya inyuothe.

²⁹Tondũ ũcio mũthamaki wa Isiraeli, o na Jehoshafatu mũthamaki wa Juda, magĩkĩambata magĩthiĩ Ramothu-gileadi.

³⁰Nake mũthamaki wa Isiraeli akĩĩra Jehoshafatu atĩrĩ, Niĩ nĩngwĩgarũra ũrĩa ’haana ndikamenyeke, njoke ndonye ita-inĩ; no wee wĩhumbe nguo ciaku cia ũthamaki. Tondũ ũcio mũthamaki wa Isiraeli agĩkĩĩgarũra ndakamenyeke, agĩtonya ita-inĩ.

³¹Na rĩrĩ, mũthamaki wa Suriata nĩaathĩte anene mĩrongo ĩtatũ na erĩ a ngari ciake cia ita, akamera atĩrĩ, Mũtikanarũe na mũndũ o na ũrĩkũ, mũnyinyi kana mũnene, tiga o mũthamaki wa Isiraeli wiki.

³²Na gũgĩkinya atĩrĩ, atĩ hĩndĩ ĩrĩa anene acio a ngari cia ita monire Jehoshafatu, makiuga atĩrĩ, Ti-itherũ ũyũ nĩwe mũthamaki wa Isiraeli; magĩkĩmũgarũrũkĩra nĩguo mahũrane nake; nake Jehoshafatu agĩkiuga mbu.

³³Na gũgĩkinya atĩrĩ, atĩ hĩndĩ ĩrĩa anene acio a ngari cia ita monire atĩ ũcio tiwe mũthamaki wa Isiraeli, makĩhũndũka magĩtiga kũmũteng’eria.

³⁴Na rĩrĩ, mũndũ ũmwe akĩgeta ũta wake, agĩikia mũguĩ o ro ũguo atarĩ mũndũ agerete, akĩrathĩra mũthamaki wa Isiraeli o gatagatĩ-inĩ ka marathĩkanĩrio ma nguo ciake cia ita, iria cia igera; na tondũ ũcio mũthamaki wa Isiraeli agĩkĩĩra mũtwari wa ngari yake atĩrĩ, Garũra ngari ũndute mbũtũ-inĩ ya ita; nĩ ũndũ ndĩ mũguraru mũno ma.

³⁵Nayo mbaara ĩo ĩgĩkĩneneha mũno mũthenya ũcio, nake mũthamaki agĩtinda atiirĩtwo ngari-inĩ yake ya ita ang’etheire Asuriata, akĩya gũkua o hwaĩ-inĩ, naho hau aagurarĩte hakiura thakame ĩgĩitĩka ngari-inĩ yake ya ita thĩinĩ.

³⁶Gũgĩkĩanĩrĩrũo na mũgambo mũnene kũu mbũtũ-inĩ ya ita, o riũa rĩgĩthiĩ gũthũa, gũkĩĩranwo atĩrĩ, Andũ othe, mũndũ o mũndũ nĩainũke itũũra-inĩ rĩao, na mũndũ o mũndũ acoke bũrũri wao.

³⁷Ũguo nĩguo mũthamaki ũcio aagĩkuire, agĩtwarũo Samaria, nao magĩgĩthika mũthamaki ũcio kũu Samaria.

³⁸Nayo ngari ĩo ya ita makĩmĩthambĩria karia-inĩ ga kũu Samaria, nacio ngui igĩcũnĩra thakame yake o kũu karia-inĩ kau, o kau gethambagwo nĩ aka a maraya, o ta ũrĩa ũhoro wa Jehova ũrĩa aarĩtie watariĩ.

³⁹Na rĩrĩ, ciĩko iria ingĩ cia Ahabu, o na maũndũ mothe marĩa ekire, o na nyũmba ya mĩguongo ĩrĩa aakithirie, o na matũũra mothe marĩa aakithirie-rĩ, anga matiandĩkĩtwo ibuku-inĩ rĩa maũndũ ma ihinda rĩa athamaki a Isiraeli?

⁴⁰Ahabu agĩgĩkoma hamwe na maithe; nake Ahazia, mũrũwe, agĩthamaka ithenya rĩake.

⁴¹Na rĩrĩ, Jehoshafatu, mũrũ wa Asa, aambĩrĩirie gũthamakĩra Juda mwaka wa ĩna ĩrĩa Ahabu, mũthamaki wa Isiraeli, aakorirũo athamakĩte.

⁴²Nake Jehoshafatu aarĩ wa mĩaka mĩrongo ĩtatũ na ĩtano hĩndĩ ĩrĩa aambĩrĩirie gũthamaka; agĩthamaka mĩaka mĩrongo ĩĩrĩ na ĩtano arĩ Jerusalemu. Nake nyina etagwo Azuba, mwarĩ wa Shilihi.

⁴³Nake agĩkĩrũmĩrĩra mĩthiĩre ĩrĩa yothe ithe, Asa, aathiaga nayo; na ndaigana kũgarũrũka na mwena, atĩ nĩguo amĩtige, no gwĩka ekaga maũndũ marĩa monagwo marĩ mega nĩ Jehova; no rĩrĩ, matĩri ma kũndũ gũtũũgĩru matiigana kweherio; nao andũ no maarutagĩra magongona kuo, na magacinĩra ũbumba matĩri-inĩ macio ma kũndũ gũtũũgĩru.

⁴⁴Nake Jehoshafatu akĩara ũhoro na mũthamaki wa Isiraeli wa atĩ magĩe na thayũ.

⁴⁵Na rĩrĩ, ciĩko iria ingĩ cia Jehoshafatu, o na hinya wake ũrĩa onanirie, na ũhoro wake wa ũrĩa aarũire mbaara-rĩ, anga matiandĩkĩtwo ibuku-inĩ rĩa maũndũ ma ihinda rĩa athamaki a Juda?

⁴⁶Namo matigari ma andũ arĩa maarũmagĩrĩra ũmaraya wa arũme na arũme arĩa angĩ, o macio maatigarĩte matukũ-inĩ ma Asa, ithe, akĩmathengia bũrũri ũcio biũ.

⁴⁷Na rĩrĩ, bũrũri wa Edomu matukũ macio gũtiarĩ mũthamaki, no mũndũ wathurĩtwo wa kũmũikarĩrĩria.

⁴⁸Nake Jehoshafatu nĩaathondekithirie marikabu cia Tarishishi cia gũthiĩ Ofiru igĩre thahabu; no itiathiire, nĩ gũkorũo marikabu icio nĩcioinĩkangĩire Ezioni-geberi.

⁴⁹Hĩndĩ ĩo Ahazia, mũrũ wa Ahabu, agĩkĩĩra Jehoshafatu atĩrĩ, Reka ndungata ciakwa itwarane na ndungata ciaku marikabu-inĩ. No Jehoshafatu ndaigana gwĩtĩkĩra.

⁵⁰Nake Jehoshafatu agĩgĩkoma hamwe na maithe, agĩthikwo o hamwe na maithe itũũra-inĩ rĩa Daudi, ithe; nake Jehoramu mũrũwe agĩthamaka ithenya rĩake.

⁵¹Na rĩrĩ, Ahazia, mũrũ wa Ahabu, aambĩrĩirie gũthamakĩra Isiraeli o kũu Samaria mwaka wa ikũmi na mũgwanja ĩrĩa Jehoshafatu, mũthamaki wa Juda, aakorirũo athamakĩte; nake agĩgĩthamakĩra Isiraeli mĩaka ĩĩrĩ.

⁵²Agĩgĩĩka maũndũ marĩa monagwo marĩ moru nĩ Jehova, na akĩrũmĩrĩra mĩthiĩre ya ithe, o na mĩthiĩre ya nyina, o na mĩthiĩre ya Jeroboamu wa Nebati ũrĩa watũmire Aisiraeli o nao mehie.

⁵³Nake agĩtungatĩra Baali, akĩmĩinamĩrĩra akĩmĩhoya, agĩgĩthirĩkia Jehova, Ngai wa Isiraeli, akĩmũrakaria o ta ũrĩa maũndũ mothe marĩa ithe ekĩte maatariĩ.