1 Kings 6

¹Na gũgĩkinya atĩrĩ, atĩ mwaka wa magana mana ma mĩrongo ĩnana kuuma hĩndĩ ĩrĩa ciana cia Isiraeli cioimire bũrũri wa Misiri, o mwaka wa ĩna ĩrĩa Suleimani aakorirũo athamakĩire Isiraeli, mweri wa Zivu, naguo nĩguo mweri wa kerĩ-rĩ, agĩkĩambĩrĩria gwaka nyũmba ya Jehova.

²Nayo nyũmba ĩrĩa Suleimani ũcio mũthamaki aakĩire Jehova yarĩ ya mĩkono mĩrongo ĩtandatũ kũraiha, na kwarama kwayo kwarĩ mĩkono mĩrongo ĩĩrĩ, na kũraiha na igũrũ kwayo kwarĩ mĩkono mĩrongo ĩtatũ.

³Nakĩo gĩthaku kĩrĩa kĩarĩ mbere ya handũ harĩa hatheru ha nyũmba ĩo nene, kũraiha gwakĩo kwarĩ mĩkono mĩrongo ĩĩrĩ, o ta ũrĩa kwarama kwa nyũmba ĩo kwaiganaga; o nakuo kwarama gwakĩo kwarĩ mĩkono ikũmi, o kũu mbere ya nyũmba ĩo.

⁴Nayo nyũmba ĩo akĩmĩthondekithĩria ndirica cia mĩtĩ ĩhĩtũkanganĩtio.

⁵Nakuo kũu mwena wa na nja wa rũthingo rũa nyũmba ĩo nene agĩgwakithia nyũmba ingĩ irigicĩirie igwataine na rũthingo rũu, ihaicanĩte igũrũ rĩa iria ingĩ, ikĩrigicĩria mĩena yothe ya handũ hau hatheru, o na handũ harĩa hangĩ hatheru mũno; igĩcoka igĩatũranio, igĩtuwo tũnyũmba tũmĩrigicĩirie mĩena yothe.

⁶Naho ha ũhoro wa nyũmba iria ciarigĩtie thĩ o thĩ, kwarama gwacio kwarĩ mĩkono ĩtano; na iria cia igũrũ cia gatagatĩ, kwarama gwacio kwarĩ mĩkono ĩtandatũ; o nacio iria ciarigĩtie o igũrũ cia gatatũ, kwarama gwacio kwarĩ mĩkono mũgwanja: nĩ ũndũ rũthingo-inĩ rũa nyũmba ĩo mwena wa na nja waruo aarũakithirie rũgĩtigagwo mbako cia gũcoka kũigĩrĩrũo mbaũ iria ndungu cia mwako cia tũnyũmba tũu itigatonye rũthingo-inĩ thĩinĩ rũu rũa nyũmba ĩo.

⁷Nayo nyũmba ĩo ĩgĩakwo-rĩ, yaakagwo na mahiga marĩkĩtie gwacũhĩrio o kũrĩa menjagwo; na gũtiarĩ nyondo, o na kana ithanwa, o na kana kĩndũ o na kĩmwe gĩa kĩgera kĩaiguagwo gĩkĩrutwo wĩra nakĩo nyũmba-inĩ ĩo ihinda rĩu yaakagwo.

⁸Naguo mũromo wa gũtonya tũnyũmba tũu twa mĩena-inĩ twa thĩ o thĩ, mũhuro, warĩ mwena wa ũrĩo wa nyũmba ĩo nene; nao andũ maahaicaga na ngathĩ ĩrigicũkĩte magĩthiĩ tũrĩa tũngĩ twa gatagatĩ, ningĩ makoima hau magathiĩ tũrĩa twa igũrũ twa gatatũ.

⁹Agĩgĩaka nyũmba ĩo, akĩmĩrĩkia, akĩgitithia nyũmba ĩo na mĩtĩ mĩtangu ya mũtarakwa o na mbaũ ciayo.

¹⁰Natuo tũnyũmba tũu twarĩ mĩena-inĩ yothe ya nyũmba ĩo nene, aatwakithirie twa mĩkono ĩtano kũraiha na igũrũ; natuo tũgĩikara tũnyitithanĩtio na nyũmba ĩo na mbaũ cia mĩtarakwa.

¹¹Na rĩrĩ, kiugo kĩa Jehova gĩgĩkinyĩrĩra Suleimani, agĩkĩĩrũo atĩrĩ,

¹²Ha ũhoro wa nyũmba ĩno ũgwaka-rĩ, ũngĩkorũo nĩũrĩrũmagĩrĩra irĩra ciakwa cia watho wa kũrũmĩrĩrũo, na wĩkage maũndũ ma matuĩro makwa ma cira, o na ũmenyagĩrĩre maathani makwa mothe ũthiage na mĩthiĩre ya kũmarũmĩrĩra-rĩ, niĩ o na niĩ nĩngatũma kiugo gĩakwa gĩikare kĩrũmĩte ũhoro-inĩ waku, o kĩrĩa ndaarĩirie thoguo Daudi.

¹³Na nĩngatũũra thĩinĩ wa ciana cia Isiraeli, na ndigatigana na andũ acio akwa a Isiraeli.

¹⁴Suleimani agĩgĩaka nyũmba ĩo, akĩmĩrĩkia.

¹⁵Nacio thingo cia nyũmba ĩo mĩena ya na thĩinĩ agĩcihumbithia na mbaũ cia mũtarakwa; agĩcihumbithia mĩena ya na thĩinĩ, amĩrutĩtie o thĩ tĩri-inĩ, o nginya mbaũ-inĩ cia igũrũ; nayo nyũmba ĩo o kũu thĩinĩ thĩ, agĩkwarithia mbaũ cia mũthengera, agĩkũhumba nacio.

¹⁶Ningĩ mwena wa na thutha wa nyũmba ĩo nene, o kũu thĩinĩ, agĩatũrithia kanyũmba ka mĩkono mĩrongo ĩĩrĩ, gakĩhakanio na nyũmba ĩo ĩngĩ na rũthingo rũa mbaũ cia mĩtarakwa, kuuma o thĩ tĩri-inĩ o nginya mbaũ-inĩ cia igũrũ; nako kanyũmba kau agaatũrithirie thĩinĩ wa nyũmba ĩo nene gatuĩke handũ hatheru mũno, naguo ũguo nĩ ta kuuga handũ haamũrĩtwo hatuĩke hatheru gũkĩra handũ harĩa hangĩ hothe.

¹⁷Nayo nyũmba ĩo ĩngĩ nene, o ĩo yetagwo handũ harĩa hatheru, ĩrĩa yarĩ mwena wa na mbere wa handũ hau hatheru mũno, yarĩ ya mĩkono mĩrongo ĩna kũraiha.

¹⁸Nakuo na thĩinĩ wa nyũmba ĩo nene kwahumbĩtwo na mbaũ cia mĩtarakwa ciacũhĩtio mĩhianano ya maage, o na ya mahũa mathunũkĩte; kũu guothe kwarĩ o kwa mĩtarakwa mĩtheri; gũtiarĩ ihiga o na rĩmwe rĩonekaga.

¹⁹Na rĩrĩ, aatũrithirie kanyũmba kau kũu thĩinĩ wa nyũmba ĩo nene, gatuĩke handũ hatheru mũno ha kũigagwo ithandũkũ rĩrĩa rĩa kĩrĩkanĩro kĩa Jehova.

²⁰Nakuo kũu thĩinĩ wa handũ hau hatheru mũno, kũraiha gwakuo gũkĩgiĩ kwarĩ mĩkono mĩrongo ĩĩrĩ, nakuo kwarama gwakuo kwarĩ mĩkono mĩrongo ĩĩrĩ, o nakuo kũraiha gwakuo kwa na igũrũ kwarĩ mĩkono mĩrongo ĩĩrĩ o ro ũguo; agĩcoka akĩhumbithia thingo ciakuo o na igũrũ rĩakuo na thahabu ĩrĩa therie mũno; nakĩo kĩgongona agĩkĩhumbithia igũrũ guothe na mbaũ cia mĩtarakwa.

²¹Ũguo nĩguo Suleimani aahumbithirie nyũmba ĩo nene na thĩinĩ na thahabu ĩrĩa therie mũno; agĩcoka agĩĩkĩrithia irengeri cia thahabu na kũu mbere ya handũ hau hatheru mũno ta irĩ cia kũhahakania na hau hangĩ; naho handũ hau hatheru hothe akĩhahumbithia na thahabu.

²²Nyũmba ĩo yothe thĩinĩ agĩkĩmĩhumbithia na thahabu, o nginya nyũmba ĩo yothe ĩkĩrĩka; o nakĩo kĩgongona kĩa handũ hau hatheru mũno agĩkĩhumbithia guothe na thahabu.

²³Naho handũ hau hatheru mũno thĩinĩ akĩhathondekithĩria makerubi merĩ na mbaũ cia mĩtamaiyũ, o rĩmwe mĩkono ikũmi kũraiha na igũrũ.

²⁴Narĩo ithagu rĩmwe rĩa ikerubi rĩmwe rĩarĩ rĩa mĩkono ĩtano, o narĩo ithagu rĩrĩa rĩngĩ rĩa ikerubi rĩu rĩarĩ mĩkono ĩtano o ro ũguo; nakuo kuuma mũthia wa ithagu rĩmwe nginya mũthia wa ithagu rĩrĩa rĩngĩ kwarĩ mĩkono ikũmi.

²⁵O narĩo ikerubi rĩu rĩngĩ rĩarĩ rĩa mĩkono ikũmi o ro ũguo; namo makerubi macio merĩ maarĩ o ũndũ ũmwe magĩthimwo, o na mwacũhĩrie o ro ũmwe.

²⁶Nakuo kũraiha kwa na igũrũ gwa ikerubi rĩmwe kwarĩ mĩkono ikũmi; naguo ũguo noguo ikerubi rĩrĩa rĩngĩ rĩatariĩ.

²⁷Namo makerubi macio akĩmekĩrithia kanyũmba karĩa kaarĩ thĩinĩ mũno; namo mathagu ma makerubi macio maacũhĩtio matambũrũkĩte, ithagu rĩa ikerubi rĩmwe rĩkahutia rũthingo rũmwe, o narĩo ithagu rĩa ikerubi rĩu rĩngĩ rĩkahutia rũthingo rũrĩa rũngĩ; namo mathagu marĩa mangĩ mamo makahutanĩria o gatagatĩ ga kanyũmba kau.

²⁸Ningĩ makerubi macio akĩmahumbithia igũrũ guothe na thahabu.

²⁹Nakuo kũu thingo-inĩ ciothe cia nyũmba ĩo nene, kũrigicĩria mĩena yothe thĩinĩ o na na nja-rĩ, agĩgwacũhithiria mĩhianano ya makerubi, o na ya mĩtende, o na ya mahũa mathunũkĩte.

³⁰Nakuo mbaũ-inĩ cia thĩ cia nyũmba ĩo, thĩinĩ o na nja, agĩkũhumbithia guothe na thahahu.

³¹Narĩo itonyero-inĩ rĩa gũthiĩ handũ hau hatheru mũno akĩrĩthondekithĩria mĩrango ya mĩtamaiyũ; nayo mĩrango ĩo hamwe na hingĩro ĩrĩa ĩkĩgamagio igũrũ rĩa mũromo, o na hingĩro cia mĩena-inĩ yaguo-rĩ, ciarĩ gĩcunjĩ gĩa gatano kĩa rũhĩrĩgo rũa hau ruothe.

³²Agĩgĩthondekithia mĩrango ĩĩrĩ na mĩtamaiyũ; nayo mĩrango ĩo akĩmĩacũhithĩria mĩhianano ya makerubi, na ya mĩtende, o na ya mahũa mathunũkĩte, agĩcoka akĩmĩhumbithia igũrũ guothe na thahabu, ĩthiĩte ĩgĩĩkagĩrũo igũrũ rĩa makerubi macio, o na igũrũ rĩa mĩtende ĩo.

³³O na ningĩ ũguo noguo aathondekithirie hingĩro cia mĩtamaiyũ cia mũromo-inĩ wa gũtonya hau haatuĩtwo hekarũ, naguo mũromo ũcio warĩ gĩcunjĩ gĩa kana kĩa rũthingo rũa hau.

³⁴Nayo mĩrango yarĩ ya mbaũ cia mĩthengera; nacio mbaũ cierĩ cia mũrango ũmwe ciarĩ cia gũthunanĩrũo; o nacio mbaũ iria ingĩ cierĩ cia mũrango ũcio ũngĩ ciarĩ cia gũthunanĩrũo o ro ũguo.

³⁵Nacio mbaũ icio agĩciacũhithĩria mĩhianano ya makerubi, o na ya mĩtende, o na mahũa mathunũkĩte; agĩcoka akĩmĩhumbithia igũrũ guothe na thahabu ĩnyitithanĩtio na kũu gwacũhĩtio, o ta ũrĩa gũthiĩte.

³⁶Nayo nja ĩrĩa ya thĩinĩ wa ĩrĩa ĩngĩ, akĩmĩirigithia na mahiga mĩhari ĩtatũ, o na mũhari ũmwe wa mbaũ ndungu cia mĩtarakwa.

³⁷Na rĩrĩ, mwaka wa ĩna nĩguo gĩtina kĩa nyũmba ĩo ya Jehova gĩaakirũo, mweri wa Zivu.

³⁸Naguo mwaka wa ikũmi na ũmwe, mweri wa Bulu, naguo nĩguo mweri wa ĩnana, nĩguo nyũmba ĩo yarĩkire gwakwo tuuco twayo tuothe, o ta ũrĩa mũhianĩre wayo wothe watariĩ. Tondũ ũcio aakĩninire mĩaka mũgwanja akĩmĩaka.