1 Peter 2

¹HAKĨRĨ ũguo-rĩ, eheriai waganu wothe, na wara wothe, na ũhinga na rũitho, na gũcambania o guothe,

²na mũtuĩke o tũkenge, mwĩriragĩrie iria rĩrĩa rĩa kĩĩroho, o rĩrĩa rĩtheru, nĩ getha mũkũrakũragio nĩrĩo mũgakĩhonokio:

³mũngĩkorũo nĩmũcamĩte mũkona atĩ Mwathani nĩ mũtugi.

⁴Ũkani kũrĩ we, o ũrĩa ũrĩ Ihiga rĩĩ muoyo; narĩo nĩ kũregwo rĩregetwo nĩ andũ, no harĩ Ngai nĩ rĩthure na rĩgatuwo rĩa goro;

⁵na inyuĩ-rĩ, ta mũrĩ mahiga marĩ muoyo, ikaragai mũgĩakagwo nyũmba ya kĩĩroho, o nginya mũtuĩke thiritũ theru ya athĩnjĩri-Ngai, nĩ getha mũkarutage magongona ma kĩĩroho marĩa mangĩĩtĩkĩrĩka nĩ Ngai nĩ ũndũ wa Jesu Kristo.

⁶Nĩ ũndũ thĩinĩ wa Maandĩko nĩharĩ ciugo ici, Atĩrĩrĩ, nĩngũiga kũrĩa Zayuni ihiga rĩnene rĩa koine, rĩĩ rĩthure na rĩĩ goro: Na o mũndũ ũrĩa ũrĩkoragwo amwĩhokete ndagaconorithio.

⁷Nĩ ũndũ wa ũguo-rĩ, nĩ harĩ inyuĩ arĩ goro, o inyuĩ mwĩtĩkĩtie; ĩndĩ arĩa matetĩkĩtie-rĩ, ũhoro wao nĩ ũyũ, atĩrĩ, Ihiga rĩrĩa rĩaregirũo nĩ aaki Nĩrĩo rĩatuĩkire o rĩrĩa inene rĩa koine;

⁸na ningĩ ũũ, Ihiga rĩa kũgũithania, o na rũaro rũa ihiga rĩa kũhĩngithania. Amu nĩ kũgũithio magũithagio nĩ Ũhoro nĩ ũndũ wa ũrĩa maremete: na noguo maathĩrĩirio.

⁹No inyuĩ mũrĩ rũruka rũthurĩtwo, na thiritũ ya athĩnjĩri Ngai ya nyũmba ya mũthamaki, ningĩ mũrĩ rũrĩrĩ rũtheru, o andũ matuĩkĩte a Ngai kĩũmbe; nĩ getha mũhunjanagĩrie mawega make, we wamwĩtire muume nduma-inĩ mũtonye ũtheri-inĩ wake ũrĩa wa magegania.

¹⁰Kwĩ hingo mũtaarĩ rũrĩrĩ kũrĩ, no rĩu mwĩ rũrĩrĩ rũa Ngai: nĩ kwaga mwaagĩte kũiguĩrũo tha, no rĩu nĩ kũiguĩrũo mũiguĩrĩirũo tha.

¹¹Endwa akwa, nĩndamũthaitha, mũkĩrĩ o ageni na agendi, atĩ mũtigane na merirĩria marĩa moru ma mwĩrĩ, marĩa marũaga na roho,

¹²na mũtũũre na mĩtũũrĩre mĩagĩrĩru, mũikaranĩtie na andũ a Ndũrĩrĩ iria itoĩ Ngai, nĩguo atĩ, o na harĩa mamũigagĩrĩra igenyo ta mũrĩ eki ũũru-rĩ, macoke gũkumagia Ngai mũthenya wakinya ũrĩa agoka kũmarora, nĩ ũndũ wa mawĩra manyu mega marĩa meonagĩra.

¹³Athĩkagai tondũ wa Mwathani nĩ ũndũ o wothe mũtabarĩre nĩ andũ: o na wakorũo nĩ wa mũthamaki, arĩ we mũnene igũrũ rĩa arĩa angĩ othe,

¹⁴O na kana watuĩka nĩ wa abarũthi, kuona nĩo matuĩtwo nĩwe maherithagie arĩa mekaga ũũru, o na magathage arĩa mekaga wega.

¹⁵Tondũ ũrĩa Ngai endaga nĩ rĩrĩ, atĩ nĩ ũndũ wa gwĩkaga wega, mũkirie tũnua twa irimũ iria itarĩ ũndũ ciũĩ.

¹⁶Ikaragai mũtarĩ ngombo, ĩndĩ mũtikanareke ũhoro ũcio wa gũikara mũtarĩ ngombo ũtuĩke wa kũhithĩrĩra waganu, no mũikarage mũrĩ ngombo cia Ngai.

¹⁷Tĩagai andũ othe. Endagai ariũ othe a Ithe witũ. Wĩtigagĩrei Ngai. Tĩagai mũthamaki.

¹⁸Inyuĩ ndungata cia mũciĩ-rĩ, athĩkagai nĩ aathani anyu, mũkĩmatĩaga mũno, na to arĩa ega na ahoreri oiki, o na arĩa eĩ o nao.

¹⁹Amu ũndũ ũyũ nĩguo wĩ ngatho, atĩ mũndũ akiragĩrĩrie maũndũ ma kũmũiguithia kĩeha o akĩnyariragwo tũhũ, nĩ ũndũ wa ũrĩa ekĩrĩire Ngai na thamiri yake.

²⁰Amu-rĩ, mũngĩĩka ũũru, na mũhũrĩrũo ũũru ũcio mũkirĩrĩirie-rĩ, kaĩ mũngĩkĩgathwo nĩ ũndũ kĩ? Ĩndĩ mũngĩĩka wega, na mũnyarirĩrũo wega ũcio mũkirĩrĩirie-rĩ, ũndũ ũcio nĩũrĩ ngatho harĩ Ngai.

²¹Tondũ ũguo nĩguo mwĩtĩirũo: nĩ gũkorũo Kristo o nake nĩanyarirĩkire ithenya rĩanyu, nĩ getha ũrĩa aatigire eka ũtuĩke wa kũmuonereria ũrĩa mũngĩkinyaga o makinya-inĩ make.

²²Nake ndaigana kwĩhia, o na kana agĩkorũo akĩaria maũndũ ma wara na kanua gake:

²³nake rĩrĩa aarumagwo ndaigana kwĩrumĩra: na rĩrĩa aanyarirĩkaga, ndehĩtanagĩra, no kwĩneana eneanaga kũrĩ ũrĩa ũtuaga cira na kĩhooto.

²⁴Nake nĩaakuuire mehia maitũ we mwene mwĩrĩ-inĩ wake e mũtĩ igũrũ, nĩ getha ithuĩ tũkorũo tũkuĩte ha ũhoro wa mehia tũgatigana namo, tũcoke tũtũũre muoyo twĩkaga o maũndũ ma ũthingu; nayo mĩtunda ĩrĩa aahũrirũo nĩyo yatũmire mũhone.

²⁵Nĩ gũkorũo nĩ gũturura mwatururaga ta mbũri; no rĩu mũrĩ acokereru ũrĩa Mũrĩithi na Mũrori wa mĩoyo yanyu.