1 Timothy 2

¹NĨ ũndũ wa ũguo, ũrĩa ngwamba gũtaarana nĩ atĩrĩ, atĩ kũhoyagwo mahoya ma gũthaithanĩrĩra, na ma kũhoyanĩra, na ma gũcokeria Ngai ngatho, nĩ ũndũ wa andũ othe:

²na makĩria, atĩ kũhoyagĩrũo athamaki, na arĩa othe maathanaga, nĩ getha tũtũũre na ũhoreri o na twĩkindĩire, tũgĩtĩaga Ngai tũtarĩ na itherũ.

³Ũndũ ũcio nĩguo mwega na wa gwĩtĩkĩrĩka nĩ Ngai Mũhonokia witũ,

⁴o we wendaga andũ othe mahonokio na matuĩke a kũmenya ũhoro-wa-ma.

⁵Amu kwĩ na Ngai o ro ũmwe, na mũiguithania o ũmwe wa kũiguithania Ngai na andũ, nake nĩ mũndũ, o Kristo Jesu,

⁶ũrĩa werutire atuĩke wa gũkũũra andũ othe; naguo ũira wa ũhoro ũcio nĩwaheanirũo ihinda rĩaguo rĩrĩa rĩagĩrĩru rĩakinya.

⁷Naguo nĩ niĩ ndatuirũo mũhunjia o na mũtũmwo waguo, (ngwaria o ma, ndikũhenania), na ningĩ ngĩtwo mũrutani wa kũrutaga Ndũrĩrĩ ũhoro wa gwĩtĩkia, o na ũhoro-wa-ma.

⁸Tondũ wa ũguo-rĩ, ngwenda atĩ kũndũ guothe arũme mahoithagie arĩ o, makĩoyaga moko matheru na igũrũ, hatarĩ na marakara o na kana ngarari.

⁹Ningĩ no taguo ngwenda atĩ andũ-a-nja megemagie na nguo itarĩ cia mwĩonanio, me na thoni na ũũgĩ wa ngoro: matikanegemie na kũrama njuĩrĩ, kana na thahabu kana ruru, kana nguo iria ii goro mũno;

¹⁰no nĩmegemagie na ciĩko cia ũthingu, (ũguo nĩguo wagĩrĩire andũ-a-nja arĩa metuaga atĩi Ngai).

¹¹Nĩ wega mũndũ-wa-nja erutage maũndũ akindĩirie, na aathĩkĩte na njĩra ciothe.

¹²No rĩrĩ, ndingĩĩtĩkĩria mũndũ-wa-nja arutanage, kana aathage mũndũ mũrũme, no nĩaikarage akindĩirie.

¹³Nĩ ũndũ-rĩ, Adamu nĩwe waambire kũũmbwo, Hawa agĩcokererũo:

¹⁴nake Adamu-rĩ, tiwe wahenereirio, nĩ mũndũ-wa-nja wahenereirio agĩtuĩka wa kũhĩtia.

¹⁵No rĩrĩ, andũ-a-nja makahonokio na ũndũ wa gũciara twana, mangĩgĩtũũra metĩkĩtie na me na wendani, na marĩ andũ aamũre, o na marĩ na ũũgĩ wa ngoro.