2 Chronicles 13

¹Na rĩrĩ, mwaka wa ikũmi na ĩnana ĩrĩa Jeroboamu aakorirũo athamakĩte-rĩ, nĩguo Abija aambĩrĩirie gũthamakĩra Juda.

²Agĩgĩthamaka mĩaka ĩtatũ kũu Jerusalemu; nake nyina etagwo Mikaia, mwarĩ wa Urieli wa kũu Gibea. Nao Abija na Jeroboamu magĩtũũra mahũranaga mbaara.

³Nake Abija agĩgĩthiĩ ita arĩ na mbũtũ ya andũ njamba cia ita ngiri magana mana mathurĩtwo; nake Jeroboamu akĩarania ita yake nĩguo mahũrane nake arĩ na andũ ngiri magana manana mathurĩtwo, nao maarĩ njamba irĩ hinya.

⁴Nake Abija akĩrũgama o igũrũ rĩa kĩrĩma gĩa Zemaraimu, kĩrĩa kĩrĩ bũrũri ũrĩa wĩ irĩma nyingĩ wa Efiraimu, akiuga atĩrĩ, Ta ’thikĩrĩria, wee Jeroboamu, o na inyuĩ Aisiraeli inyuothe;

⁵githĩ mũtiũĩ atĩ Jehova, Ngai wa Isiraeli, aatuire Daudi mũthamaki wa gũthamakĩra Isiraeli tene na tene, we mwene, o na ariũ ake, na ũndũ wa kĩrĩkanĩro gĩa cumbĩ kĩrĩa gĩtangĩgarũrũka?

⁶No rĩrĩ, Jeroboamu wa Nebati, ũcio ndungata ya Suleimani mũrũ wa Daudi, nĩaarahũkire akĩrema mwathi wake, akĩmũũkĩrĩra.

⁷Naho hagĩkĩũngana harĩ we andũ matarĩ kĩene, aaganu mũno, o arĩa meĩkĩrire hinya nĩguo mahũrane na Rehoboamu, mũrũ wa Suleimani, o hĩndĩ ĩrĩa Rehoboamu aarĩ mũnyinyi, atarĩ na ngoro nyũmĩriru, o na rĩrĩa ataahotire kũmetiiria.

⁸Na rĩu mwĩcirĩtie atĩ mwahota gwĩtiiria ũthamaki wa Jehova ũrĩa ũnyitĩrĩirũo nĩ ariũ a Daudi; na mũrĩ kĩrĩndĩ kĩingĩ, na mũkagĩa na njaũ cia thahabu iria Jeroboamu aamũthondekeire ituĩke ngai cianyu.

⁹Githĩ mũtiaingatire athĩnjĩri-Ngai a Jehova, ariũ a Haruni, o na Alawii, mũgĩĩcarĩria athĩnjĩri-ngai o ta ũrĩa mũtugo wa ndũrĩrĩ iria ingĩ ũtariĩ? Nĩguo atĩ mũndũ o wothe ũrĩa ũgũthiĩ kwĩamũrĩra Jehova, etherie nĩ ũndũ wa kũruta gategwa na ndũrũme mũgwanja, ahote gũtuĩka mũthĩnjĩri-ngai icio itarĩ kĩene.

¹⁰No rĩri, ithuĩ-rĩ, Jehova nĩwe Ngai witũ, na tũtimũtigĩte na twĩ na athĩnjĩri-Ngai matungatagĩra Jehova, nao nĩ ariũ a Haruni, o nao Alawii me wĩra-inĩ wao;

¹¹na nĩo macinagĩra Jehova mahaki ma njino, o na ũbumba ũrĩa ũnungaga wega, marũcinĩ mothe, o na mahwaĩ-inĩ mothe; o nayo mĩgate ĩrĩa ĩigagwo mbere ya Jehova makamĩigaga wega igũrũ rĩa metha ĩrĩa theru; o na mũtĩ wa kũigĩrĩrũo matawa wa thahabu, hamwe na matawa maguo, makaũmenyerera, nĩguo maakanage mahwaĩ-inĩ mothe; nĩ ũndũ nĩtũtũire tũrũmĩtie watho wa Jehova, Ngai witũ; no inyuĩ nĩmũmũtigĩte.

¹²Atĩrĩrĩ, Ngai arĩ hamwe na ithuĩ o mbere iitũ atũtongoretie, na athĩnjĩri-Ngai ake me na tũrumbeta twa hinya nĩguo makahuha na mĩgambo mĩnene mũno maarahũre andũ mathiĩ ita. Atĩrĩrĩ, ciana ici cia Isiraeli, tigai kũrũa na Jehova, Ngai wa maithe manyu; nĩ ũndũ mũtigaacĩra.

¹³No rĩrĩ, Jeroboamu akĩiga andũ a kũmoheria mamoimĩte na thutha; na tondũ ũcio magĩikara me mbere ya andũ a Juda, nao arĩa maamoheirie magĩikara na thutha wao.

¹⁴Nao Ajuda maacũthĩrĩria na thutha-rĩ, makĩona ita ĩĩ mbere yao, o na thutha wao; nao magĩgĩkaĩra Jehova, nao athĩnjĩri-Ngai magĩkĩhuha tũrumbeta.

¹⁵Hĩndĩ ĩo andũ a Juda makĩanĩrĩra na mĩgambo mĩnene; gũgĩkinya atĩrĩ, atĩ andũ a Juda maanĩrĩra na mĩgambo mĩnene, Ngai akĩhũra Jeroboamu me hamwe na Aisiraeli othe, magĩkĩhũrũo nĩ Abija, o na Ajuda.

¹⁶Nacio ciana cia Isiraeli igĩkĩũrĩra Ajuda nake Ngai agĩcirekereria, agĩcineana moko-inĩ mao.

¹⁷Nake Abija na andũ ake magĩciũraga nyingĩ mũno; naho hakĩgũa andũ a Isiraeli ngiri magana matano moragĩtwo, arĩa maathurĩtwo a kũhũrana mbaara.

¹⁸Ũguo nĩguo ciana cia Isiraeli ciatoririo hĩndĩ ĩo, nacio ciana cia Juda igĩkĩhootana, nĩ ũndũ nĩciehokire Jehova, Ngai wa maithe ma cio.

¹⁹Nake Abija agĩteng’eria Jeroboamu, akĩmũtunya matũũra mamwe; namo nĩ Beth-eli, na tũtũũra twarĩo, o na Jeshana, na tũtũũra twarĩo, na Efironi, na tũtũũra twarĩo.

²⁰Nake Jeroboamu ndaigana gũcoka kũgĩa na hinya o na hanini matukũ-inĩ ma Abija; nake Jehova agĩkĩmũhũra, agĩkua.

²¹No rĩrĩ, Abija akĩgĩa na hinya mũno, nake akĩhikia aka ikũmi na ana, o na agĩciara ihĩĩ mĩrongo ĩĩrĩ na igĩrĩ na airĩtu ikũmi na atandatũ.

²²Na rĩrĩ, ciĩko iria ingĩ cia Abija, o na mĩthiĩre yake, o na maũndũ marĩa aaririe, nĩmaandĩkĩtwo ibuku-inĩ rĩa ũtaũranĩri wa Ido ũrĩa mũnabii.