2 Chronicles 16

¹Na rĩrĩ, mwaka wa mĩrongo ĩtatũ na ĩtandatũ ĩrĩa Asa aathamakĩte-rĩ, Baasha, mũthamaki wa Isiraeli, agĩkĩambata akahũrane na Juda; nake agĩakithia Rama, nĩ getha ndakareke mũndũ o na ũmwe oime Juda akinye bũrũri wake, o na kana mũndũ wa kũu gwake akinye he Asa mũthamaki wa Juda.

²Hĩndĩ ĩo Asa agĩkĩruta betha, o na thahabu, mũthithũ-inĩ wa indo cia bata cia kũu nyũmba ya Jehova, o na cia nyũmba ya mũthamaki, agĩcitwarithia he Beni-hadadi, mũthamaki wa Suriata, ũrĩa watũire Dameski, akĩmwĩra ũũ:

³Niĩ nawe twĩ na kĩrĩkanĩro gĩa atĩ tũgĩe na ũiguano, o ta ũrĩa baba na thoguo maarĩ nakĩo; ta rora betha o na thahabu ici ndakũrehithĩria; rĩu gĩthiĩ ũgathũkie kĩrĩkanĩro kĩanyu na Baasha, mũthamaki wa Isiraeli, kĩa ũiguano, nĩ getha anjeherere.

⁴Nake Benihadadi agĩĩtĩkĩra ũhoro wa Asa, mũthamaki, agĩkĩrekia anene a mbũtũ ciake cia ita makahũre matũũra ma Isiraeli; nao makĩhũra Ijoni, na Dani, o na Abeli-maimu, o na matũũra mothe ma Nafitali marĩa maaigagwo indo.

⁵Na gũgĩkinya atĩrĩ, atĩ hĩndĩ ĩrĩa Baasha aaiguire ũhoro ũcio, agĩtiga gwakithia Rama, wĩra ũcio wake ũgĩgĩtiganwo naguo.

⁶Hĩndĩ ĩo Asa, mũthamaki, akĩoya andũ othe a Juda, magĩthiĩ makĩeheria mahiga marĩa maarĩ Rama, o na mbaũ cia mwako iria Baasha aakaga kuo nacio agĩcoka agĩaka Geba o na Mizipa na indo icio.

⁷Na rĩrĩ, ihinda rĩu Hanani ũrĩa muoni maũndũ agĩthiĩ he Asa, mũthamaki wa Juda, akĩmwĩra atĩrĩ, Tondũ wĩhokete mũthamaki wa Suriata, ũkaaga kwĩhoka Jehova Ngai waku, nĩkĩo mbũtũ cia ita cia mũthamaki wa Suriata ciahonoka cioima moko-inĩ maku.

⁸Githĩ Akushi o na Alubi matiarĩ mbũtũ nene ya ita, ĩĩ na ngari, o na andũ megũthiĩ mahaicĩte mbarathi aingĩ mũno? No rĩrĩ, tondũ wa ũrĩa wee wehokete Jehova hĩndĩ ĩo nĩaamarekereirie akĩmaneana moko-inĩ maku.

⁹Nĩ gũkorũo Jehova orũragia maitho kũndũ guothe thĩ yothe akĩonania atĩ e na hinya mũno wa gũteithia andũ arĩa mamũrũmagĩrĩra na ngoro yao yothe. No rĩu nĩwĩkĩte ũndũ wa ũkĩgu mũno, nĩ ũndũ gwata ũmũthĩ nĩũgũcoka kũgĩa na mbaara.

¹⁰Hĩndĩ ĩo Asa agĩkĩrakarĩra mũndũ ũcio muoni maũndũ mũno, akĩmũikithia nyũmba ya korokoro, nĩ gũkorũo nĩaarakarĩtio nĩwe mũno nĩ ũndũ wa ũhoro ũcio. Ningĩ Asa akĩhinyĩrĩria andũ amwe angĩ matukũ o ro macio.

¹¹Na atĩrĩrĩ, ciĩko cia Asa cia mbere o na cia kũrigĩrĩria-rĩ, nĩciandĩkĩtwo ibuku-inĩ rĩa athamaki a Juda o na Isiraeli.

¹²Na rĩrĩ, mwaka wa mĩrongo ĩtatũ na kenda ĩrĩa Asa aakorirũo athamakĩte-rĩ, nĩaarũarire magũrũ; naguo mũrimũ ũcio wake ũkĩmũnenehera mũno; no rĩrĩ, hĩndĩ ĩo aarũarĩte ndaigana kũrongoria Jehova, tiga o gũthiĩ aathiaga kũrĩ athondekani.

¹³Nake Asa agĩgĩkoma hamwe na maithe; naguo mwaka wa mĩrongo ĩna na ũmwe ĩrĩa aakorirũo athamakĩte, nĩguo aakuire.

¹⁴Nao andũ makĩmũthika mbĩrĩra-inĩ ciake we mwene iria eyenjithĩirie o kũu itũũra rĩa Daudi, na makĩmũkomia gĩtanda-inĩ kĩaiyũrĩte mũtararĩko mwega wa mĩthemba mĩingĩ ya mahuti marĩa manungaga wega mathondeketwo na ũũgĩ wa andũ arĩa ohĩgĩrĩru ũtukania wa mĩthaiga; ningĩ makĩmũcinithĩria icua inene mũno.