2 Chronicles 18

¹Na rĩrĩ, Jehoshafatu agĩkĩgĩa na ũtonga mũingĩ, o na agĩtĩĩka mũno; nake agĩtuma ũthoni na Ahabu.

²Na rĩrĩ, mĩaka mĩnyinyi yathira, agĩikũrũka agaceerere Ahabu o kũu Samaria. Nake Ahabu agĩthĩnja mbũri o na ndegwa nyingĩ nĩ ũndũ wake, o na ũndũ wa arĩa maarĩ hamwe nake, agĩcoka akĩmũhatĩrĩria maambatanie nake makinye Ramothu-gileadi.

³Nake Ahabu, mũthamaki wa Isiraeli, agĩkĩũria Jehoshafatu, mũthamaki wa Juda, atĩrĩ, Nĩũgwĩtĩkĩra gũtwarana na niĩ tũkinye Ramothu-gileadi? Nake agĩcokia atĩrĩ, Niĩ tũrĩ o ũndũ ũmwe nawe, o na andũ akwa no ta andũ aku, na nĩtũgakorũo twĩ hamwe nawe kũu ita-inĩ.

⁴Nake Jehoshafatu akĩĩra mũthamaki wa Isiraeli atĩrĩ, Ndagũthaitha ũtuĩrie ũhoro he Jehova ũmũthĩ.

⁵Hĩndĩ ĩo mũthamaki wa Isiraeli agĩkĩũngania anabii andũ magana mana, akĩmoria atĩrĩ, Tũthiĩ rũkahũrane mbaara na Ramothu-gileadi, kana tũtige? Nao makiuga atĩrĩ, Thiĩi, nĩ ũndũ Ngai nĩekũrĩrekereria arĩneane moko-inĩ maku, wee mũthamaki witũ.

⁶No rĩrĩ, Jehoshafatu agĩkĩũria atĩrĩ, Thengia andũ aya-rĩ, kaĩ gũkũ gũtarĩ mũnabii wa Jehova tũgatuĩrie ũhoro harĩ we?

⁷Nake mũthamaki wa Isiraeli akĩĩra Jehoshafatu ũũ: Nĩhatigarĩte mũndũ ũmwe ũrĩa ũngĩhota gũtũtuĩrĩria ũhoro he Jehova, no nĩndĩmũhohete; nĩ ũndũ ndarĩ aandathĩra maũndũ mega, tiga o ũũru hĩndĩ ciothe; na nĩ Mikaia, mũrũ wa Imula. Nake Jehoshafatu akiuga atĩrĩ, Hĩ! Tiga kuuga ũguo, mũthamaki ũyũ.

⁸Hĩndĩ o ĩo mũthamaki wa Isiraeli agĩgĩĩta mũnene ũmwe wa arĩa mehokeirũo wĩra wa mũciĩ wake, akĩmwĩra atĩrĩ, Ndehere Mikaia, mũrũ wa Imula, narua.

⁹Na rĩrĩ, mũthamaki wa Isiraeli, o na Jehoshafatu mũthamaki wa Juda, mũndũ o mũndũ nĩ gũikara aaikarĩire gĩtĩ gĩake gĩa ũthamaki, mehumbĩte nguo ciao cia ũthamaki, magagĩikara handũ kawerũ-inĩ itonyero-inĩ rĩa kĩhingo gĩa Samaria; nao anabii othe makĩratha mohoro marĩ mbere yao.

¹⁰Nake Zedekia wa Kenaana nĩethondekeire hĩa cia igera, akiuga atĩrĩ, Jehova oigĩte ũũ: Ici nĩcio ũgatindĩka Asuriata nacio, o nginya ũkamanina biũ.

¹¹Nao anabii othe makĩratha ũhoro o ta ũcio, makiuga atĩrĩ, Thiĩ Ramothu-gileadi, na nĩũkũgĩa na mũnyaka; nĩ ũndũ Jehova nĩekũrĩrekereria arĩneane moko-inĩ maku, wee mũthamaki ũyũ.

¹²Nake mũrekio ũrĩa wathiĩte gwĩta Mikaia akĩaria nake, akiuga ũũ: Atĩrĩrĩ, ũhoro wa anabii arĩa angĩ othe ũheanĩtwo atĩ mũthamaki nĩekuona wega, ũkaario o ũndũ ũmwe; tondũ ũcio ndagũthaitha ũreke ũhoro waku ũtuĩke o ta wao, warie o ũhoro wa atĩ nĩgũkuoneka maũndũ mega.

¹³Nake Mikaia akiuga atĩrĩ, O ta ũrĩa Jehova atũũraga muoyo-rĩ, o ũndũ ũrĩa Ngai wakwa arĩnjĩra, noguo ndĩrĩaria.

¹⁴Na rĩrĩ, aakinya he mũthamaki, mũthamaki agĩkĩmũũria ũũ: Atĩrĩrĩ, Mikaia, tũthiĩ Ramothu-gileadi tũkahũrane mbaara, kana tũtige? Nake akiuga atĩrĩ, Thiĩi, na mũkagĩe na mũnyaka; nao nĩmakarekererio maneanwo moko-inĩ manyu.

¹⁵Nake mũthamaki akĩmwĩra atĩrĩ, Ngũkwĩhĩtithia maita maigana ngwĩre ndũkanjĩre ũndũ o na ũrĩkũ tiga o ũrĩa wa ma ũkĩgwetaga rĩĩtwa rĩa Jehova?

¹⁶Nake agĩgĩcokia atĩrĩ, Nĩ kuona nyonete Aisiraeli othe maharaganĩirie irĩma-inĩ, o ta mbũri itarĩ na mũrĩithi; nake Jehova akiuga atĩrĩ, Aya nĩ kwaga maagĩte mũndũ wa kũmaatha; nĩmarekwo macoke o mũndũ gwake mũciĩ na thayũ.

¹⁷Nake mũthamaki wa Isiraeli agĩkĩĩra Jehoshafatu atĩrĩ, Githĩ ndikwĩrire atĩ ndangĩndathĩra maũndũ mega, tiga o moru?

¹⁸Nake Mikaia agĩkĩmwĩra atĩrĩ, Akorũo nĩ ũguo-rĩ, ta gĩthikĩrĩriei ndĩmũhe ũhoro wa Jehova. Nĩ kuona nyonete Jehova aikarĩire gĩtĩ gĩake kĩa ũnene, o nayo mbũtũ yothe ya igũrũ ĩkarũgama mwena-inĩ wa guoko gwake kwa ũrĩo, o na kwa ũmotho.

¹⁹Nake Jehova aakiuga atĩrĩ, Nũ ũkũhenereria Ahabu, mũthamaki wa Isiraeli, nĩguo athiĩ akagũe Ramothu-gileadi? Nao ũmwe arakĩaria, aroiga ũũ, o nake ũrĩa ũngĩ ũũ.

²⁰Naho haagĩcoka haakiumĩra roho ũmwe warũgama mbere ya Jehova, woiga atĩrĩ, Nĩ niĩ ngũmũhenereria. Nake Jehova aakĩmũũria atĩrĩ, kũmũhenereria atĩa hihi?

²¹Naguo woiga atĩrĩ, Ngũthiĩ ngatuĩke roho wa maheni ngĩaria na tũnua twa anabii ake othe. Nake aakiuga atĩrĩ, Ĩĩ, wee nĩũkũmũhenereria, na nĩũkũhootana; ta gĩthiĩ wĩke o ta ũguo woiga.

²²Tondũ ũcio ũhoro ũgĩtariĩ ũũ, atĩ Jehova nĩ gwĩkĩra ekĩrĩte roho wa kũhenania ũkaaria na tũnua twa anabii aya aku othe; nake Jehova nĩ kwaria aarĩtie ndeto njũru igũkoniĩ.

²³Hĩndĩ ĩo Zedekia wa Kenaana agĩthengerera Mikaia, akĩmũgũtha ikai, akĩmũũria atĩrĩ, Hĩ! Kaĩ Roho wa Jehova agereire njĩra ĩrĩkũ aandiga atĩ nĩguo oke aarie nawe?

²⁴Nake Mikaia akĩmwĩra ũũ: Atĩrĩrĩ, nĩũkamenya ũhoro ũcio mũthenya ũrĩa ũgatonya nyũmba ĩrĩ na kanyũmba ga thĩinĩ o thĩinĩ mũno ma ũkehithe.

²⁵Nake mũthamaki wa Isiraeli agĩkiuga atĩrĩ, Ta nyitai Mikaia, mũmũcokie he Amoni, mũnene wa itũũra, o na he Joashu, mũrũ wa mũthamaki,

²⁶mũmere atĩrĩ, Mũthamaki witũ oiga ũũ: Ikiai mũndũ ũyũ korokoro-inĩ, na ahinyĩrĩrio mũno, aheagwo irio itarĩ njega, o na maĩ matheri, mũira wa ngacoka na thayũ.

²⁷Nake Mikaia agĩkiuga atĩrĩ, Ũngĩgacoka na thayũ o na atĩa-rĩ, ti Jehova warĩtie na niĩ. Nake akiuga atĩrĩ, Ta wĩiguĩrei ũhoro ũcio, andũ aya inyuothe.

²⁸Tondũ ũcio mũthamaki wa Isiraeli, o na Jehoshafatu, mũthamaki wa Juda, magĩkĩambata magĩthiĩ Ramothu-gileadi.

²⁹Nake mũthamaki wa Isiraeli akĩĩra Jehoshafatu atĩrĩ, Niĩ nĩngwĩgarũra ũrĩa ’haana ndikamenyeke, njoke ndonye ita-inĩ; no wee wĩhumbe nguo ciaku cia ũthamaki. Tondũ ũcio mũthamaki wa Isiraeli akĩĩgarũra ũrĩa ahaana, ndakamenyeke, nao magĩgĩtonya mbaara-inĩ.

³⁰Na rĩrĩ, mũthamaki wa Suriata nĩaathĩte anene a ngari ciake cia ira akamera atĩrĩ, Mũtikanarũe na mũndũ o na ũrĩkũ, mũnyinyi, kana mũnene, tiga o mũthamaki wa Isiraeli wiki.

³¹Na gũgĩkinya atĩrĩ, atĩ hĩndĩ ĩrĩa anene acio a ngari cia ita monire Jehoshafatu, makiuga atĩrĩ, Ũyũ nĩwe mũthamaki wa Isiraeli; magĩkĩmũgarũrũkĩra nĩguo mahũrane nake; no rĩrĩ, Jehothafatu akiuga mbu, nake Jehova akĩmũteithia, nake Ngai agĩtũma mamweherere.

³²Na gũgĩkinya atĩrĩ, atĩ hĩndĩ ĩrĩa anene acio a ngari cia ita monire atĩ ũcio tiwe mũthamaki wa Isiraeli, magĩkĩhũndũka magĩtiga kũmũteng’eria.

³³Na rĩrĩ, mũndũ ũmwe akĩgeta ũta wake agĩikia mũguĩ o ro ũguo, atarĩ mũndũ agerete, akĩrathĩra mũthamaki wa Isiraeli o gatagatĩ-inĩ ka marathĩkanĩrio ma nguo ciake cia ita iria cia igera; na tondũ ũcio mũthamaki wa Isiraeli agĩkĩĩra mũtwari wa ngari atĩrĩ, Garũra ngari, ũndute mbũtũ-inĩ ya ita; nĩ ũndũ ndĩ mũguraru mũno ma.

³⁴Nayo mbaara ĩgĩkĩneneha mũno mũthenya ũcio; no rĩrĩ, mũthamaki wa Isiraeli agĩtinda atiirĩtwo ngari-inĩ yake ya ita ang’etheire Asuriata o nginya hwaĩ-inĩ; na rĩrĩ, o ta ihinda rĩrĩa riũa rĩathiaga gũthũa-rĩ, agĩgĩkua.