2 Chronicles 20

¹Na gũgĩkinya atĩrĩ, atĩ thutha wa maũndũ macio ciana cia Moabi, o na ciana cia Amoni, irĩ hamwe na Aamoni amwe angĩ, igĩgĩthiĩ gũũkĩrĩra Jehoshafatu ihũrane mbaara nake.

²Hagĩgĩthiĩ andũ amwe makĩmwĩra atĩrĩ, Nĩharoka kĩrĩndĩ kĩingĩ mũno kiumĩte mũrĩmo ũrĩa ũngĩ wa iria, o kũu Suriata, gĩgũũkĩrĩre; na atĩrĩrĩ, rĩu kĩrĩ Hazazoni-tamaru (na nokuo Eni-gedi).

³Nake Jehoshafatu agĩgĩĩtigĩra, agĩitĩka kũrongoria Jehova nĩguo aheo kĩrĩra nĩwe, akĩhunjanĩria ũhoro kũu Juda guothe wa atĩ mehinge kũrĩa irio.

⁴Nao Ajuda magĩkĩũngana othe hamwe, nĩ getha macarie ũteithio he Jehova; naguo ũguo nĩ ta kuuga atĩ andũ makiuma matũũra mothe ma Juda nĩguo makarongorie Jehova.

⁵Nake Jehoshafatu akĩrũgama kĩrĩndĩ-inĩ kĩa Juda na Jerusalemu, o kũu nyũmba ya Jehova thĩinĩ, mbere ya nja ĩrĩa ya mũthondekano;

⁶nake ariuga atĩrĩ, Wee Jehova, Ngai wa maithe maitũ, githĩ tiwe Ngai ũrĩa wĩ kũu igũrũ? Ningĩ-rĩ, githĩ wee tiwe wathaga mothamaki mothe ma ndũrĩrĩ? Hinya na ũhoti ii moko-inĩ maku, na gũtirĩ mũndũ ũngĩhota gũgwĩtiiria.

⁷Atĩrĩrĩ, wee Ngai witũ, githĩ ndwaingatire andũ arĩa maatũũraga bũrũri ũyũ, mehere mbere ya andũ aku Isiraeli, na ũkĩũhe mbeũ ya Iburahimu, mũrataguo, ũtuĩke wayo tene na tene?

⁸Nao magĩkĩũtũũra, na rĩu nĩmagwakĩire handũ haamũre hetanĩtio na rĩĩtwa rĩaku, makiugaga atĩrĩ,

⁹Ũũru ũngĩgatũkora-rĩ, o na wĩ wa rũhiũ rũa njora, kana wa mũrimũ, kana wa ng’aragu, tũkarũgama o gũkũ nyũmba-inĩ ĩno, o na mbere yaku, (nĩ gũkorũo rĩĩtwa rĩaku rĩtũire rĩkumagĩrio nyũmba-inĩ ĩno,) na nĩtũgagũkaĩra nĩ ũndũ wa mathĩna maitũ, nawe nĩũgatũigua ũtũhonokie.

¹⁰Na rĩu, ta rora wone ũhoro wa ciana cia Amoni, na cia Moabi, o na cia andũ arĩa matũũraga kĩrĩma gĩa Seiru, o acio wee ũtaarekire Aisiraeli macitharĩkĩre hĩndĩ ĩrĩa moimaga bũrũri wa Misiri, no nĩ kũgarũrũka maagarũrũkire magĩtigana nacio, na matiacininire;

¹¹ta rora wone mũhera ũrĩa megũtũcũnga, atĩ nĩ gũũka megũũka gũtũingata matũrute na hinya kũndũ kũrĩa wĩgwatĩire gũgatuĩka gwaku, o gũkũ ũtũheete, gũgatuĩka igai riitũ.

¹²Atĩrĩrĩ, wee Ngai witũ, githĩ ndũkũmacirithia? Nĩ gũkorũo ithuĩ tũtirĩ na hinya wa kũhũrana na kĩrĩndĩ gĩkĩ kĩingĩhĩte ũũ, gĩũkĩte kũhũrana na ithuĩ, o na kana tũkamenya ũrĩa tũngĩĩka; no rĩrĩ, maitho maitũ nĩwe macũthĩrĩirie.

¹³Nao Ajuda othe magĩkĩrũgama mbere ya Jehova, me hamwe na twana twao tũrĩa tũnini, na atumia ao, o na ciana ciao iria ingĩ.

¹⁴Na hĩndĩ ĩo-rĩ, Roho wa Jehova agĩkora Jehazieli, mũrũ wa Zekaria wa Benaia, wa Jeieli, wa Matania, Mũlawii wa ariũ a Asafu, agĩkĩgĩa nake arĩ o kũu kĩũngano-inĩ kĩu.

¹⁵Nake Jehazieli ũcio agĩkiuga ũũ: Atĩrĩrĩ, inyuĩ andũ othe a Juda, o na inyuĩ mũtũũraga Jerusalemu, o nawe, mũthamaki ũyũ, Jehoshafatu, ta thikĩrĩriai; Jehova aramwĩra ũũ: Tigai gwĩtigĩra, o na kana mũmake, nĩ ũndũ wa kĩrĩndĩ gĩkĩ kĩingĩ ũũ; nĩ gũkorũo mbaara ĩno ti inyuĩ mũkũrũa, no nĩ Ngai.

¹⁶Rũciũ rokai gũikũrũka mũkahũrane nakĩo; na atĩrĩrĩ, kĩraambatĩra njĩra ya ihaicĩro-inĩ rĩa Zizu, na nĩmũgakĩona mũthia-inĩ wa gĩtuamba kĩrĩa kĩng’etheire werũ wa Jerueli.

¹⁷Ningĩ atĩrĩrĩ, inyuĩ Ajuda na andũ a Jerusalemu, mũtikagĩa na bata wa kũrũa mbaara ĩo; no gũikara mũgaikara o ro ũguo mwĩnunĩte, muone ũrĩa Jehova ekũmũhonokia. Tigai gwĩtigĩra o na kana mũmake; rũciũ rokai gũthiĩ kũhũrana nao, nĩ gũkorũo Jehova e hamwe na inyuĩ.

¹⁸Nake Jehoshafatu akĩinamia mũtwe, agĩturumithia ũthiũ thĩ; nao Ajuda, o na andũ arĩa maatũũraga Jerusalemu, makĩĩgũithia thĩ mbere ya Jehova, makĩmũhoya mainamĩrĩire.

¹⁹Nao Alawii, o arĩa a ciana cia Akohathu, o na a ciana cia Akora, makĩrũgama nĩguo magooce Jehova, Ngai wa Isiraeli, maanĩrĩire na mĩgambo mĩnene mũno.

²⁰Nao makĩroka gũũkĩra rũcinĩ tene, makiumagara magĩthiĩ werũ-inĩ wa Tekoa; na rĩrĩ, hĩndĩ ĩrĩa maagwatire gũthiĩ na mbere, Jehoshafatu akĩrũgama, akiuga atĩrĩ, Ta ’thikĩrĩriai, inyuĩ Ajuda, o na inyuĩ andũ arĩa mũtũũraga Jerusalemu; ĩtĩkiai Jehova Ngai wanyu, na nĩmũgũtũũra mwĩhandĩte; ningĩ ĩtĩkiai anabii ake, na nĩmũgũtũũra mũgaacĩire.

²¹Na rĩrĩ, aarĩkia gũtaarana na andũ-rĩ, agĩcoka agĩthura andũ amwe a kũinĩra Jehova nyĩmbo, na kũmũgatha megemetie na ũgemu ũrĩa wa ũtheru, nĩguo matongorie athigari a ita, makiugaga atĩrĩ, Gathai Jehova, nĩ ũndũ tha ciake itũũraga tene na tene.

²²Na rĩrĩ, hĩndĩ ĩrĩa maambĩrĩirie kũina o na kũgatha Ngai-rĩ, Jehova akĩiga andũ a gũikara moheirie ciana icio cia Amoni na cia Moabi, o na andũ acio maatũũraga kĩrĩma gĩa Seiru, arĩa mokĩte kũhũrana na Juda; nao magĩtorio.

²³Nĩ gũkorũo ciana cia Amoni na cia Moabi nĩciaarahũkire nĩguo igokĩrĩre andũ arĩa maatũũraga Seiru, nĩ getha imorage imanine o kũmanina biũ; na rĩrĩ, hĩndĩ ĩrĩa ciarĩkirie kũnina andũ acio maatũũraga Seiru, ikĩgwata kũninana cio nyene, o mũndũ akĩũraga mũndũ ũrĩa ũngĩ.

²⁴Na rĩrĩ, hĩndĩ ĩrĩa Ajuda maakinyire handũ harĩa haakĩtwo mũthiringo wa nyũmba ndaya na igũrũ ya arangĩri, o kũu werũ-inĩ, magĩcũthĩrĩria kĩrĩndĩ kĩu kĩa andũ, makĩona atĩ no ciimba theri igũĩte thĩ, na gũtiarĩ mũndũ o na ũmwe wahonokete.

²⁵Na rĩrĩ, hĩndĩ ĩrĩa Jehoshafatu na andũ ake maathiire gũtaha indo cia andũ acio-rĩ, makĩona atĩ kwarĩ ũtonga mũingĩ thĩinĩ wao, o na nguo, o na indo nyingĩ cia goro, nacio magĩciĩcumanĩra, na igĩkorũo irĩ nyingĩ gũkĩra iria maahotaga gũthiĩ nacio; nao makĩnina mĩthenya ĩtatũ o magĩtaha indo icio, nĩ ũndũ wa ũrĩa ciaingĩhĩte mũno.

²⁶Na rĩrĩ, mũthenya wa kana magĩkĩũngana gĩtuamba-inĩ kĩa Beraka, nĩ ũndũ kũu nĩkuo maagathĩire Jehova; na tondũ ũcio handũ hau hagĩĩtwo Gĩtuamba kĩa Beraka, o na ũmũthĩ.

²⁷Hĩndĩ ĩo andũ othe a Juda na a Jerusalemu makĩhũndũka mũndũ o mũndũ, matongoretio nĩ Jehoshafatu, nĩguo macoke Jerusalemu makenete; nĩ ũndũ Jehova nĩaatũmĩte makenerere thũ icio ciao.

²⁸Nao magĩthiĩ magĩkinya nyũmba ya Jehova o kũu Jerusalemu me na inanda cia kĩnubi, o na inanda nene cia mũgeto, o na tũrumbeta.

²⁹Nake Ngai agĩtũma andũ a mothamaki mothe ma mabũrũri ma kũu magwatwo nĩ guoya mũno, hĩndĩ ĩrĩa maaiguire atĩ Jehova nĩwe ũrũĩte na thũ cia Isiraeli.

³⁰Tondũ ũcio ũthamaki wa Jehoshafatu ũgĩgĩikara ũhoreire, nĩ gũkorũo Ngai wake nĩaamũheire ũhurũko na mĩena yothe.

³¹Jehoshafatu agĩgĩthamaka kũu Juda; nake aaninĩte mĩaka mĩrongo ĩtatũ na ĩtano hĩndĩ ĩrĩa aambĩrĩirie gũthamaka; agĩgĩthamaka mĩaka mĩrongo ĩĩrĩ na ĩtano arĩ Jerusalemu; nake nyina etagwo Azuba, mwarĩ wa Shilihi.

³²Nake akĩrũmĩrĩra mĩthiĩre yothe ĩrĩa ithe, Asa, aathiaga nayo, na ndaigana kũgarũrũka na mwena, atĩ nĩguo amĩtige, no gwĩka ekaga maũndũ marĩa monagwo maagĩrĩire nĩ Jehova.

³³No rĩrĩ, matĩri ma kũndũ gũtũũgĩru matiigana kweherio; o na kana andũ magĩkorũo maroretie ngoro ciao he Ngai wa maithe mao.

³⁴Na rĩrĩ, ciĩko iria ingĩ cia Jehoshafatu, cia mbere o na cia kũrigĩrĩria-rĩ, nĩciandĩkĩtwo ũhoro-inĩ wa Jehu wa Hanani, ũrĩa ũgwetetwo ibuku-inĩ rĩa athamaki a Isiraeli.

³⁵Na rĩrĩ, thutha wa maũndũ macio, Jehoshafatu, mũthamaki wa Juda, agĩtũma ndũgũ na Ahazia, mũthamaki wa Isiraeli, nake ũcio nĩwe wekire maũndũ maingĩ ma waganu;

³⁶nake aatumire ndũgũ nake nĩ getha mathondeke marikabu cia gũthiĩ Tarishishi, nao magĩthondekera marikabu icio kũu Ezioni-geberi.

³⁷Hĩndĩ ĩo Eliezeru wa Dodavahu, mũndũ wa Maresha, akĩrathĩra Jehoshafatu ũrathi wa ũrĩa akona ũũru, akiuga atĩrĩ, Tondũ nĩũtumĩte ndũgũ na Ahazia-rĩ, Jehova nĩaathũkia mawĩra maku. Nacio marikabu icio igĩkiunĩkanga ikĩremwo nĩ gũthiĩ Tarishishi.