2 Chronicles 22

¹Na rĩrĩ, andũ arĩa maatũũraga Jerusalemu magĩtua Ahazia, mũrũwe ũrĩa mũnyinyi wa arĩa angĩ othe, mũthamaki ithenya rĩake; nĩ gũkorũo gĩtungati kĩa andũ arĩa maarehanĩte na Aarabu magakinya kĩraaro-inĩ kĩao nĩmoragĩte arĩa akũrũ othe. Tondũ ũcio Ahazia, mũrũ wa Jehoramu, mũthamaki wa Juda, agĩgĩthamaka.

²Nake Ahazia, rĩrĩa aambĩrĩirie gũthamaka, aarĩ wa mĩaka mĩrongo ĩna na ĩĩrĩ; agĩthamaka mwaka ũmwe kũu Jerusalemu; nake nyina etagwo Athalia, mwarĩ wa Omuri.

³O nake agĩthiĩ na mĩthiĩre ta ĩrĩa ya nyũmba ya Ahabu, nĩ ũndũ nyina nĩaamũheaga kĩrĩra gĩa gwĩka maũndũ ma waganu.

⁴Nake agĩgĩĩka maũndũ marĩa monagwo marĩ moru nĩ Jehova, o ta ũrĩa nyũmba ya Ahabu yekaga; nĩ ũndũ andũ ayo nĩo maamũheaga kĩrĩra, thutha wa ithe aakua, nao magĩtuĩka a kũmũninithia biũ.

⁵Ningĩ tondũ wa kũrũmĩrĩra kĩrĩra kĩao, akĩya gũtwarana na Jehoramu, mũrũ wa Ahabu, mũthamaki wa Isiraeli, magatharĩkĩre Hazaeli, mũthamaki wa Suriata, o kũu Ramothu-gileadi; nao Asuriata makĩguraria Joramu.

⁶Nake agĩkĩhũndũka nĩguo akahonerio kũu Jezireeli nguraro icio aagurarĩirio Rama makĩhũrana mbaara na Hazaeli, mũthamaki wa Suriata. Nake Azaria wa Jehoramu, mũthamaki wa Juda, agĩgĩikũrũka nĩguo athiĩ Jezireeli akarore Jehoramu wa Ahabu, nĩ ũndũ aarĩ mũrũaru.

⁷Na rĩrĩ, ũhoro wa Ahazia wa kũninwo biũ woimĩte he Ngai, hĩndĩ ĩo aathiĩte kwĩ Joramu; nĩ gũkorũo aathiĩ kuo, nĩmaacokire gũthiĩ na Jehoramu makahũrane na Jehu wa Nimushi, ũrĩa Jehova aatũmĩte aitĩrĩrio maguta nĩguo anine nyũmba ya Ahabu biũ.

⁸Na gũgĩkinya atĩrĩ, atĩ hĩndĩ ĩrĩa Jehu aahingagĩria nyũmba ya Ahabu cira wa Ngai, akĩona anene a Juda, o na ihĩĩ cia ariũ a ithe na Ahazia magĩtungatĩra Ahazia, nake akĩmoraga.

⁹Ningĩ agĩgĩcarithia Ahazia, akĩmũnyitithia, (nake agĩkorũo ehithĩte Samaria,) nao andũ magĩkĩmũtwara kwĩ Jehu, makĩmũũraga; nao makĩmũthika, nĩ ũndũ moigire atĩrĩ, Nĩ mũrũ wa Jehoshafatu ũrĩa warongoragia Jehova na ngoro yake yothe. Nayo nyũmba ya Ahazia ĩgĩgĩkorũo ĩtarĩ na hinya wa kũnyitĩrĩra ũthamaki.

¹⁰Na rĩrĩ, hĩndĩ ĩrĩa Athalia, nyina wa Ahazia, onire atĩ mũrũwe e gũkua, akĩarahũka, akĩũraga mbeũ yothe ya ũthamaki wa nyũmba ya Juda.

¹¹No rĩrĩ, Jehoshabeathu, mwarĩ wa mũthamaki, akĩoya Joashu, mũrũ wa Ahazia, agĩthiĩ nake na hitho, akĩmũruta thĩinĩ wa ariũ a mũthamaki arĩa moragagwo, akĩmũiga kanyũmba gake ga toro me na mũmũreri. Ũguo nĩguo Jehoshabeathu, mwarĩ ũcio wa Jehoramu mũthamaki, mũka wa Jehoiada mũthĩnjĩri-Ngai, (nĩ ũndũ aarĩ mwarĩ wa nyina na Ahazia,) aahithire Joashu ndakonwo nĩ Athalia, na tondũ ũcio ndakĩigana kũmũũraga.

¹²Nake agĩgĩtũũra ahithĩtwo nĩo kũu nyũmba ya Ngai mĩaka ĩtandatũ; nake Athalia agĩtũũra athamakaga bũrũri ũcio.